Vunau ni Soro 24 - Vakavakadewa Vou kei na iVola tale eso

Na Kena Qarauni na Cina

¹ A sa vosa vei Mosese o Jiova, ka kaya:

² Mo vakaroti ira na Isireli me ra kauta mai vei iko na waiwai olive dina sa caka mai na olive digitaki me waiwai ni cina ka me caudre tikoga kina.

³ Me vakacaudreva na cina ena Vale ni Veitavaki ena veiyakavi o Eroni ka raica me caudre tikoga me yacova na mataka, oqori ena taudaku ni lati ni Kato ni Veiyalayalati, ena mata i Jiova. Oqo sai vakaro tudei me vakayacori ena veigauna kecega.

⁴ O Eroni me na vakarautaka na cina taucoko ena kedra i tutu sa caka ena koula dina, ka me yadrava na kena waqa tiko na cina ena mata i Jiova ena kena gauna.

Na Madrai sa Vakacabori Vua na Kalou

⁵ Mo ni kauta na valawa digitaki me 12 na kilokaramu, ka vavia kina e tinikarua na i buli madrai.

⁶ Mo qai tuva me yatu rua, me yaono ena i yatu yadua ena dela ni teveli koula.

⁷ Ia mo qai biuta na drega me vakamai na ferekiniseni ena maliwa ni yatu yadua me cabo vata kei na i madrali sa cabori ena bukawaqa vei Jiova.

⁸ Na madrai oqo me na daucabo tikoga ena mata i Jiova ena Siga ni Vakacecegu kecega, ena vukudra na Isireli, me ka ni veiyalayalati tawa mudu.

⁹ Na madrai oqo e kena i votavota o Eroni kei ira na luvena, ka me ra kania ena dua na vanua sa vakatabui, baleta ni oqo e tiki ni kakana tabu sara sa cabo vei Jiova me kedra na bete.

Totogi ni Vosavakacacataki o Jiova

¹⁰ E dua na tagane sa kai Ijipita o tamana ka yalewa ni Isireli o tinana, o Silomeci na yacana, ka luve i Tipiri ena mataqali o Tani. A sa lako yani ki na kedra maliwa na Isireli, ka veivala kei na dua na Isireli ena loma ni tikotiko.

¹¹ A sa vosavakacacataka na yaca i Jiova na tagane oqo. Era sa qai kauti koya yani vei Mosese,

¹² ka tauri koya vakavesu, ka waraka na loma i Jiova ena vuku ni ka me qai caka vua.

¹³ Sa qai vosa vei Mosese o Jiova ka kaya,

¹⁴ “Dou kauti koya na tagane oqori ki na taudaku ni i tikotiko. O ira kece sara era rogoci koya ni vosavakacaca me ra tabaka na uluna ena ligadra me vakadinadinataka na nona cala, ka me ra qai vakavirika ena vatu o ira na lewenivanua kecega.

¹⁵ Ia mo vosa vei ira na Isireli, ka kaya, o koya yadua sa vosavakacacataka na nona Kalou ena cudruvi ena vuku ni nona i valavala ca.

¹⁶ O koya sa vosavakacacataka na yaca i Jiova ena vakamatei vakaidina; era na vakaviriki koya ena vatu o ira na lewenivanua taucoko. Kevaka e dua na Isireli se vulagi sa vosavakacacataka na yaca tabu i Jiova, ena vakamatei vakakina.

¹⁷ “O koya sa vakamatea e dua na tamata ena vakamatei talega o koya.

¹⁸ O koya sa vakamatea e dua na manumanu yavaiva ka nona e dua tale, e dodonu me na vakaisosomitaka lesu tale vua na kena i taukei, na bula me i sosomi ni bula.

¹⁹ Kevaka e dua na tamata sa vakamavoataka tale e dua na tamata, e dodonu me na caka lesu tale vua na ka ga sa vakayacora;

²⁰ Kevaka e vakaramusutaka e dua na sui, ia me na vakaramusutaki e dua na nona sui; me i sau ni mata na mata, ka me i sau ni bati na bati. Na mavoa cava ga e vakayacora me na vakasosomitaki tale vua.

²¹ O koya e vakamatea e dua na manumanu yavaiva e dodonu me vakaisosomitaka tale; ia o koya sa vakamatea e dua na tamata ena vakamatei talega vakakina.

²² Na lawa oqo e sa okati kemuni kece, o kemuni na Isireli kei ira na vulagi ena kemuni maliwa; Ni sai au o Jiova na nomuni Kalou.”

²³ Ni sa tukuna oti o Mosese vei ira na Isireli na veika oqo, era sa qai kauti koya na tamata ka vosavakacaca ki na taudaku ni nodra i tikotiko ka vakaviriki koya ena vatu me yacova na nona mate. Era sa vakayacora na Isireli na ka sa vakarota vei Mosese o Jiova.