1 Kɔlɛ́ntinu 7 - MAWUXÓWÉMA

Asidida xó ɔ́, nǔ e ɖ'é mɛ ɔ́ ɖíe:

¹ Din ɔ́, nǔ e mi kanbyɔ́ mì ɖo wěma e mi wlán sɛ́ dó mì é mɛ ɔ́, mǐ ná kɛ nu d'é wú: é nyɔ́ bónú súnnu ná ɖó xó xá nyɔ̌nu ǎ.

² É ka ɖo mɔ̌ có, bónú è ma wá lɛ aga ó wútu ɔ́, nú súnnu ɖokpó ɖokpó ɖó asi é ɖésúnɔ tɔn, bónú nyɔ̌nu ɖokpó ɖokpó ɖó asú é ɖésúnɔ tɔn ɔ́, é nyɔ́ hú.

³ Súnnu ɔ́ ɖó ná wa asúzɔ́ tɔn nú asi tɔn; mɔ̌ ɖokpó ɔ́, nyɔ̌nu ɔ́ ɖó ná wa asizɔ́ tɔn nú asú tɔn.

⁴ Nyɔ̌nu ɔ́ ɖó acɛ dó agbaza é ɖésúnɔ tɔn jí ǎ; agbaza tɔn ɔ́, asú tɔn tɔn wɛ é nyí; mɔ̌ ɖokpó ɔ́, súnnu ɔ́ ɖó acɛ dó agbaza é ɖésúnɔ tɔn jí ǎ; agbaza tɔn ɔ́, asi tɔn tɔn wɛ é nyí.

⁵ Mi ma gbɛ́ xɔ nú miɖée ó, afi nú mi ɖó gbe kpɔ́, bó ná nɔ mɔ̌ nú hwenu ɖé, bó ná sixú kpé nukún dó ɖɛxixo wú. Amɔ̌, ényí hwe ɔ́ nu wá yi ɔ́, mi ná lɛ́ bɛ́ asú kpó asi kpó sín gbɛ lě e é jɛ xá gbɔn é; é má nyí mɔ̌ ǎ ɔ́, miɖée jí ɖu ɖe táá gló mi, bɔ Satáan ná tɛ́n mi kpɔ́n.

⁶ Nǔ énɛ́ e un ɖɔ nú mi ɔ́, sɛ́n wɛ é nyí bɔ un dó nú mi ǎ, amɔ̌ lě e é ɖe gbɔn nú nyɛ ɔ́ wɛ un ɖɔ nú mi.

⁷ Nǔgbó ɔ́, un jló ɖɔ mɛ bǐ ní nɔ nyɛ ɖɔhun; lo ɔ́, nǔníná mɛtɔn mɛtɔn wɛ Mawu ka ná mɛ; é ná ɖě mɛ ɖě, bó ná ɖěvo mɛ ɖě ɔ́.

⁸ Nǔ e ɖɔ nú mɛ e ma da asi ǎ lɛ́ɛ, abǐ mɛ e ma da asú ǎ lɛ́ɛ, kpódó asúkúsi lɛ́ɛ kpán wɛ un ɖe ɔ́ ɖíe: é nyɔ́ nú mi ní kpo ɖo mi ɖokpónɔ nɔ wɛ nyɛ ɖɔhun.

⁹ Amɔ̌, ényí mi ma sixú ɖu ɖo miɖée jí ǎ hǔn, mi da asi, abǐ mi da asú: ényí mi da asi abǐ mi da asú ɔ́, é nyɔ́ hú mi ní nɔ mɔ̌, bónú nyɔ̌nu biba abǐ súnnu biba sín jlǒ na ɖo jiji wɛ ɖo lan mitɔn mɛ myɔ ɖɔhun.

^10-11 Sɛ́n e dó nú asú kpó asi kpó lɛ́ɛ wɛ un ɖe ɔ́ ɖíe: nyɔ̌nu e da asú ɔ́ ɖó ná jó asú tɔn dó ǎ; súnnu ɖě ká ɖó ná nya asi tɔn ǎ (nyɛ ɖésúnɔ wɛ dó sɛ́n énɛ́ ɔ́ ǎ; lo ɔ́, Aklúnɔ ɖésú wɛ dó). Ényí nyɔ̌nu ɔ́ ka wá jó asú tɔn dó ɔ́, ní ma sɔ́ vɔ́ asú ɖěvo da ó, abǐ ní dó hwɛ gbɔ xá asú tɔn.

¹² Mɛɖě lɛ́ɛ ɔ́ , nǔ e ɖɔ nú yě wɛ un ɖe ɔ́ ɖíe (nyɛ ɖésúnɔ wɛ ka ɖo ɖiɖɔ wɛ; é nyí Aklúnɔ wɛ ǎ). Nú súnnu e ɖi nǔ nú Klísu ɔ́ ɖě ɖó asi e ma ɖi nǔ nú Klísu ǎ é, bɔ nyɔ̌nu ɔ́ ka yí gbe bó ná nɔ kpɔ́ xá ɛ ɔ́, súnnu ɔ́ ɖó ná nya ɛ ǎ.

¹³ Mɔ̌ ɖokpó ɔ́, nú nyɔ̌nu e ɖi nǔ nú Klísu ɔ́ ɖě ɖó asú e ma ɖi nǔ nú Klísu ǎ é, bɔ súnnu ɔ́ ka yí gbe bó ná nɔ kpɔ́ xá ɛ ɔ́, nyɔ̌nu ɔ́ ɖó ná nya ɛ ǎ.

¹⁴ Nǔgbó ɔ́, súnnu e ma ɖi nǔ nú Klísu ǎ ɔ́ nyí mɛɖeɖóvo Mawu tɔn, ɖó bǔ e é kpó asi tɔn kpó ɖe ɔ́ wútu. Mɔ̌ ɖokpó ɔ́, nyɔ̌nu ɖo asúxwé e ma ɖi nǔ nú Klísu ǎ ɔ́ nyí mɛɖeɖóvo Mawu tɔn, ɖó bǔ e é kpó asú tɔn kpó ɖe ɔ́ wútu. Ényí nǔ ma nyí mɔ̌ ǎ ɔ́, è nǎ nɔ́ mɔ vǐ yětɔn lɛ́ɛ dó mɔ mɛ blíblí, có mɛ mímɛ́ wɛ yě ká nyí.

¹⁵ É ka ɖo mɔ̌ có, nú mɛ e ma ɖi nǔ nú Klísu ǎ ɔ́ jló ná klán xá asú tɔn abǐ asi tɔn e ɖi nǔ nú Klísu ɔ́ hǔn, é ní jó e dó ní yi; é nyí nǔ cí mɔ̌ ɔ́, hǔn asisúnɔ abǐ nyɔ̌nu ɖo asúxwé e ɖi nǔ nú Klísu ɔ́ jɛ éɖée sí; ɖó mǐ ná mɔ fífá wútu wɛ Mawu ylɔ́ mǐ.

¹⁶ Hwi nyɔ̌nu e ɖi nǔ nú Klísu ɔ́, a tunwun nú a nǎ hwlɛ́n asú towe gán a? Abǐ hwi súnnu e ɖi nǔ nú Klísu ɔ́, a tunwun nú a nǎ hwlɛ́n asi towe gán a?

Mi zán gbɛ mitɔn lě e Mawu jló gbɔn é

¹⁷ Nǔ e wɛ kpowun ɔ́, mɛ ɖokpó ɖokpó ɖó ná zán gbɛ tɔn, bɔ é ná sɔgbe xá nǔníná e Aklúnɔ ná ɛ é, bó ná sɔgbe xá lě e é ko ɖe gbɔn cóbɔ Mawu ylɔ́ ɛ é; sɛ́n e un ɖó ayǐ ɖo agun lɛ́ɛ bǐ mɛ ɔ́ nɛ́.

¹⁸ Ényí mɛɖé ko gbo ada cóbɔ Mawu ylɔ́ ɛ ɔ́, ní ma sɔ́ ba ná sɔ́ éɖée dó húzú mɛ e ma gbo ada ǎ é ó; ényí mɛɖé ma ka gbo ada cóbɔ Mawu ylɔ́ ɛ ǎ ɔ́, é ɖó ná yi gbo ada ǎ.

¹⁹ È gbo ada abǐ è ma gbo ada ǎ ɔ́ wɛ ɖo tají ǎ; nǔ e ɖo tají ɔ́ wɛ nyí è nǐ se tónú nú Mawusɛ́n lɛ́ɛ.

²⁰ Mɛ ɖokpó ɖokpó ɖó ná nɔ lě e é ɖe gbɔn hwenu e Mawu ylɔ́ ɛ é.

²¹ Nú kannumɔ wɛ a nyǐ hwenu e Mawu ylɔ́ we ɔ́ hǔn, ado ma hu we ó; lo ɔ́, ényí ali ɖé wá hun nú we, bɔ a nǎ jɛ hwiɖée sí hǔn, hwlɛ̌ndó.

²² Đó mɛ e nyí kannumɔ bɔ Aklúnɔ ylɔ́ ɛ ɔ́ nyí mɛ e jɛ éɖée sí, bó ɖo Aklúnɔ sín acɛ mɛ é; mɔ̌ ɖokpó ɔ́, mɛ e ɖo éɖée sí, bɔ Klísu ylɔ́ ɛ ɔ́ nyí Klísu sín kannumɔ.

²³ Axivɛ́nu wɛ Mawu xɔ mi, bó sú axɔ́; hǔn mi bo ma húzú gbɛtɔ́ lɛ́ɛ sín kannumɔ ó.

²⁴ Nǔgbó wɛ! Nɔví lɛ́ɛ mi, mɛ ɖokpó ɖokpó ɖó ná nɔ ninɔmɛ e mɛ é ko ɖe hwenu e Mawu ylɔ́ ɛ ɔ́, ɖo Mawu nukɔn.

Mɛ e ma da asi ǎ abǐ asú ǎ lɛ́ɛ kpó asúkúsi lɛ́ɛ kpó

²⁵ Nǔ e kan mɛ e ma da asi ǎ abǐ asú ǎ lɛ́ɛ ɔ́, Aklúnɔ ɖɔ xó ɖé nú mì d'é wú ǎ; lo ɔ́, nyɛ mɛ e Aklúnɔ bló bɔ un nyí mɛ e wú è hɛn ɔ́, è nǎ ɖeji dó gbɔn xomɛnyínyɔ́ tɔn gbla mɛ ɔ́, ma ɖɔ nǔ e un lin d'é wú ɔ́ nú mi.

²⁶ Đó wǔvɛ́ mimɔ e ɖe din ɔ́ wútu ɔ́, nǔ e un lin d'é wú ɔ́ ɖíe: é nyɔ́ bónú gbɛtɔ́ ná nɔ lě e é ɖe gbɔn é.

²⁷ Asi wɛ a ɖǒ hǔn, ma ba ná klán xá ɛ ó; a ma ɖó asi ǎ hǔn, ma ba ná da ó.

²⁸ É ɖo mɔ̌ có, nú a da asi ɔ́, a hu hwɛ ǎ; nú ɖyɔ̌vǐ ɖé ka da asú ɔ́, é hu hwɛ ǎ. Amɔ̌, mɛ e da asi abǐ mɛ e da asú lɛ́ɛ ɔ́, yě nɔ mɔ wǔvɛ́ ɖo gbɛ e yě nɔ zán ayǐhɔ́ngbe ayǐhɔ́ngbe ɔ́ mɛ; un ka jló ɖɔ mi ní mɔ wǔvɛ́ ǎ.

²⁹ Nɔví lɛ́ɛ mi, nǔ e ɖɔ wɛ un ɖe, bó ɖɔ mɔ̌ ɔ́ ɖíe: hwenu kpɛɖé wɛ kpo; bɛ́ sín din ɔ́, mɛ e da asi lɛ́ɛ ní zán gbɛ yě ma da asi ɖɔhun.

³⁰ Mɛ e ɖo avǐ ya wɛ lɛ́ɛ ní cí yě ma ɖo avǐ ya wɛ ɖɔhun; mɛ e ɖo awǎ jɛ wɛ lɛ́ɛ ní cí yě ma ɖo awǎ jɛ wɛ ɖɔhun; mɛ e ɖo nǔ xɔ wɛ lɛ́ɛ ní cí nǔ e yě xɔ ɔ́ ma ɖo así yětɔn ɖɔhun.

³¹ Mɛ e ɖo dɔkun gbɛmɛ fí tɔn lɛ́ɛ zán wɛ lɛ́ɛ ní cí yě ma ɖo nǔɖé zán wɛ ɖɔhun. Đó tito gbɛ élɔ́ mɛ tɔn lɛ́ɛ ɖo hǔzúhúzú wɛ.

³² É jló mì ɖɔ nǔlinlin ɖěbǔ ní ma nɔ ayixa mɛ nú mi ó. Mɛ e ma da asi ǎ ɔ́, Aklúnɔ sín nǔ lɛ́ɛ wú wɛ é nɔ kpé nukún dó; é nɔ ba ná nyɔ́ ɖo Aklúnɔ sí.

³³ Lo ɔ́, mɛ e da asi ɔ́ nɔ kpé nukún dó gbɛmɛ fí sín nǔ lɛ́ɛ wú; é nɔ ba ná nyɔ́ ɖo asi tɔn sí.

³⁴ Énɛ́ ɔ́, nǔ we wú kpé nukún dó wɛ é ɖe nɛ́. Mɔ̌ ɖokpó ɔ́, nyɔ̌nu e ma da asú ǎ, abǐ ɖyɔ̌vǐ ɔ́, Aklúnɔ sín nǔ lɛ́ɛ wú wɛ é nɔ kpé nukún dó; ɖó é nɔ jló ná nyí Aklúnɔ tɔn ɖo agbaza kpó yɛ kpó mɛ; lo ɔ́, nyɔ̌nu e ka ɖó asú ɔ́, gbɛmɛ fí sín nǔ lɛ́ɛ wú wɛ é nɔ kpé nukún dó; é nɔ ba ná nyɔ́ ɖo asú tɔn sí.

³⁵ Đagbe mitɔn wú wɛ un ɖɔ mɔ̌; mɔ̌ wɛ mi ná bló gbɔn dandan wú wɛ un ɖɔ mɔ̌ ǎ; un jló ɖɔ mi ní zán gbɛ mitɔn lě e é jɛ xá gbɔn é, bó ka ɖó kan dó Aklúnɔ sín azɔ̌ ɔ́ wú bǐ gbídígbídí.

³⁶ Un ná ɖɔ xó dó súnnu e ɖó asixɔ́ntɔn, abǐ nyɔ̌nu e ɖó asúxɔ́ntɔn ɔ́ wú. Nú dɔ̌nkpɛvú ɔ́ mɔ ɖɔ ninɔmɛ e émí nɔ ɖó dó ɖyɔ̌vǐ ɔ́ wú ɔ́ kún sɔgbe ó, bó mɔ ɖɔ jlǒ agbaza tɔn ɖu ɖo émí jí, bó mɔ ɖɔ émí ɖó ná da émíɖée ɔ́, yě ní bó da yěɖée lě e yě jlǒ gbɔn é! É nyí hwɛ ǎ.

³⁷ Lo ɔ́, ényí dɔ̌nkpɛvú énɛ́ kpɔ́n ayi éɖée tɔn mɛ, bó ɖɔ émí kún ná da asi ó, bɔ é lí dǒ ɖo ayi tɔn mɛ, bɔ é ma ka nyí mɛɖé wɛ ɖɔ dandan mɔ̌ jɛ́n é ná bló ǎ, bɔ é mɔ ɖɔ émí hɛn ɔ́, émí ná ɖu ɖo jlǒ agbaza tɔn jí, bó kún ná ɖó alɔ asixɔ́ntɔn émítɔn wú ó ɔ́, nǔ ɖagbe wɛ é wa.

³⁸ Énɛ́ ɔ́, mɛ e da asixɔ́ntɔn tɔn ɔ́, nǔ ɖagbe wɛ é wa; mɛ e ma ka da ɛ ǎ ɔ́, é wa nǔ ɖagbe hú mɛ ɖě ɔ́.

³⁹ Nyɔ̌nu e da asú ɔ́, ko ɖo bǔ xá asú tɔn káká yi jɛ hwenu e asú tɔn ɔ́ na nɔ gbɛ dó é. Lo ɔ́, nú asú tɔn kú ɔ́, é hɛn ɔ́, é ná da mɛ e jló e é; yě ní vɛ ko sixú da yěɖée ɖo bǔ e yě ɖe xá Aklúnɔ ɔ́ mɛ.

⁴⁰ É ɖo mɔ̌ có, nú é nɔ asú ma da ɔ́, é ná mɔ awǎjijɛ hú; lě e nyɛ mɔ gbɔn ɔ́ nɛ́; un ka tunwun ɖɔ nyi lɔ ɖó Yɛ Mawu tɔn.