Biblia Todo Logo
Bìoball air-loidhne

- Sanasan -

1 Kɔlɛ́ntinu 5 - MAWUXÓWÉMA


Nǔblíblíwiwa ɖo agun mɛ

1 È nɔ se bɔ mɛ lɛ́ɛ nɔ ɖo ɖiɖɔ wɛ gbɔn fí bǐ ɖɔ mi ɖo aga lɛ wɛ; agalilɛ énɛ́ ɔ́ syɛ́n ɖésú, bɔ mɛ e ma nyí klísusɛntɔ́ ǎ lɛ́ɛ ɖésú tlɛ nɔ wa nǔ gbɔn mɔ̌ ǎ: nǔgbó ɔ́, è ɖɔ mɛɖé ɖo mi mɛ, bó yí tɔ́ tɔn sín asi.

2 Nǔ ɖo mɔ̌, bɔ wú gbɛ́ kúkú mi, bɔ mi nɔ lɛ́ ɖo go yí wɛ a? Mɛ e dó nǔ mɔ̌hunkɔtɔn sin ɔ́, ɖe wɛ mi ɖó ná ɖe e sín tɛ́ntin mitɔn.

3-4 Nyɛ ɔ́, ényí un tlɛ lín dó mi ɖo agbaza mɛ ɔ́, un ɖo kpɔ́ xá mi ɖo ayi mɛ, bó ko ɖó hwɛ nú mɛ e dó nǔ mɔ̌hunkɔtɔn sin ɔ́ ɖo Aklúnɔ mǐtɔn Jezu sín nyǐkɔ mɛ, nyɛ ɖésú gbɛtɔ́ ɔ́ wɛ ɖo tɛ́ntin mitɔn ɖɔhun. Hwenu e mi ná kplé ɔ́, un ná ɖo kpɔ́ xá mi ɖo ayi mɛ, bɔ Aklúnɔ mǐtɔn Jezu sín hlɔ̌nhlɔ́n ná ɖo tɛ́ntin mǐtɔn.

5 Énɛ́ ɔ́, mi ɖó ná jó nya énɛ́ ɔ́ nú Satáan , bónú agbaza tɔn ná gblé, bɔ Mawu ná hwlɛ́n lǐndɔ̌n tɔn gán ɖo Aklúnɔ sín azǎn gbe.

6 Go e yí wɛ mi ɖe ɔ́ nyí nǔ ɖagbe ɖé ǎ. Mi tunwun lǒ élɔ́: “Tɔ́n kpɛví ɖé wɛ nɔ fɔ́n linfín e è nya ɔ́ bǐ.”

7 Mi ɖe hwɛhuhu sín tɔ́n xóxó énɛ́ ɔ́ síin, bónú mi ná húzú linfín nyinya yɔ̌yɔ́; ɖó linfín nyinya yɔ̌yɔ́ e mɛ è ma dó tɔ́n ǎ é wɛ mi nyí; ɖó Klísu e nyí Dǐndínwáyixwe mǐtɔn sín lɛ̌ngbɔ́ví ɔ́, è ko sɔ́ ɛ dó sá vɔ̌ ná.

8 Hǔn, mi bo nú mǐ ná ɖu xwe mǐtɔn; mǐ ní ma ka zé wɔ̌xúxú e mɛ è dǒ tɔ́n xóxó e nyí hwɛhuhu sín tɔ́n kpódó agalilɛ sín tɔ́n kpán ɔ́ dó ɖu ná ó; lo ɔ́, mǐ ní zé wɔ̌xúxú e mɛ tɔ́n má ɖe ǎ é dó ɖu ná; wɔ̌xúxú énɛ́ ɔ́, mǐmɛ́ kpódó nǔgbó kpó sín wɔ̌xúxú wɛ é nyí.

9 Un byɔ́ mi ɖo wěma e un sɛ́ dó mi ɔ́ mɛ ɖɔ mi ní ma kpé nǔ ɖěbǔ xá agalɛtɔ́ lɛ́ɛ ó.

10 Ényí agalɛtɔ́ nǔjlómɔnɔ, ajotɔ́ abǐ vodúnsɛntɔ́ gbɛ élɔ́ tɔn lɛ́ɛ bǐ kpaa xó ɖɔ wɛ un ɖe ǎ. Ényí mi gbɛ́ ná hɔn nú mɛ énɛ́ lɛ́ɛ bǐ ɔ́, gbɛ ɔ́ mɛ jɛ́n mi ná tɔ́n sín.

11 Nǔ e ɖɔ nú mi wɛ un ɖe ɔ́ wɛ nyí ɖɔ mi ní ma kpé nǔ ɖěbǔ xá mɛ e ɖɔ émí nyí klísusɛntɔ́, bó ka nɔ ɖo aga lɛ wɛ, abǐ mɛ nú jló wɛ, abǐ vodún sɛn wɛ, abǐ nǔyá ɖɔ nú mɛ wɛ, ahan nu mú wɛ, abǐ ajo ja wɛ é ó. Mi ɖó ná ɖu nǔ xá mɛ mɔ̌hunkɔtɔn lɔ vɔ́vɔ́ ǎ.

12-13 Mɛ e ma nyí klísusɛntɔ́ ǎ lɛ́ɛ ɔ́, nyɛ wɛ ná ɖɔ hwɛ xá yě ǎ; Mawu wɛ ná ɖɔ hwɛ xá yě. Lo ɔ́, mi ɖó ná ɖɔ hwɛ xá mɛ e nyí agunví mitɔn lɛ́ɛ é ǎ cé? Lě e Mawuxówéma ɔ́ ɖɔ gbɔn ɔ́: “Mi ɖe mɛdídá ɔ́ sín tɛ́ntin mitɔn.”

La Bible en langue fon © Alliance Biblique du Bénin, 2012.

Bible Society of Benin
Lean sinn:



Sanasan