1 Kɔlɛ́ntinu 6 - MAWUXÓWÉMA

¹ Ényí mɛɖé ɖo mi mɛ, bónú nɔví ɖé wa nǔ nyi do n'i ɔ́, nɛ̌ ka gbɔn bɔ é ma sixú wá jɛ hwɛ tɔn nú mɛɖeɖóvo Mawu tɔn lɛ́ɛ ǎ, bó nɔ́ glá káká yi ylɔ́ hwɛ ɛ ɖo hwɛɖɔtɔ́ e ma nyí klísusɛntɔ́ ǎ lɛ́ɛ gɔ́n?

² Mi tunwun ɖɔ mɛɖeɖóvo Mawu tɔn lɛ́ɛ wɛ ná ɖɔ hwɛ xá wɛ̌kɛ́ ɔ́ bǐ ǎ cé? Ée é ka nyí ɖɔ mi wɛ ɖó ná ɖɔ hwɛ xá gbɛ ɔ́, nǔ énɛ́ lɛ́ɛ e ma nyí nǔjɔnǔ ɖé ǎ lɛ́ɛ ɔ́, mi sixú kpé wú bó ɖɔ gbo mi ɖésúnɔ ǎ cé?

³ Mi tunwun ɖɔ mǐdɛɛ wɛ ná ɖɔ hwɛ xá wɛnsagun lɛ́ɛ ǎ cé? Ani ka lɛ́ nyí gbɛ élɔ́ mɛ sín nǔ lɛ́ɛ tɔn?

⁴ Ényí tagba ɖé wá tɔ́n ɖo tɛ́ntin mitɔn, ɖó nǔ hǔnmɛ énɛ́ lɛ́ɛ wú ɔ́, nɛ̌ gbɔn bɔ mi nɔ yi ylɔ́ hwɛ ɖo mɛ e ma ɖo togun Mawu tɔn ɔ́ mɛ ǎ lɛ́ɛ gɔ́n?

⁵ Winnyá ní hu mi. Dandan mɛ ɔ́, gbɛtɔ́ nǔnywɛ́tɔ́ e ná sixú dó hwɛ gbɔ nú nɔví nɔví ɔ́ ɖokpó ná ɖo mi mɛ vɔ́vɔ́!

⁶ Lo ɔ́, hwɛ jɛ́n nɔví ɖě ká ɖó ná ylɔ́ ɖě ɔ́ dandan a? Bɔ é ka ná lɛ́ nyí hwɛɖɔtɔ́ e ma nyí klísusɛntɔ́ ǎ lɛ́ɛ nukɔn a?

⁷ Nǔgbó ɔ́, hwɛgbe e nɔ ɖo tɛ́ntin mitɔn ɔ́ kɛ́ɖɛ́ ko ɖe xlɛ́ ɖɔ mi jɛ ayǐ bǐ gbídígbídí. Nɛ̌ ka gbɔn bɔ mi ma gbɔ bónú è wa nǔ agɔ dó mi ǎ? Nɛ̌ ka gbɔn bɔ mi ma gbɔ bónú è jɛ ajo dó mi ǎ?

⁸ É nyɔ́ wa ɔ́, midɛɛ lɛ́ɛ wɛ nɔ ɖo nǔ agɔ wa wɛ, bó nɔ́ ɖo ajo ja wɛ, bɔ nɔví ɖo Klísu mɛ lɛ́ɛ wú wa nǔ énɛ́ lɛ́ɛ dó wɛ mi ka nɔ lɛ́ ɖe!

⁹ Dandan mɛ ɔ́, mi tunwun ɖɔ mɛ e ɖo nǔ nyanya wa wɛ lɛ́ɛ kún ná mɔ tɛn ɖo axɔ́súɖuɖu Mawu tɔn mɛ ó; mi ma blɛ́ miɖée ó: agalɛtɔ́ lɛ́ɛ, vodúnsɛntɔ́ lɛ́ɛ, mɛsibatɔ́ lɛ́ɛ, nyɔ̌nu e nɔ dó afɔ gbě lɛ́ɛ, súnnu e nɔ ɖó xó xá súnnu yětɔn ɖɔhun lɛ́ɛ,

¹⁰ ajotɔ́ lɛ́ɛ, mɛnújlótɔ́ lɛ́ɛ, ahannumúnɔ lɛ́ɛ, mɛnúɖɔtɔ́ abǐ ajotɔ́ axánsúnxó lɛ́ɛ ɔ́, yě ɖě ná mɔ tɛn ɖo axɔ́súɖuɖu Mawu tɔn mɛ ǎ.

¹¹ Nǔ e mɛɖé lɛ́ɛ ɖo mi mɛ, bó ko nyí ɖ'ayǐ ɔ́ nɛ́. Amɔ̌, è ko lɛ mi wé sín hwɛ mɛ; è ko ɖe mi ɖó vo, bɔ mi na nyí Mawu tɔn; è ko sɔ́ mi dó húzú hwɛjijɔnɔ, ɖo Aklúnɔ Jezu Klísu sín nyǐkɔ mɛ, gbɔn Yɛ Mawu mǐtɔn tɔn jí.

Mi zán agbaza mitɔn dó kpa susu nú Aklúnɔ

¹² Mɛ ɖé lɛ́ɛ ɖo mi mɛ, bó nɔ ɖɔ: “Nǔ bǐ sín gbe wɛ è nǎ mì.” Nǔgbó wɛ! É ɖo mɔ̌ có nǔ lɛ́ɛ bǐ ka nyɔ́ nú mi ǎ. Un sixú ɖɔ: “È nǎ nǔ bǐ sín gbe mì”; amɔ̌, un ka ná jó nyɛɖée dó, bó na húzú kannumɔ nǔ ɖěbǔ tɔn ǎ.

¹³ Mi nɔ lɛ́ ɖɔ: “Nǔɖuɖu nyí adɔgo tɔn, bɔ adɔgo nyí nǔɖuɖu tɔn.” Nǔgbó wɛ! É ka ɖo mɔ̌ có Mawu ná gblé gbɛ dó nú yě mɛ we lɛ́ɛ bǐ. Amɔ̌ agbaza gbɛtɔ́ tɔn ɔ́, éyɛ́ ɖe nú agalilɛ ǎ: Aklúnɔ tɔn wɛ é nyí, bɔ Aklúnɔ nyí étɔn.

¹⁴ Mawu fɔ́n Aklúnɔ wá gbɛ: é ná fɔ́n mǐ lɔmɔ̌ wá gbɛ gbɔn hlɔ̌nhlɔ́n tɔn gbla mɛ.

¹⁵ Mi tunwun ɖɔ agbaza mitɔn lɛ́ɛ ɔ́, agbaza Klísu tɔn sín wǔjɔnú wɛ yě nyí ǎ cé? Hǔn un ná zé agbaza Klísu tɔn sín wǔjɔnú dó bló agbaza agalɛtɔ́ tɔn sín wǔjɔnú ná wɛ a? Gbeɖé kpɔ́n!

¹⁶ Abǐ mi tunwun ɖɔ súnnu e ɖó kɔnɖókpɔ́ xá nyɔ̌nu agalɛtɔ́ ɔ́, é kpó nyɔ̌nu ɔ́ kpó húzú ɖokpó ɔ́ ǎ cé? Đó Mawuxówéma ɔ́ ɖɔ: “Yě mɛ we lɛ́ɛ ná húzú agbaza ɖokpó géé.”

¹⁷ Lo ɔ́, mɛ e ɖó kɔnɖókpɔ́ xá Aklúnɔ ɔ́, é kpó Aklúnɔ kpó húzú mɛ ɖokpó ɖo Yɛsinsɛn mɛ.

¹⁸ Mi hɔn nú agalilɛ. Hwɛ ɖěvo ɖěbǔ e gbɛtɔ́ ná hu ɔ́, hwɛ énɛ́ ɔ́ ɖo zɔ nú agbaza tɔn; amɔ̌, mɛ e lɛ aga ɔ́ hu hwɛ dó agbaza é ɖésúnɔ tɔn.

¹⁹ Mi tunwun ɖɔ agbaza mitɔn ɔ́, Yɛsinsɛn e Mawu ná mi, bɔ é ɖo mi mɛ ɔ́ sín sinsɛnxɔ wɛ é nyí ǎ cé? Mi nyí mi ɖésúnɔ tɔn ǎ:

²⁰ axivɛ́nu wɛ Mawu xɔ mi, lobo sú axɔ́. Hǔn, mi bo zán agbaza mitɔn dó kpa susu nú Mawu.