Vunau ni Soro 8 - Vakavakadewa Vou kei na iVola tale eso

Cabori nei Eroni kei Iratou na Luvena

¹ A sa vosa vei Mosese o Jiova, ka kaya,

² “Mo kauti Eroni kei iratou na luvena, na nodratou i sulu, na waiwai ni veilumuti, na bulumakau me i soro ni valavala ca, kei na sipi tagane ruarua, kei na basikete madrai e sega ni vakatubu;

³ ka vakasoqoni ira vata na lewenivanua taucoko ki na katuba ni Vale ni Veitavaki.”

⁴ Sa qai cakava o Mosese me vaka a vakarota o Jiova; ka ra sa qai soqoni vata yani na lewenivanua ki na katuba ni Vale ni Veitavaki.

⁵ A sa kaya vei ira na lewenivanua o Mosese, “Sa vakaoqo na ka sa vakarota o Jiova me caka.”

⁶ Sa qai kauti Eroni kei iratou na luvena o Mosese, ka vui iratou ena wai me vaka na kena i valavala.

⁷ Sa vakadaramaka vei Eroni na sote kei na kote balavu, vauca na i oro e tolona, ka daramaka vua na efoti. Sa qai vakasuluma ena i vau talei ni efoti, ka vesuka vata kina na efoti.

⁸ Sa qai vakatokara vua na i ukuuku ni lomaserena, ka vakadabera koto na Urimi kei na Cumimi ki na loma ni ukuuku ni lomaserena.

⁹ A sa vakatokara na i sala ki uluna; ia ena tutu ni sala e liu a cobara kina na i ukuuku koula, o ya na i sala vakaturaga savasava ka tabu, me vaka a vakarota vei Mosese o Jiova.

¹⁰ Sa qai taura na waiwai ni veilumuti o Mosese, ka lumuta na vale tabu kei na ka kece sa tu kina, ka vakatabuya.

¹¹ Sa kureitaka vakavitu ki na dela ni cabocabonisoro, ka lumuta na i cabocabonisoro kei na kena i yaya kecega, na beseni kei na kena i tutu, ka vakatabuya.

¹² A sa livia eso na waiwai ni veilumuti ki na ulu i Eroni, lumuta, ka vakatabui koya.

¹³ Sa qai kauti iratou mai na luve i Eroni o Mosese, ka vakaisulutaki iratou ena kote balavu, vauca na tolodratou ena i oro, ka vakaisalataki iratou ena i sala; me vaka a vakarota vei Mosese o Jiova.

¹⁴ Sa qai kauta mai o Mosese na bulumakau me i soro ni valavala ca, ka ratou tabaka na ulu ni bulumakau o Eroni kei iratou na luvena.

¹⁵ A vakamatea o Mosese ka kauta eso na kena dra, ka boroya ena nona i qaqalo na ucuna momoto ena tutu ni i cabocabonisoro, me vakatabui kina. Na vo ni dra sa sova yani ki na yavu ni cabocabonisoro. Oqo na sala sa vakatabui ka vakasavasavataki kina.

¹⁶ A sa taura o Mosese na uro kecega a tu ena gacagaca, na tikina taleitaki ni yatena, na ivi ruarua kei na kena uro, ka vakama ena dela ni cabocabonisoro.

¹⁷ Sa kauta yani na vo ni bulumakau, kei na kulina, kei na lewena, kei na wawa ni ketena, ka vakama ena taudaku ni i tikotiko me vaka sa vakarota o Jiova.

¹⁸ Sa qai kauta yani o Mosese na sipi tagane me i soro kama, ka ratou tabaka e ligadratou na ulu ni sipi tagane o Eroni kei iratou na luvena.

¹⁹ A sa vakamatea o Mosese, ka kureitaka na dra ena tutu vava ni cabocabonisoro.

²⁰ A sa musumusuka vakatikina na sipi tagane o Mosese; a sa vakama na uluna, na veitikina sa musuki, kei na kena uro.

²¹ A sa vakasavasavataka na kena gacagaca kei na yavana ena wai, ka vakama na sipi tagane taucoko ena dela ni cabocabonisoro, me vaka sa vakarota o Jiova. Na i soro kama oqo sa okati me i madrali laukana, ni sa ka boi vinaka vei Jiova.

²² Sa qai kauta mai o Mosese na i karua ni sipi tagane me vakayagataki ena cakacaka ni veibuli vakabete, ka ratou tabaka ena ligadratou o Eroni kei iratou na luvena.

²³ A sa vakamatea o Mosese, ka kauta eso na kena dra, ka boroya ki na vuso ni daliga i Eroni i matau, ena i dovidovi ni kakana ni ligana i matau, kei na i qaqalo levu ni yavana i matau.

²⁴ Sa qai kauti ratou mai ki liu na luve i Eroni o Mosese ka boroya ena dra na vuso ni daligadratou i matau, ena i dovidovi ni kakana ena ligadratou i matau, kei na i qaqalo levu ni yavadratou i matau; ka qai kureitaka na vo ni dra ena tutu vava ni cabocabonisoro.

²⁵ A sa taura na uro, na buina uro, na uro kecega sa tu ena gacagaca, na tikina taleitaki ni yatena, na ivi ruarua kei na kena uro, kei na sagana i matau.

²⁶ Sa qai taura e dua na i buli madrai mai na basikete ni madrai e sega ni vakatubu sa cabori vei Jiova, e dua na i buli madrai e caka ena waiwai, e dua na keke mamare, ka biuta ena dela ni uro kei na sagana i matau.

²⁷ Na magiti kece oqo sa soli ki na liga i Eroni kei iratou na luvena, ka ratou laveta cake me i soro yalovaki vei Jiova.

²⁸ Sa qai taura lesu tale mai ena ligadratou o Mosese, ka vakama ena dela ni cabocabonisoro vata kei na i soro kama, me i madrali ni veibuli. Na i soro kama oqo sa okati me i madrali laukana, ni sa ka boi vinaka vei Jiova.

²⁹ A sa kauta na lomasere ni sipi o Mosese me vakacabora, ka laveta cake me i soro yalovaki ena mata i Jiova; oqo na tiki ni sipi tagane ni veibuli ka i votavota i Mosese, me vaka sa vakarota o Jiova.

³⁰ Sa qai taura eso na waiwai ni veilumuti o Mosese, kei na so na dra sa tu ena dela ni cabocabonisoro, ka kureitaka vei Eroni kei na nona i sulu, ka vakakina vei iratou na luvena kei na nodratou i sulu. Ena sala oqo e ratou sa vakatabui kina vei Jiova, kei na nodratou i sulu.

³¹ Sa vosa vei Eroni kei iratou na luvena o Mosese ka kaya, “Dou kauta na lewe ni manumanu ki na katuba ni Vale ni Veitavaki, ka vakasaqara, ka kania e kea vata kei na madrai e tiko ena basikete ni madrali ni veibuli, me vaka sa vakarota o Jiova.

³² Dou qai vakama na vo ni lewe ni manumanu kei na madrai.

³³ Ia dou kakua ni lako tani mai na katuba ni Vale ni Veitavaki ka me siga vitu, me oti mada na nomudou siga ni veibuli. Ena taura taucoko e vitu na siga na nomudou buli tiko.

³⁴ Me vaka sa caka ena siga oqo, sa vakarota o Jiova me caka, me sorovaki kemudou.

³⁵ Dou tiko ga ena katuba ni Vale ni Veitavaki ena siga kei na bogi me siga vitu, ka vakayacora na veika sa vakarota vei kemudou o Jiova de dou mate, ni'u sa vakaroti me vakakina.”

³⁶ Sa cakava o Eroni kei iratou na luvena na ka taucoko sara e veivakaroti kina o Jiova vei Mosese.