Vunau ni Soro 4 - Vakavakadewa Vou kei na iVola tale eso

Na i Soro ni Valavala Ca

¹ A sa kaya tale vei Mosese o Jiova

² me tukuna vei ira na Isireli ni kevaka e dua na tamata sa kitaka vakacalaka se sega ni nakita na nona cakava cala e dua na ka sa vakarota o Jiova, ia me muria na i vakaro oqo:

³ Kevaka sa vakacalaka na Bete Levu, ka vakacalai ira kina na tamata, me qai vakacabora vei Jiova e dua na luve ni bulumakau tagane sa sega na tikina e ca me i soro ni nona i valavala ca.

⁴ Me kauta mai na bulumakau tagane o koya ki na katuba ni Vale ni Veitavaki, ka tabaka na ulu ni bulumakau ena ligana, ka vakamatea na bulumakau ena mata i Jiova.

⁵ Me qai taura eso na dra ni bulumakau tagane oqo na Bete Levu, ka kauta ki na Vale ni Veitavaki;

⁶ me qai tonisua na nona i qaqalo ena dra, ka kureitaka vakavitu na dra ena mata ni lati ni vale tabu.

⁷ Me boroya na bete e dua na i wase ni dra ena ucuna momoto ena tutu ni i cabocabonisoro ni ka boi vinaka me vakamai. Me qai sova yani na vo ni dra ki na yavu ni cabocabonisoro kama, mai na katuba ni Vale ni Veitavaki.

⁸ Me kauta laivi na uro kecega ni bulumakau ka i soro ni valavala ca: na uro sa ubia na gacagaca, kei na uro kecega sa tu e loma ni gacagaca,

⁹ kei na ivi ruarua kei na tikina taleitaki ni yatena.

¹⁰ Me qai kauta na bete na kena uro kece oqo ka vakama ena dela ni cabocabonisoro ni madrali vakamai, me vaka na kena e dau qarava ena vakamai ni i soro ni veivinakati.

¹¹ Ia me qai kauta na kuli ni bulumakau, na lewena kece, na uluna, na yavana, na gacagaca, na wawa ni ketena,

¹² ka qai colata yani na bulumakau taucoko ki na taudaku ni i tikotiko ki na tikina sa vakasavasavataki ka dau sova kina na dravusa, ka vakama ena buka.

¹³ Kevaka era vakayacora e dua na cala vakacalaka na lewenivanua taucoko e Isireli, ka ra vakadinadinataka na nodra cala ni ra sa voroka na i vakaro i Jiova ni ra a sega ni nakita,

¹⁴ me ra qai cabora e dua na luve ni bulumakau tagane o ira na lewenivanua me i soro ni valavala ca ena gauna sa kilai kina na nodra cala; ka kauta ki na Vale ni Veitavaki.

¹⁵ O ira na nodra qase ni lewenivanua me ra qai tabaka na ulu ni bulumakau ena ligadra ena mata i Jiova, ka vakamatea na bulumakau e kea.

¹⁶ O koya na Bete Levu me qai kauta eso na dra ni bulumakau ki na Vale ni Veitavaki,

¹⁷ ka me tonisua na nona qaqalo ena dra, ka kureitaka vakavitu ena mata i Jiova ena mata ni i lati.

¹⁸ Me boroya talega eso na dra ena ucuna momoto ena tutu ni i cabocabonisoro e loma ni Vale ni Veitavaki ka me qai sova na vo ni dra ki na yavu ni cabocabonisoro kama ena katuba ni Vale ni Veitavaki.

¹⁹ Ia me kauta laivi mai kina na kena uro kecega, ka vakama ena dela ni cabocabonisoro.

²⁰ Me vakayacora ki na bulumakau oqo na i valavala vata ga ni kena vakarautaki na bulumakau e dau cabori me i soro ni valavala ca; ena sala oqo ena sorovaka kina na nodra i valavala ca na tamata, ka ra na vosoti kina.

²¹ Me qai colata yani na bulumakau ki na taudaku ni i tikotiko ka vakama kina me vaka ga na nona vakama na i matai ni bulumakau me baleta na nona i valavala ca; ia oqo na nodra i soro ni valavala ca na lewenivanua taucoko.

²² Kevaka sa caka cala e dua na i liuliu ka sega ni nakita, ka sa vakadinadinataka na nona voroka vakacalaka e dua na i vakaro i Jiova,

²³ me qai kauta mai e dua na me tagane sa sega ni ca e dua na tikina me nona i soro ena gauna ga sa vakatakilai kina vua na nona cala.

²⁴ Ia me tabaka na ulu ni me e ligana, ka vakamatea ena tikina sa dau vakamatei kina na i soro kama ena mata i Jiova; oqo na i soro ni valavala ca.

²⁵ Ia me kauta na bete eso na dra ni i soro ni valavala ca ena nona i qaqalo ka boroya na ucuna momoto ena tutu ni i cabocabonisoro, ka sova na vo ni dra ki na yavu ni cabocabonisoro kama.

²⁶ Me qai vakama na kena uro kecega ena dela ni cabocabonisoro me vaka sa cabori na uro ni soro ni veivinakati. Sa sorovaka kina na bete na nona bula na i liuliu, ka na vosoti kina.

²⁷ Kevaka sa caka cala ka sega ni nakita e dua na lewenivanua, ka vakadinadinataka na nona voroka vakacalaka e dua na i vakaro i Jiova,

²⁸ me kauta mai o koya e dua na me yalewa sa sega ni ca e dua na tikina me nona i soro ena gauna ga sa vakatakilai kina vua na nona cala.

²⁹ Me tabaka o koya na ulu ni i soro ni valavala ca ena ligana, ka vakamatea ena tikina sa dau cabori kina na i soro kama.

³⁰ Na bete me kauta eso na dra ena nona i qaqalo ka boroya ena na ucuna momoto ena tutu ni i cabocabonisoro sara e cake, ka sova na vo ni dra ki na yavu ni cabocabonisoro.

³¹ Oti o ya, me qai kauta laivi na kena uro kecega, me vaka a kau laivi na uro mai na i soro ni veivinakati; ia me vakama na bete ena dela ni cabocabonisoro me ka boi vinaka vei Jiova; ia ena sorovaki koya na bete, ena qai sega ni cudruvi kina o koya.

³² Kevaka sa kauta mai e dua na tamata e dua na sipi me nona i soro ni valavala ca, ia me yalewa ka sega ni ca e dua na tikina.

³³ Me qai tabaka o koya na ulu ni lami na i soro ni valavala ca ena ligana, ka vakamatea ena tikina sa dau vakamatei kina na i soro kama, me i soro ni valavala ca.

³⁴ O koya na bete me qai kauta eso na dra ni soro ni valavala ca ena nona i qaqalo ka boroya ena na ucuna momoto ena tutu ni i cabocabonisoro, ka sova na vo ni dra ki na yavu ni cabocabonisoro.

³⁵ Me qai kauta laivi na kena uro kecega, me vaka sa dau kau tani na uro mai na sipi ka i madrali ni i soro ni veivinakati, ka vakama ena i cabocabonisoro vata kei na madrali laukana vei Jiova. Ena ka oqo sa sorovaka kina na bete na i valavala ca sa cakava na tamata oqo, ka sa vosoti kina.