1 Kɔlɛ́ntinu 8 - MAWUXÓWÉMA

Nǔɖuɖu e è dǒ sá vɔ̌ nú vodún lɛ́ɛ

¹ Din ɔ́, un ná ɖɔ xó dó nǔɖuɖu e è dǒ sá vɔ̌ nú vodún lɛ́ɛ wú. Mǐ tunwun ɖɔ mǐ mɛ bǐ wɛ tunwun nǔ. Lo ɔ́, nǔ e mǐ tunwun ɔ́ zɔ́n bɔ goyíyí gɔ́ gbɛtɔ́ sín ayixa mɛ; wǎn yíyí ka nɔ zɔ́n bɔ mǐ nɔ yi nukɔn.

² Mɛ e lin ɖɔ émí tunwun nǔɖé ɔ́, é ko tunwun nǔ ɔ́ lě e é ɖó ná tunwun gbɔn é ǎ.

³ Amɔ̌ mɛ e yí wǎn nú Mawu ɔ́, Mawu tunwun i.

⁴ Hǔn nǔ e kan nǔɖuɖu e è dǒ sá vɔ̌ nú vodún lɛ́ɛ ɖuɖu ɔ́, mǐ tunwun ganjí ɖɔ vodún ɖě kún ɖo gbɛ ɔ́ mɛ ó; mǐ tunwun ganjí ɖɔ Mawu ɖokpó géé wɛ tíin.

⁵ Nú é tlɛ nyí ɖɔ nǔ gěgé tíin ɖo jǐnukúnsin kpódó ayǐkúngban jí kpán, bɔ mɛ lɛ́ɛ nɔ ylɔ́ ɖɔ mawu ɔ́, hǔn, “mawu” gěgé wɛ tíin, bɔ “aklúnɔ” gěgé tíin nɛ́.

⁶ Lo ɔ́, Mawu ɖokpó géé wɛ tíin nú mǐdɛɛ lɛ́ɛ: é wɛ nyí Tɔ́ e ɖó nǔ bǐ é; é wɛ mǐ ɖo gbɛ ná; mɔ̌ ɖokpó ɔ́, Aklúnɔ ɖokpó géé wɛ tíin; é wɛ nyí Jezu Klísu e jí nǔ lɛ́ɛ bǐ tíin gbɔn é; é jí wɛ mǐ ɖo gbɛ gbɔn.

⁷ Amɔ̌, mɛ bǐ mɔ nǔ jɛ nǔgbó énɛ́ wú ǎ. Mɛ ɖé lɛ́ɛ tíin, bɔ ée yě ko sɛn vodún ɖ'ayǐ káká bɔ é byɔ́ walɔ mɛ nú yě ɔ́, káká jɛ din ɔ́, yě lɛ́ kpo ɖo nǔɖuɖu énɛ́ lɛ́ɛ ɖu wɛ, vodún tɔn wɛ nǔɖuɖu ɔ́ nyí ɖɔhun, bɔ ayixa yětɔn e má ɖó gǎn ǎ ɔ́ nɔ́ ɖɔ nú yě ɖɔ yě blí.

⁸ Có é ma ka nyí nǔɖuɖu wɛ nɔ zɔ́n bɔ mǐ nɔ́ sɛkpɔ́ Mawu nɛ́; ényí mǐ ma ɖu ǎ ɔ́, nǔɖé gú mǐ ǎ; ényí mǐ ka ɖu ɔ́, le ɖé ɖ'é mɛ nú mǐ ǎ.

⁹ É ɖo mɔ̌ có, mi cɔ́ miɖée, bónú miɖée sí e mi jɛ, bó dó ɖo nǔ wa ná wɛ ɔ́ ní ma dɔn mɛ e ma ɖó gǎn ɖo ayixa mɛ ǎ lɛ́ɛ dó hwɛ mɛ ó.

¹⁰ Nǔgbó ɔ́, ényí mɛ e ma ɖó gǎn ɖo ayixa mɛ ǎ ɔ́ mɔ hwi mɛ e ɖɔ émí “tunwun nǔ” ɔ́ ɖo nǔ ɖu wɛ ɖo vodúnxɔ mɛ ɔ́, é ná ná ɛ akɔ́nkpinkpan, bɔ é ná ɖu nǔɖuɖu e è dǒ sá vɔ̌ ná nú vodún é ǎ cé?

¹¹ É nyí mɔ̌ ɔ́, mɛ énɛ́ e ma ɖó gǎn ɖé ɖo ayixa mɛ ǎ ɔ́, nɔví ɖo Klísu mɛ énɛ́ e tamɛ Klísu kú dó ɔ́ ná dɔn, ɖó “nǔtunwuntunwun towe énɛ́” wútu!

¹² Ényí mi nɔ hu hwɛ dó nɔví mitɔn lɛ́ɛ gbɔn mɔ̌, bó nɔ dó akpa ayixa yětɔn e má ɖó gǎn lɛ́ɛ wú ɔ́, Klísu ɔ́ ɖésú wɛ mi hu hwɛ dó.

¹³ Énɛ́ wútu ɔ́, nú nǔɖuɖu wɛ ná zɔ́n bɔ nɔví ce ná jɛ hwɛ mɛ hǔn, un sɔ́ ná ɖu lan gbeɖé ǎ, bónú é ma sín nyɛ wútu nú nɔví ce jɛ hwɛ mɛ ó.