Vunau ni Soro 6 - Vakavakadewa Vou kei na iVola tale eso

¹ A sa vosa vei Mosese o Jiova ka vakaroti koya ena veika oqo.

² Me na cabori e dua na i soro kevaka sai valavala ca e dua na tamata vei Jiova baleta ni sega ni vinakata me sauma lesu vua na kai nona na i vakadei ni nodrau veivoli, se butako mai vua, se lawakitaki koya,

³ se lasutaka ni sa yali e dua na i yau, ka bubuluitaka ni sega ni kunea rawa.

⁴ Ena vuku ni caka cala oqo sa vakadinadinataki, me qai vakasuka na ka sa kovea, se na ka e rawata vakailawaki, se na ka e soli vua me maroroya, se na ka e yali ka sa kunea o koya,

⁵ se na ka sa bubului kina vakailasu; me sauma taucoko sara vua na kena i taukei, ka me vakaikuritaki tale na sausaumi ena ruasagavulu na pasede.

⁶ Me qai kauta mai o koya ki vua na bete me nona i madrali ni veisausaumi vei Jiova e dua na sipi tagane se na me tagane sa sega ni ca e dua na tikina. Na kena i sau me qai vakatautaki mai na kena i vakarau sa vakadonui vakalawa.

⁷ Na bete me na vakacabora na nona i soro ni valavala ca na tamata o ya, me na vosoti kina.

Na i Soro e Vakamai Taucoko

⁸ A sa vakaroti Mosese o Jiova

⁹ me solia vei Eroni kei iratou na luvena na i vakaro ni vakacaboisoro kama. Me na vakamai tiko ena i cabocabonisoro ena bogi taucoko ka sigavaka na i soro kama, ka me waqa tikoga na kena buka.

¹⁰ Ia me tokara na bete na nona i sulu lineni, ka daramaka talega na nona tarausese lineni e loma, me qai kauta na dravusa ni i soro kama ka a kama oti ena bukawaqa, ka sova volekata na i cabocabonisoro.

¹¹ Me qai la'ki veisautaka na nona i sulu ka kauta yani na dravusa ki na taudaku ni i tikotiko ki na tikina sa vakasavasavataki.

¹² Na buka ni cabocabonisoro me waqa tikoga; me kakua sara ni boko. Me uturaka tiko na buka na bete ena veimataka, ka tuva vinaka kina na i soro kama, ka vakama kina na kena uro na i soro ni veivinakati.

¹³ Me caudre tikoga na buka ena dela ni cabocabonisoro ka me kakua sara ni boko.

¹⁴ Oqo na i vakaro ni vakacabori madrali laukana. Me na vakacabora na bete ena kawa i Eroni vei Jiova ena mata ni cabocabonisoro.

¹⁵ Me qai tara mai na i madrali laukana e dua na i luku valawa digitaki, kei na kena waiwai, kei na drega me vakamai sa tu ena i madrali, ka vakama oqo ena i cabocabonisoro me dusia na kena sa cabori taucoko sara vei Jiova. Na kubou ni vakacaboisoro oqo e ka boi vinaka vei Jiova.

¹⁶ O Eroni kei ira na bete ena kawa i Eroni me ra na kania na kena vo. Me qai buli me madrai sa sega ni vakatubu ka me laukana ena dua na tikina tabu, ena lomanibai ni Vale ni Veitavaki.

¹⁷ Na madrai oqo me kakua ni vavi vata kei na i vakatubu. Sa soli me kedra i votavota na bete; ka sa ka tabu sara, me vaka na i soro ni valavala ca kei na i madrali ni veisausaumi.

¹⁸ O ira kecega na tagane ena kawa i Eroni e rawa ni ra kania me vaka na i votavota ni kedra kakana ena veigauna kecega sa tu ki liu. Kevaka ena dua tale na tamata ena tara na kakana oqo, ena sauti koya na mana ni kakana tabu.

¹⁹ Sa solia o Jiova vei Mosese na i vakaro eso oqo

²⁰ me baleta na nona vakatikori e dua na bete ena kawa i Eroni. Ena siga ni veilumuti vakabete, me na vakacabora vei Jiova o koya e dua na kilokaramu na valawa digitaki (me vaka ga na i vakarau ni madrali laukana e cabori e veisiga), me dua na kena veimama ena mataka ka dua na kena veimama ena yakavi.

²¹ Me vavi vata kei na waiwai ena i tavuteke kaukamea; ka mo kauta mai ni sa veiwaki vinaka, ka me tikitikina lalai me vaka na i madrali laukana sa vavi, ka mo cabora me ka boi vinaka vei Jiova.

²² Oqo sai lesilesi tawa mudu vua na Bete Levu sa digitaki mai na kawa i Eroni me dau vakacabora na i soro oqo vei Jiova; na i soro oqo me vakamai taucoko sara vei Jiova.

²³ Na nona i madrali laukana e dua vei ira na bete me vakamai kece; me kakua sara ni laukana.

²⁴ A sa vakaroti Mosese o Jiova,

²⁵ me tukuna vei Eroni kei iratou na luvena na i vakaro oqo me baleta na sorovaki ni i valavala ca. Na i madrali me i soro ni valavala ca me ra vakamatei ena yasana ki na vualiku ni cabocabonisoro, o ya na yasana ka dau vakamatei kina na i soro kama. Oqo e dua na i soro tabu bibi.

²⁶ O koya na bete sa vakacabora ena vuku ni valavala ca me na kania ena dua na tikina tabu ena lomanibai ni Vale ni Veitavaki.

²⁷ Kevaka ena dua na ka se tamata e tara na kakana oqo, ena sauti koya na mana ni kakana tabu. Kevaka sa takava e dua na i sulu na dra sa kureitaki, mo savata na i sulu oqori ena dua na tikina tabu.

²⁸ Na kuro qele ka vakabutari kina na i madrali me na vorolaki, ia kevaka e vakayagataki na kuro parasa, me qai vakasavasavataki ka savui ena wai.

²⁹ Me ra kania o ira kecega na tagane ena vuvale vakabete na i madrali oqo; ni sa kakana tabu sara.

³⁰ Ia kevaka e kau yani ki na vale tabu na kena dra me vakayagataki ena vakacaboisoro me kau tani kina na i valavala ca, me kakua sara ni laukana na i madrali; ka me vakamai ga ena bukawaqa.