1 Kɔlɛ́ntinu 3 - MAWUXÓWÉMA

Azɔ̌watɔ́ Mawu tɔn

¹ Nɔví lɛ́ɛ mi, nǔgbó ɔ́, un kpé wú bó ɖɔ xó nú mi lě e è nǎ ɖɔ xó nú mɛ e ɖó Yɛ Mawu tɔn gbɔn é ǎ: lě e è nǎ ɖɔ xó nú mɛ e nyí gbɛ élɔ́ tɔn lɛ́ɛ gbɔn ɔ́ wɛ un ɖɔ xó nú mi gbɔn. Lě e è nǎ ɖɔ xó nú mɛ e nyí vǐ yɛ̌yɛ́ ɖo bǔ e yě ɖe xá Klísu ɔ́ mɛ lɛ́ɛ gbɔn ɔ́ wɛ un ɖɔ xó nú mi gbɔn.

² Anɔ̌sin wɛ un ná mi; é nyí nǔɖuɖu syɛ́nsyɛ́n wɛ ǎ, ɖó mi sixú kpé wú ǎ; bɔ káká jɛ égbé din ɔ́, mi tlɛ ko sixú kpé wú ǎ.

³ Đó mi lɛ́ kpo ɖo gbɛ zán wɛ gbɛtɔ́ gbɛ élɔ́ tɔn lɛ́ɛ ɖɔhun. Hwenu e mi lɛ́ kpo ɖo wǔhwan wɛ, bó ɖo jlɛ ɖɔ wɛ ɖo miɖée tɛ́ntin ɔ́, ɖiɖe xlɛ́ wɛ mi ɖe ɖɔ gbɛ élɔ́ tɔn wɛ émí nyí nɛ́ ǎ cé? Mi ɖo nǔ wa wɛ gbɛtɔ́ kpaa lɛ́ɛ ɖɔhun.

⁴ Ée mɛ mitɔn ɖě nɔ ɖɔ: “Un nyí Pɔ́lu tɔn”, bɔ mɛɖěvo nɔ ɖɔ: “Un nyí Apolosu tɔn” ɔ́, nǔ wa wɛ mi ɖe gbɛtɔ́ kpaa lɛ́ɛ ɖɔhun nɛ́ ǎ cé?

⁵ Nǔ e un ná kanbyɔ́ mi ɔ́, mɛ̌ ka nyí Apolosu? Mɛ̌ ka nyí Pɔ́lu? Azɔ̌watɔ́ Mawu tɔn e jí Mawu ylɔ́ mi gbɔn, bɔ mi ɖi nǔ ɔ́ wɛ mǐ nyí kpowun. Azɔ̌ e Aklúnɔ zɔ́n ɖokpó ɖokpó mǐtɔn ɔ́ wa wɛ mǐ ɖe.

⁶ Nyɛ wɛ tun atín ɔ́, bɔ Apolosu hú sin ná; Mawu wɛ ka ná bɔ é su.

⁷ Hǔn, mɛ e tun atín ɔ́, kpódó mɛ e hú sin ná ɔ́ kpán ɔ́, yě nyí nǔtí ǎ. Mawu wɛ nyí nǔ bǐ; ɖó é wɛ bló bɔ atín ɔ́ su.

⁸ Mɛ e tun atín é kpódó mɛ e hú sin ná é kpó ɔ́, zɛ̌nzɛ̌n wɛ yě ɖe; mɛ ɖokpó ɖokpó ná mɔ lě e é wa nǔ gbɔn ɔ́ sín ajɔ yí ɖo Mawu sí.

⁹ Đó azɔ̌ wa ɖó kpɔ́ wɛ mǐ ɖe nú Mawu, bɔ midɛɛ lɛ́ɛ ka nyí gle Mawu tɔn, bó lɛ́ nyí xɔ Mawu tɔn.

¹⁰ Un wa azɔ̌ ɖi xɔmɛtɔ́gán e nǔnywɛ́ kpé é ɖɔhun, bó dó xɔ ɔ́ do ganjí, lě e Mawu ná nǔníná tɔn mì gbɔn é. Din ɔ́, mɛɖěvo ɖo dǒ mɛ ɖ'é jí wɛ. Amɔ̌, mɛ ɖokpó ɖokpó ka ɖó ná hɛn ayixa dó lě e é ɖo dǒ mɛ ɖ'é jí gbɔn wɛ é wú.

¹¹ Đó è ko dó dǒ ɔ́ do; Jezu Klísu wɛ nyí dǒ dodó énɛ́ ɔ́, bɔ mɛ ɖěbǔ sɔ́ sixú dó dǒ ɖěvo do ǎ.

¹² Mɛ ɖé lɛ́ɛ ná sɔ́ siká abǐ kpatágan, abǐ awǐnnya xɔ akwɛ́ dó mɛ dǒ ɖó dǒ dodó ɔ́ jí; mɛɖěvo lɛ́ɛ ka ná zán atín, abǐ sɛ, abǐ gběhan.

¹³ Amɔ̌, Aklúnɔ sín azǎn ɔ́ wɛ ná ɖe lě e azɔ̌ mɛ ɖokpó ɖokpó tɔn ɖe gbɔn é xlɛ́, bɔ é ná jɛ wěxo. Nǔgbó ɔ́, azǎn énɛ́ ɔ́ ná wá kpó myɔ kpó, bɔ myɔ ná gbéjé azɔ̌ e mɛ ɖokpó ɖokpó wa ɔ́ kpɔ́n, bó ná ɖe azɔ̌ alɔkpa e é nyí ɔ́ xlɛ́.

¹⁴ Ényí azɔ̌ e mɛɖé wa ɖó dǒ dodó ɔ́ jí ɔ́ kpo ɖo te ɔ́, é ná mɔ ajɔ yí ɖo Mawu sí.

¹⁵ Ényí azɔ̌ mɛɖé tɔn ka fyɔ́ ɖo myɔ ɔ́ mɛ ɔ́, mɛ énɛ́ ná mɔ ajɔ ɖěbǔ yí ɖo Mawu sí ǎ; é ɖo mɔ̌ có mɛ énɛ́ ɖésú ná mɔ hwlɛngán mɛ e xo myɔ ɔ́ zlɛ́, bó gán é ɖɔhun.

¹⁶ Mi tunwun ɖɔ sinsɛnxɔ Mawu tɔn wɛ émí nyí, bɔ Yɛ Mawu tɔn ɖo émí mɛ.

¹⁷ Nǔgbó ɔ́, ényí mɛɖé mu sinsɛnxɔ Mawu tɔn ɔ́, Mawu ná gblé gbɛ dó nú mɛ énɛ́; ɖó sinsɛnxɔ Mawu tɔn ɔ́, nǔ mímɛ́ wɛ é nyí; mi wɛ ka nyí sinsɛnxɔ tɔn.

¹⁸ Mɛɖé bó ma blɛ́ éɖée ó. Ényí mɛɖé ɖo mi mɛ, bónú nǔ e gbɛtɔ́ lɛ́ɛ nɔ ylɔ́ ɖɔ nǔnywɛ́ ɔ́ wɛ é ɖó, lobo ɖɔ émí ɖó nǔnywɛ́ ɔ́, mɛ énɛ́ ní bó húzú xlonɔ bó ná sixú ɖó nǔnywɛ́ titewungbe ɔ́.

¹⁹ Đó nǔnywɛ́ gbɛ élɔ́ tɔn ɔ́, xlonɔxó wɛ é nyí ɖo Mawu nukɔn. Nǔgbó ɔ́, Mawuxówéma ɔ́ ɖɔ: “Nǔnywɛ́tɔ́ lɛ́ɛ ɔ́, sísɛ́ yětɔn ɖésú wɛ Mawu nɔ dó wlí yě ná.”

²⁰ Mawuxówéma ɔ́ lɛ́ ɖɔ: “Aklúnɔ tunwun ɖɔ linlin nǔnywɛ́tɔ́ lɛ́ɛ tɔn kún nyí nǔtí ó.”

²¹ Hǔn mɛ ɖěbǔ ɖó ná tɛ afɔ ayǐ ɖó gbɛtɔ́ wú ǎ; ɖó nǔ bǐ wɛ nyí mitɔn:

²² Pɔ́lu oo, Apolosu abǐ Sefási oo, wɛ̌kɛ́ oo, gbɛ oo, kú oo, din abǐ sɔ e jǎwe ɔ́ oo, nǔ bǐ wɛ nyí mitɔn.

²³ Amɔ̌ midɛɛ lɛ́ɛ ɔ́, Klísu tɔn wɛ mi nyí, bɔ Klísu nyí Mawu tɔn.