Vunau ni Soro 25 - Vakavakadewa Vou kei na iVola tale eso

Na i Kavitu ni Yabaki

¹ E a vosa vei Mosese o Jiova mai na Ulunivanua o Saineai ka vakaroti koya

² me tukuna vei ira na Isireli na i vakaro oqo. Ni o ni sa yaco ki na vanua au sa solia vei kemuni, mo ni qai vakarokorokotaki Jiova ena nomuni vakatabuya na vanua ka kakua ni teivaka na qele ena i kavitu ni yabaki kece sara.

³ Me ono na yabaki na nomuni teivaka tiko na nomuni veiwere, ka samaka na nomuni veivaini, ka kumuna vata na vua ni qele.

⁴ Ia ena kena i kavitu ni yabaki me sa yabaki ni vakatatabu ni qele; oqo e dua na yabaki sa cabori vei Jiova. Mo ni kakua ni kaburaka kina na sila ena nomuni veiwere, se samaka na nomuni veivaini.

⁵ Mo ni kakua mada ga ni tatamusuki ena veisila sa tubu ga vakaikoya, ka kakua talega ni kumukumuna vata na qerepi mai na nomuni veivaini sa sega tu ni samaki; oqo sa yabaki ni vakatatabu ni qele me vakacegu kina na vanua.

⁶ Ia sa na kemuni kakana ga na ka sa tubu ena gauna sa vakatabui kina na qele; o na kana kina o iko, na nomu bobula tagane, na bobula yalewa, na nomu tamata cakacaka kei na vulagi sa tiko kei iko:

⁷ kei na kedra na manumanu yava i va, kei na manumanu kila talega ka ra tiko ena nomu vanua; na veika kecega sa tubu kina me laukana.

Yabaki ni Veivakalesui (Jiupili)

⁸ Mo ni cakacakataka mada na kena vakavitutaki na veiyavitu na yabaki, ka kena i soqoni taucoko e 49 na yabaki.

⁹ Ia ena i katini ni siga ni kavitu ni vula, na Siga ni Veisorovaki, mo ni lesia e dua na tamata me qai uvuca vakadomoilevu na davui ena veiyasana kecega.

¹⁰ Mo ni vakatabuya na i kalimasagavulu ni yabaki, ka kacivaka yani na sereki kei na veivagalalataki ni vanua kei ira na lewenivanua era tiko kina. Oqo na yabaki ni jiupili vei kemuni, ka me vakalesui tale kina na veika sa voli ki vua na kena i taukei taumada se o ira na nona kawa, ka me vakalesui tale ki na nona vuvale o koya yadua sa volitaki vakabobula.

¹¹ Mo ni kakua ni kaburaka na sila ena loma ni yabaki o ya, se tamusuka na ka sa tubu mai vakaikoya, se me vetia na i soso qerepi mai na werenivaini sa sega ni samaki.

¹² Na yabaki taucoko oqo mo ni vakarokorokotaka me ka tabu vei kemuni; ka mo ni kania ga na ka sa tubu ga vakaikoya mai na i teitei.

¹³ Ena yabaki ni jiupili oqo, mo ni vakalesuya na veika kece sa voli ki vua na tamata ka a kena i taukei e liu.

¹⁴ Me kakua ni lawakitaki na veivoli kevaka e dua na Isireli sa volitaka e dua na ka vua na kai nona, se volia mai vua e dua na ka.

¹⁵ Na i sau ni veivoli me na vakatautaki ki na i wiliwili ni yabaki ni tatamusuki sa vo ni bera ni yacovi yani na Yabaki ni Veivakalesui.

¹⁶ Kevaka sa levu na yabaki, me vakalevutaki vakakina na kena i voli; ia ke sa vo ga e vica na yabaki, me lailai sobu talega na kena i voli, baleta ni sa volitaka ga vei iko o koya na i wiliwili ni veika e tamusuki rawa mai na qele.

¹⁷ Mo ni kakua ni cakava vakalawakica, ia mo ni rerevaka ga na nomuni Kalou; Ni sai au o Jiova na nomuni Kalou.

¹⁸ Mo ni muria na noqu i vakaro, ka qarauna mo ni vakabauta na noqu lewa ka cakava, o ni na qai tiko vinaka kina ena nomuni vanua.

¹⁹ Na qele ena qai vuataka na kena vuata na kena vula, ia o ni na kana ka mamau ka tiko dei kina.

²⁰ Kevaka o ni sa kaya, A cava li na ka me keimami kania ena kena i kavitu ni yabaki, ni keimami sa sega ni kaburaka na sila se kumuna vata na neimami vuata?

²¹ Au na sobuta na noqu veivakalougatataki ki na vanua ena i kaono ni yabaki, ka na vakatubura na vuata me vaka na vuata ni tolu na yabaki.

²² Mo ni qai kakaburaki ena nomuni i teitei ena i kawalu ni yabaki, ka kania tiko na kakana o ni a tamusuka ena i kaono ni yabaki, ka na veirauti tiko na kemuni kakana oqo me yacova ni sa matua tale na ka o ni a tea vou ena i kaciwa ni yabaki.

Na Vakalesui ni i Yaya

²³ Na nomuni qele me kakua ni volitaki vakadua, baleta ni sega ni nomuni; oqo e nona na Kalou, ka kemuni sa vaka ga na vulagi sa vakatarai me vakayagataka na qele.

²⁴ Ni sa volitaki oti na qele, e kilikili me rokovi na kaukauwa kei na dodonu e tu vua na i taukei ni qele e liu me volia lesu tale na qele oqo.

²⁵ Kevaka sa dravudravua e dua, ka sa volitaka e dua na nona tiki ni qele, me qai volia lesu tale e dua na wekana voleka na ka sa volitaka yani na wekana.

²⁶ Kevaka e dua na tamata sa sega na wekana voleka me volia lesu na qele, e sa na rawa vua me volia lesu vakaikoya ga ena gauna sa sautu ka rawa-ka tale kina.

²⁷ Kevaka sa vakakina, me qai sauma lesu o koya na i sau vakailavo ni veika ena rawati mai na qele o ya ena vo ni yabaki sa koto me la'ki yacova yani na Yabaki ni Veivakalesui, ka me qai vakalesui tale kina na qele.

²⁸ Ia kevaka sa sega ni rawa ni volia lesu tale, ena taukena tiko mada ga o koya ka volia me yacova na Yabaki ni Veivakalesui. Ena yabaki o ya, ena qai vakasukai tale vua ka a taukena tu e liu.

²⁹ Kevaka e dua na tamata sa volitaka na vale sa tiko e loma ni koro vakabai, sa rawa vua me volia lesu tale ena loma ga ni yabaki e volitaka kina.

³⁰ Ia kevaka sa oti e dua vinaka na yabaki, ka sa sega ni volia lesu tale, ena qai taukena vakadua na vale o ya o koya ka sa volia vata kei ira kece na nona kawa me tawa mudu; ena sega ni suka tale ena Yabaki ni Veivakalesui.

³¹ Na veivoli e baleta na veivale ena veikoro lalai sa sega ni vakabai ena tautauvata kei na veivoli ni vanua; e tu vua na i taukei taumada ni vanua na kaukauwa kei na dodonu me volia lesu tale, ka me qai suka tale vua ena Yabaki ni Veivakalesui.

³² Ia o ira na Livai e tu vei ira na kaukauwa kei na dodonu me ra volia lesu tale na nodra veivale e nodra veikoro ena gauna ga era vinakata kina.

³³ Ia kevaka e dua vei ira na Livai sa sega ni via volia tale na vale ni sa volitaki ka tu ena koro, me qai suka tale na vale o ya ena Yabaki ni Veivakalesui baleta ni ra sa taukena vakadua na Livai na veivale oqo ena nodra veikoro ena kedra maliwa na Isireli.

³⁴ Ia na vanua sa wavokita na nodra veikoro sa tabu ni volitaki; ni sa nodra i votavota ka tawa mudu.

³⁵ Kevaka sa dravudravua mai na wekamu, ka sega ni qaravi koya rawa ena kemudou maliwa, e dodonu mo vukei koya me vaka na nomu qarava e dua na vulagi, ka me rawa kina ni tiko ga kei kemudou.

³⁶ Kakua ni o ni vakatubu i lavo mai vua, ia mo talairawarawa ga vua na Kalou ka maroroya na wekamu mo drau bula vata.

³⁷ Mo kakua ni tukuna vei ira me ra sauma lesu vei iko na i vakatubu ni lavo o a solia vakadinau vei ira, ka mo kakua talega ni vakatubu i lavo mai na kakana o volitaka vei ira.

³⁸ Sai koya oqo na i vakaro i Jiova, na nomuni Kalou, o koya ka kauti kemuni mai na vanua o Ijipita me solia vei kemuni na vanua o Kenani, ka me'u nomuni Kalou.

³⁹ Ia kevaka sa dravudravua sara vakaca e dua na wekamuni sa tiko kei kemuni ka sa soli koya me volitaki me nomu bobula, e dodonu mo kakua sara ni vakacakacakataki koya me vaka e dua na bobula.

⁴⁰ E rawa ga ni tiko vata kei iko me vaka e dua na tamata sa voli na nona cakacaka ka qaravi iko tiko me yacova na Yabaki ni Veivakalesui.

⁴¹ Ena gauna o ya, me qai biuti iko o koya kei iratou na luvena ka lesuva na nona matavuvale kei na veika era a taukena tu na nona qase.

⁴² O ira na Isireli era sa noqu tamata, au sa kauti ira tani mai na vanua o Ijipita; me ra kakua ni volitaki me vaka na bobula.

⁴³ Kakua ni valavala kaukauwa vei ira, ia mo ni rerevaki Jiova ga na nomuni Kalou.

⁴⁴ Kevaka o ni vinakata eso na bobula, ia mo ni voli ira mai na veimatanitu sa vakavolivoliti kemuni.

⁴⁵ E rawa talega mo ni volia na luvedra na kai tani se vulagi era bula maliwai kemuni. O ira na gone ka sucu ena nomuni vanua sa rawa ni okati me nomuni, ka mo ni kedra i taukei.

⁴⁶ Ena rawa mo ni maroroi ira ka me qai taukeni ira na luvemuni ena gauna mai muri. O ira oqo me okati vakabobula, ka me yacova na mate: ia, vei ira na wekamuni na Isireli, mo ni kakua ni lewai ira ena i valavala kaukauwa.

⁴⁷ “Kevaka sa vutuniyau mai e dua na kai tani, se na vulagi ka tiko kei kemuni, ia e dua vei kemuni na Isireli sa dravudravua ka volitaki koya vua na kaitani vutuniyau o ya, se vua e dua vei ira na wekana;

⁴⁸ sa tu ga na dodonu ni veivoli lesu tale vua na wekamuni o ya, ka dina ga ni sa volitaki koya oti. Sa rawa vua e dua na wekana me la'ki voli koya tale mai. E dua vei ira na tacina se tuakana,

⁴⁹ se na taci tamana, se na tavalena, se dua tale na wekana voleka ka lewe ni nona mataqali, se vuvale me voli koya lesu; ia kevaka mada ga e tu vua na i lavo, sa rawa vua me sereki koya ga vakataki koya me galala kina.

⁵⁰ Me rau cakacakataka vata vakailavo kei koya e voli koya na i sau me vakatekivu mai na yabaki ka voli kina, me yacova sara na Yabaki ni Veivakalesui. Na i lavo me kena i sere me cakacakataki mai na i wiliwili ni yabaki e tiko kina vua ka voli koya ena i sau ka saumi vua e dua na tamata cakacaka, ena i wiliwili ni yabaki o ya.

⁵¹ Ia kevaka e levu na yabaki e se vo tiko, me solia talega vakakina na i sau ni nona sereki, mai na i lavo a voli taumada kina.

⁵² Ia kevaka sa vica wale ga na yabaki sa vo tiko me yacova na Yabaki ni Veivakalesui, me rau qai cakacakataka vata, ka me solia tale o koya na i lavo me kena i sere me vaka na levu ni yabaki sa vo.

⁵³ Ena qai tiko kaya me vaka na tamata cakacaka sa saumi vakayabaki na nona cakacaka; ia na kena i taukei me kakua sara ni valavala kaukauwa vua.

⁵⁴ Ia kevaka sa sega ni voli tale ena veisala oqo, ena qai sereki ga o koya ena Yabaki ni Veivakalesui, o koya vata kei iratou na luvena.

⁵⁵ Ni ra sa noqu tamata o ira na Isireli, o ira au sa kauti ira tani mai na vanua o Ijipita: Ni sai au o Jiova, na nomuni Kalou.