1 Kɔlɛ́ntinu 13 - MAWUXÓWÉMA

Wǎn yíyí

¹ Ényí un ná bo nɔ ɖɔ xó dó gbɛtɔ́ lɛ́ɛ kpódó wɛnsagun Mawu tɔn lɛ́ɛ kpó sín gbe mɛ, bó ma ka ɖó wǎn yíyí ǎ ɔ́, xó ce lɛ́ɛ ná cí hǔn abǐ gan e xo wɛ è ɖe kpowun, bɔ é ma ɖo xó ɖě ɖɔ wɛ ǎ é ɖɔhun.

² Ényí un ná bo ɖó nǔníná e nɔ yí wɛn ɖo Mawu sí, bó nɔ dó ɔ́, un ná bó mɔ nukúnnú jɛ nǔbúdo lɛ́ɛ bǐ wú, bó ná bó tunwun nǔ bǐ ɔ́, un ná bó ɖó nǔɖiɖi e sixú sɛ tɛn nú só ɔ́, bó ma ka ɖó wǎn yíyí ǎ ɔ́, un nyí nǔtí ǎ.

³ Nú un ná bó má dɔkun ce lɛ́ɛ bǐ nú mɛ, un na bo sɔ́ agbaza ce dó sá vɔ̌, bɔ è dǒ zo, bɔ un ma ka ɖó wǎn yíyí ǎ ɔ́, nǔɖé ɖ'é mɛ nú mì ǎ.

⁴ Wǎn yíyí nɔ kú hǔn; é nɔ nyɔ́ xomɛ; é nɔ jló mɛ nú ǎ; é nɔ́ jlá ajɔ̌ nú éɖée ǎ; é nɔ́ yí go ǎ.

⁵ Wǎn yíyí nɔ́ wa winnyánú ɖěbǔ ǎ; é nɔ́ ba ɖɔ émí ɖokpónɔ géé tɔn jɛ́n ná nyɔ́ ǎ; nǔɖé nɔ́ sin xomɛ n'i ǎ; é ka nɔ lɛ́ hɛn mɛ dó xomɛ ǎ.

⁶ Nǔ agɔ wiwa wɛ nɔ hun xomɛ nú mɛ e ɖó wǎn yíyí é ǎ; lo ɔ́, nǔgbó wɛ nɔ hun xomɛ n'i.

⁷ Wǎn yíyí nɔ́ zɔ́n bɔ è nɔ dɛ ɖo nǔ bǐ nu; ényí mǐ ná bó ɖo ninɔmɛ ɖěbǔ mɛ ɔ́, wǎn yíyí ɔ́ nɔ hɛn nǔɖiɖi mǐtɔn, kpó nukúnɖíɖó mǐtɔn kpó, kpódó hǔnkúkú mǐtɔn kpán ɖó te.

⁸ Wǎn yíyí ná vɔ gbeɖé ǎ; wɛn Mawu tɔn lɛ́ɛ dídó ka ná vɔ; xó ɖɔ dó gbe tɛnmɛ tɛnmɛ mɛ ná nɔ te; nǔ e mǐ tunwun ɔ́ na vɔ.

⁹ Nǔgbó ɔ́, mǐ tunwun nǔ yi kpé ǎ; mǐ ka ɖɔ Mawuxó ɔ́ yi kpé ǎ.

¹⁰ Amɔ̌, hwenu e nǔ e sɔgbe é ná wá ɔ́, nǔ e ma sɔgbe ǎ ɔ́ ná bú.

¹¹ Hwenu e un ɖo yɔkpɔ́vú ɔ́, un nɔ ɖɔ xó yɔkpɔ́vú ɖɔhun, bó nɔ lin nǔ yɔkpɔ́vú ɖɔhun, lobɔ ayixa ce nɔ mɔ nǔ yɔkpɔ́vú ɖɔhun; lo ɔ́, ée un wá húzú mɛxó ɔ́, nǔ e nyí yɔkpɔ́vú tɔn lɛ́ɛ bú.

¹² Din ɔ́, nǔ e mɔ wɛ mǐ ɖe ɔ́ cí è ɖo nǔ mɔ wɛ vlivli ɖo nǔkpɛ́n e kú ɔ́ mɛ ɖɔhun. Amɔ̌, nú é wá yá ɔ́, mǐ ná mɔ nǔ lɛ́ɛ bǐ ɖó nukún wú gannaganna; din ɔ́, un ko tunwun nǔ yi kpé ǎ; amɔ̌, nú é wá yá ɔ́, un ná tunwun nǔ yi fó lě e Mawu tunwun mǐ bǐ dégbédégbé gbɔn é.

¹³ Nǔ atɔn e ná nɔ ayǐ sɔ́yi lɛ́ɛ ɖíe: nǔɖiɖi, nukúnɖíɖó kpó wǎn yíyí kpó; wǎn yíyí wɛ ka hú gǎn yě bǐ.