1 Kɔlɛ́ntinu 15 - MAWUXÓWÉMA

Klísu fɔ́n sín kú

¹ Nɔví ce lɛ́ɛ mi, din ɔ́, un jló ná flín Wɛn Ɖagbe ɔ́ mi; Wɛn Ɖagbe e un jlá mi, bɔ mi yí, lobɔ nǔɖiɖi mitɔn tɛ́ d'é wú syɛ́nsyɛ́n é.

² É jí wɛ Mawu hwlɛ́n mi gán gbɔn; ényí mi hɛn dó ayi mɛ lě e un kplɔ́n mi gbɔn ɔ́ nɛ́; é ma nyí mɔ̌ ǎ ɔ́, nǔ e mi ɖi ɔ́ ná nyí nǔ yǎyá.

³ Nǔ e è kplɔ́n mì ɔ́ wɛ un kplɔ́n mi, nǔkplɔ́nmɛ e ɖo tají hú ɖě lɛ́ɛ é; é wɛ nyí ɖɔ: Klísu kú ɖó hwɛ mǐtɔn lɛ́ɛ tamɛ lě e Mawuxówéma ɔ́ ko ɖɔ gbɔn é.

⁴ È ɖi i, bɔ azǎn tɔn atɔngɔ́ ɔ́ gbe ɔ́, è fɔ́n ɛ sín kú lě e Mawuxówéma ɔ́ kó ɖɔ gbɔn é.

⁵ Ée é fɔ́n ɔ́, é sɔ́ éɖée xlɛ́ Sefási, bó wá sɔ́ éɖée xlɛ́ mɛsɛ́dó wěwe lɛ́ɛ.

⁶ Énɛ́ ɔ́ gúdo ɔ́, é sɔ́ éɖée xlɛ́ nɔví ɖo Klísu mɛ afɔwe kanwe ko (500) jɛjí zɛ̌ɛ́n. Yě mɛ gěgé lɛ́ kpo ɖo gbɛ, mɛ ɖě ká kó kú.

⁷ Énɛ́ ɔ́ gúdo ɔ́, é sɔ́ éɖée xlɛ́ Jaki, bó wá sɔ́ éɖée xlɛ́ mɛsɛ́dó lɛ́ɛ bǐ.

⁸ Ée é sɔ́ éɖée xlɛ́ yě bǐ ɔ́, é wá sɔ́ éɖée xlɛ́ nyɛ lɔmɔ̌ gbɔn gǔdo; có mɛ e azǎn ma sɔgbe bɔ è ji ɖɔhun wɛ un cí.

⁹ Nǔgbó ɔ́, nyɛ wɛ nyí mɛ e gbɔn gǔdo bǐ ɖo mɛsɛ́dó lɛ́ɛ mɛ é. Ényí è nǎ ɖɔ nǔgbó ɔ́, é jɛ xá ɖɔ è nǐ ylɔ́ mì ɖɔ mɛsɛ́dó ǎ, ɖó un dó ya nú agun Mawu tɔn.

¹⁰ Amɔ̌, gbɔn nyɔ̌ná Mawu tɔn gbla mɛ ɔ́, un húzú mɛ e un nyí din é, bɔ nyɔ̌ná e è kɔn dó jǐ ce ɔ́ nyí nǔ yǎyá ǎ: é nyɔ́ wa ɔ́, un wa azɔ̌ hú mɛsɛ́dó ɖě lɛ́ɛ bǐ. È nǎ ɖɔ nǔgbó ɔ́, é nyí nyɛ wɛ ɖo azɔ̌ wa wɛ ǎ; lo ɔ́, nyɔ̌ná Mawu tɔn e ɖo kpɔ́ xá mì ɔ́ wɛ.

¹¹ Énɛ́ ɔ́, ényí nyɛ wɛ jlá Wɛn Ɖagbe ɔ́ mi oo, abǐ yědɛɛ lɛ́ɛ wɛ jlá mi oo, Wɛn Ɖagbe e jlá wɛ mǐ ɖe ɔ́ nɛ́; nǔ e mi ka ɖi nǔ ná ɔ́ nɛ́.

Mǐ ná fɔ́n sín kú

¹² Mǐ ɖo jlǎjlá wɛ ɖɔ Mawu fɔ́n Klísu sín kú; ée é nyí mɔ̌ ɔ́, nɛ̌ mɛɖé lɛ́ɛ ka ná ɖo mi mɛ, bó ná sixú ɖɔ mɛkúkú lɛ́ɛ kún ná fɔ́n ó gbɔn?

¹³ Ényí mɛkúkú lɛ́ɛ ma nɔ fɔ́n nǔgbó ǎ hǔn, Klísu lɔmɔ̌ fɔ́n sín kú ǎ nɛ́.

¹⁴ Ényí Klísu ma ka fɔ́n sín kú ǎ hǔn, Wɛn Ɖagbe e jlá wɛ mǐ ɖe ɔ́, nǔ yǎyá wɛ, bɔ nǔ e mi lɔmɔ̌ ɖi é ka nyí nǔ yǎyá.

¹⁵ Ényí mɛkúkú lɛ́ɛ má nɔ́ fɔ́n nǔgbó ǎ ɔ́, è nǎ mɔ mǐ dó mɔ kúnnu-agɔɖenúmawutɔ́; ɖó mǐ ɖe kúnnu n'i ɖɔ é fɔ́n Klísu sín kú; ényí mɛkúkú lɛ́ɛ ma nɔ́ fɔ́n ǎ ɔ́, hǔn nǔ nyí mɔ̌ ǎ nɛ́.

¹⁶ Đó nú mɛkúkú lɛ́ɛ ma nɔ fɔ́n sín kú ǎ hǔn, Klísu lɔ fɔ́n sín kú ǎ nɛ́.

¹⁷ Ényí Klísu ma ka fɔ́n sín kú ǎ hǔn, nǔɖiɖi mitɔn ɔ́, nǔ yǎyá wɛ é nyí, bɔ mi lɛ́ kpo ɖo hwɛ mitɔn lɛ́ɛ mɛ.

¹⁸ Ényí Klísu ma ka fɔ́n sín kú ǎ hǔn, nɔví ɖo Klísu mɛ e kú lɛ́ɛ ɔ́, yě lɔmɔ̌ dɔn.

¹⁹ Ényí nukún e ɖó Klísu wɛ mǐ ɖe ɔ́, gbɛ élɔ́ mɛ kɛ́ɖɛ́ jɛ́n é nyɔ́ ná ɔ́, nǔ mǐtɔn ná blá wǔ hú gbɛtɔ́ lɛ́ɛ bǐ tɔn.

²⁰ Nǔgbó ɔ́, Klísu wɛ nyí mɛ nukɔntɔn e fɔ́n sín kú é, bó dó ná gǎnjɛwú mǐ ɖɔ mɛ e kú lɛ́ɛ lɔmɔ̌ ná fɔ́n.

²¹ Đó lě e kú gbɔn gbɛtɔ́ ɖokpó jí wá ɔ́, mɔ̌ jɛ́n fínfɔ́n sín kú mɛkúkú lɛ́ɛ tɔn gbɔn gbɛtɔ́ ɖokpó jí wá é nɛ́.

²² Lě e gbɛtɔ́ bǐ nɔ kú ɖó bǔ e yě ɖe xá Adámu ɔ́ wútu ɔ́, mɔ̌ ɖokpó ɔ́, mɛ e ɖo bǔ xá Klísu lɛ́ɛ bǐ ɔ́, Mawu ná fɔ́n yě sín kú.

²³ Amɔ̌, mɛ ɖokpó ɖokpó ná nɔ tɛn é ɖésúnɔ tɔn mɛ; Klísu wɛ jɛ nukɔn nú mɛ bǐ, bɔ mɛ e nyí étɔn lɛ́ɛ ná bɔ dó wǔ tɔn hwenu e é ná wá dó é.

²⁴ Klísu ná gblé gbɛ dó nú gǎn lɛ́ɛ bǐ, bó ná gbídí acɛkpikpa lɛ́ɛ bǐ kpó hlɔ̌nhlɔ́n e ɖo yɛswímɛ lɛ́ɛ bǐ kpó, bó ná sɔ́ axɔ́súɖuɖu ɔ́ dó alɔ mɛ nú Mawu Tɔ́ ɔ́. Énɛ́ ɔ́ gúdo ɔ́, gbɛ ná vɔ.

²⁵ Đó Klísu ɖó ná ɖo axɔ́sú ɖu wɛ káká bɔ Mawu ná ɖu ɖo kɛntɔ́ lɛ́ɛ bǐ jǐ, bó ná bɛ́ yě dó afɔ tɔn lɛ́ɛ glɔ́.

²⁶ Kɛntɔ́ gúdo tɔn e sín kún è nǎ sú dó ɔ́ wɛ nyí kú.

²⁷ Nǔgbó ɔ́, Mawuxówéma ɔ́ ɖɔ: “Mawu bɛ̌ nǔ bǐ dó afɔ tɔn lɛ́ɛ glɔ́.” Lo ɔ́, è ɖǒ ná mɔ nukúnnú jɛ wú ɖɔ “nǔ bǐ” énɛ́ e è ɖɔ ɔ́, Mawu e sɔ́ nǔ bǐ dó Klísu glɔ́ ɔ́ kún ɖ'é mɛ ó.

²⁸ Hwenu e Mawu ná hwíhwɛ́ nǔ bǐ ɖó Klísu glɔ́ ɔ́, é ɖésú Vǐ ɔ́ ná hwíhwɛ́ éɖée dó Mawu e hwíhwɛ́ nǔ bǐ dó glɔ́ tɔn ɔ́ glɔ́; énɛ́ ɔ́, Mawu ná nyí nǔ bǐ nú mɛ bǐ.

²⁹ Mi lɛ kpɔ́n nǔ dó yě mɛ e nɔ lɛ yɛhwesin dó mɛkúkú lɛ́ɛ tamɛ lɛ́ɛ wú; ényí mɛkúkú lɛ́ɛ ma nɔ fɔ́n nǔgbó ǎ ɔ́, ani ɖó nukún wɛ yě mɛ e nɔ wa mɔ̌ lɛ́ɛ ka ɖe? Aniwú yě ká nɔ lɛ yɛhwesin ɖó ta yětɔn mɛ?

³⁰ Bɔ mǐ lɔmɔ̌, aniwú mǐ ka nɔ jó miɖée dó nú afɔkú hwebǐnu?

³¹ Nɔví lɛ́ɛ mi, ayǐhɔ́ngbe ayǐhɔ́ngbe ɔ́, un nɔ ɖibla kú: susu e un nɔ mɔ ɖó mi wú ɖo kɔnɖókpɔ́ e mǐ ɖó xa Aklúnɔ mǐtɔn Klísu Jezu ɔ́ mɛ ɔ́ wú wɛ un ɖo mɔ̌ ɖɔ nú mi wɛ.

³² Ényí walɔ gbɛtɔ́ lɛ́ɛ tɔn wú wɛ un fun ahwan xá gběkanlin lɛ́ɛ ɖo Efɛ́zi fí ɔ́, le tɛ́ ká ɖ'é mɛ nú mì? Ényí mɛkúkú ma nɔ fɔ́n ǎ hǔn, mi gbɔ bo wá nú mǐ ní bló nǔ e lǒ élɔ́ ɖɔ é: “Mǐ ní ɖu nǔ, bó nu ahan, ɖó sɔ ɔ́, mǐ ná kú.”

³³ Mi ma blɛ́ miɖée ó: “Gbɛ̌ nyanya lɛ́ɛ ɔ́, walɔ ɖagbe e è ɖǒ ɔ́ wɛ yě nɔ hɛn gblé.”

³⁴ Mi byɔ́ miɖée mɛ lě e é jɛ xá gbɔn é, bó gɔn hwɛ hu. Mɛ ɖé lɛ́ɛ ɖo mi mɛ, bó tunwun Mawu ǎ; winnyá ní hu mi.

Agbaza mɛ e ná fɔ́n sín kú lɛ́ɛ tɔn

³⁵ Mɛ ɖé ka kanbyɔ́ ɖɔ: “Nɛ̌ è ka ná fɔ́n mɛkúkú lɛ́ɛ gbɔn? Agbaza alɔkpa tɛ́ wɛ yě ná ɖó?”

³⁶ Xlonɔ wɛ nú we! Nú a sɔ́ jinukún ɖé dó kɔ́ glɔ́ ɔ́, nú jinukún énɛ́ ma kú ǎ ɔ́, é sixú ná gbɛ atín ǎ.

³⁷ Jinukún yǎyá ɖé kpowun wɛ a sɔ́ dó kɔ́ glɔ́; é sixú nyí jinukún e nɔ ná yovólinfín é, abǐ jinukún alɔkpa ɖěvo; é nyí agbaza e jinukún ɔ́ ná ɖe tɔ́n ɔ́ wɛ a sɔ́ dó kɔ́ glɔ́ ǎ.

³⁸ Mawu ná agbaza e jló e ɔ́ jinukún énɛ́; agbaza e nyí jinukún ɖokpó ɖokpó tɔn ɔ́ wɛ Mawu nɔ ná ɛ.

³⁹ Agbaza lɛ́ɛ bǐ nyí nukún mɛ ɖokpó ɔ́ ǎ; gbɛtɔ́ lɛ́ɛ ɖó agbaza alɔkpa vo; kanlin lɛ́ɛ ɖó alɔkpa ɖěvo; xɛ lɛ́ɛ ɖó alɔkpa ɖěvo, bɔ hweví lɛ́ɛ ɖó alɔkpa ɖěvo.

⁴⁰ Agbaza sɛ́xwé tɔn lɛ́ɛ lɔ tíin, bɔ ayǐkúngban jí tɔn lɛ́ɛ lɔ tíin; agbaza sɛ́xwé tɔn lɛ́ɛ sín ɖɛkpɛ gbɔn vo nú agbaza ayǐkúngban jí tɔn lɛ́ɛ.

⁴¹ Hwesivɔ́ ɖó ɖɛkpɛ é ɖésúnɔ tɔn; sun ɖó ɖɛkpɛ é ɖésú tɔn vo; sunví lɛ́ɛ ɖó yětɔn vo; ɖo sunví lɛ́ɛ ɖésú tɛ́ntin ɔ́, sunví ɖě sín ɖɛkpɛ nɔ gbɔn vo nú ɖě tɔn.

⁴² Hwenu e mɛkúkú lɛ́ɛ ná fɔ́n ɔ́, lě e é ná nyí gbɔn ɔ́ nɛ́. Hwenu e è sɔ́ agbaza ɔ́ dó kɔ́ glɔ́ ɔ́, nǔ nyinyɔ wɛ é kó nyí; hwenu e é ka ná lɛ́ wá gbɛ ɔ́, é sɔ́ ná nyí nǔ nyinyɔ ǎ.

⁴³ Hwenu e è sɔ́ ɛ dó kɔ́ glɔ́ ɔ́, é ná nylá kan; é ná ɖó gǎn ɖé ǎ; hwenu e é ka ná fɔ́n sín kú ɔ́, é ná nyɔ́ ɖɛkpɛ, bó ná ɖó hlɔ̌nhlɔ́n.

⁴⁴ Hwenu e è sɔ́ ɛ dó kɔ́ glɔ́ ɔ́, agbaza ayǐkúngban jí tɔn wɛ é nyí; hwenu e é ka ná fɔ́n sín kú ɔ́, agbaza sɛ́xwé tɔn wɛ é ná nyí. Ée agbaza ayǐkúngban jí tɔn tíin ɔ́, agbaza sɛ́xwé tɔn lɔ ɖó ná tíin.

⁴⁵ Nǔgbó ɔ́, Mawuxówéma ɔ́ ɖɔ: “Adámu e nyí gbɛtɔ́ nukɔntɔn ɔ́, húzú mɛ gbɛɖe”; Adámu gúdo tɔn ɔ́, yɛ e nɔ ná gbɛ mɛ é wɛ.

⁴⁶ Nǔ e nyí Yɛsinsɛn tɔn ɔ́ wɛ wá dó nukɔn ǎ, ayǐkúngban jí tɔn ɔ́ wɛ jɛ nukɔn, bɔ Yɛsinsɛn tɔn ɔ́ nyí wegɔ́ ɔ́.

⁴⁷ Gbɛtɔ́ nukɔntɔn ɔ́, kɔ́gúdu ayǐkúngban jí tɔn wɛ è dǒ bló e ná; gbɛtɔ́ wegɔ́ ɔ́ ka gosín sɛ́xwé.

⁴⁸ Mɛ e nyí ayǐkúngban jí tɔn lɛ́ɛ cí mɛ e è sɔ́ kɔ́ dó bló ná é ɖɔhun; mɛ e ka nyí sɛ́xwé tɔn lɛ́ɛ cí mɛ e gosín sɛ́xwé é ɖɔhun.

⁴⁹ Lě e mǐ cí mɛ e è sɔ́ kɔ́ dó bló ná ɔ́ ɖɔhun ɔ́, mɔ̌ ɖokpó ɔ́ wɛ mǐ ná wá cí mɛ e gosín sɛ́xwé ɔ́ ɖɔhun.

⁵⁰ Nɔví lɛ́ɛ mi, nǔ e ɖɔ gbé un ja ɔ́ ɖíe: nǔ e è sɔ́ agbaza kpódó hun kpó dó bló ɔ́ sixú ɖó mǐmá ɖo axɔ́súɖuɖu Mawu tɔn mɛ ǎ; nǔ e nɔ kú ɔ́ sixú nyí jɔmakú ǎ.

⁵¹ Mi ɖótó! Un ná ɖe nǔbúdo ɖokpó xlɛ́ mi; mǐ bǐ ná kú ǎ, amɔ̌ è nǎ húzú mǐ bǐ,

⁵² ɖo cɛ́jú mɛ, ɖo nukún xwixwe ɖokpó mɛ, hwenu e kpɛn gǔdo gúdo tɔn ɔ́ ná ɖɔ nǔ é; ɖó hwenu e kpɛn ɔ́ ná ɖɔ nǔ ɔ́, mɛ e kú lɛ́ɛ ná fɔ́n, bó ná nyí mɛ e ma sɔ́ ɖó ná kú ǎ é, bɔ è nǎ húzú mǐ bǐ.

⁵³ Nǔgbó ɔ́, agbaza e nɔ nyɔ ɔ́ ɖó ná sɔ́ ée ma nɔ nyɔ ǎ ɔ́ dó; agbaza e nɔ kú ɔ́ ɖó ná sɔ́ ée ma sixú kú ǎ ɔ́ dó.

⁵⁴ Hwenu e agbaza e nɔ nyɔ́ ɔ́ ná sɔ́ ée ma nɔ́ nyɔ́ ǎ ɔ́ dó, bɔ agbaza e nɔ kú ɔ́ ná sɔ́ ée ma sixú kú ǎ ɔ́ dó ɔ́, hwe énɛ́ ɔ́ nu ɔ́, xó élɔ́ e Mawuxówéma ɔ́ ɖɔ ɔ́ ná jɛ: “È sú kú sín kún dó; è ɖu ɖo kú jí bǐ kpéte!”

⁵⁵ Mawuxówéma ɔ́ lɛ́ ɖɔ: “Kú, fítɛ́ ɖuɖéjí towe ɖe? Kú, fítɛ́ acɛ towe e a nɔ dó wa nǔ nyanya ná ɔ́ ɖe?”

⁵⁶ Kú nɔ yí acɛ tɔn e é nɔ dó wa nǔ nyanya ná ɔ́ ɖo hwɛhuhu sí, bɔ hwɛhuhu ka nɔ yí acɛ tɔn ɖo sɛ́n sí.

⁵⁷ Lo ɔ́, susu nú Mawu e nɔ ná ɖuɖéjí mǐ gbɔn Aklúnɔ mǐtɔn Jezu Klísu jí é!

⁵⁸ Énɛ́ ɔ́, nɔví ce vívɛ́ná lɛ́ɛ mi, mi syɛ́nlǐn, bó lí dǒ, lobo nɔ ɖo bǐbí dó Aklúnɔ sín azɔ̌ ɔ́ wú d'é jí wɛ ayǐhɔ́ngbe ayǐhɔ́ngbe; ɖó mi tunwun ɖɔ azɔ̌ e wa wɛ mi ɖe ɖo bǔ e mi ɖe xá Aklúnɔ mɛ ɔ́ kún ná gú mi ó.