Vunau ni Soro 22 - Vakavakadewa Vou kei na iVola tale eso

Na Bibi ni i Soro Tabu

¹ Sa vosa vei Mosese o Jiova

² me tukuna vei Eroni kei iratou na luvena na veika oqo: “Dou doka na i madrali tabu kece era sa vakatabuya vei au na Isireli, mo dou kakua kina ni vakacacana na yacaqu tabu; Ni sai au o Jiova.

³ Kevaka e dua vei ira na nomu kawa, ni se sega mada ni savasava o koya ka sa toro volekata yani na i madrali tabu era sa vakatabuya vei au na Isireli, ena muduki tani mai mataqu na tamata o ya me kakua tale vakadua ni veiqaravi ena i cabocabonisoro: Ni sai au o Jiova.

⁴ Me kakua ni dua vei ira na luve i Eroni sa tauvi koya e dua na mate ni kuli se turi me na kana mai na i madrali tabu, me yacova ni sa vakasavasavataki. Ena vakadukadukalitaki na bete kevaka e tara e dua na ka sa vakadukadukalitaki mai na yago ni tamata mate se na tagane sa bura na nona wai-ni-vakaluveni.

⁵ Ena vakadukadukalitaki koya talega kevaka e tara e dua na manumanu se tamata tawa savasava.

⁶ O koya na bete sa vakadukadukalitaki ena sega ni savasava tikoga me yacova na yakavi, ka sega ni na kana mai na madrali tabu kevaka e se bera taumada ni sili ena wai.

⁷ Ia ni sa dromu na matanisiga, ena qai savasava o koya ka me qai kania na kakana tabu sa vakacabori, ni sa kena i votavota oqo.

⁸ Me kakua ni kania o koya na lewe ni manumanu e kau mai na manumanu sa mate ga vakataki koya se vakamatei mai vei ira na manumanu kila; oqo ena vakadukadukalitaki koya; Ni sai au o Jiova.

⁹ Me ra muria na noqu i vakaro o ira na bete kece sara, de ra na cudruvi ena vuku ni nodra caka cala ka mate kina, ni ra sa talaidredre ki na lawa bibi sa virikotori: Ni sai au o Jiova, o koya sa vakasavasavataki ira.

¹⁰ “O ira ga na lewe ni vuvale vakabete era rawa ni kania na i madrali vakatabui; ia me kakua tale ni dua tamata me kania: ke mani tiko e nona vale na bete se vakacakacakataki mai vua na bete.

¹¹ Ia kevaka sa volia na bete e dua na nona tamata bobula, se sa sucu ena loma ni nona vale na tamata bobula, sa vakatarai o koya oqo me kana.

¹² Na luvena yalewa talega na bete, o koya sa vakawati vua e dua sa sega ni bete, me kakua ni kania e dua na i votavota mai na i madrali tabu.

¹³ Ia kevaka sa yaco me yada na luvena yalewa na bete se sa biuti koya o watina, ka sega na luvena, ka sa lesu tale vei tamana, ka tiko kina me vaka ni sa goneyalewa, sa rawa ni kana mai na i votavota kei tamana; ia me kakua ga ni kania e dua sa sega ni lewe ni vuvale vakabete.

¹⁴ Ia kevaka sa kania na ka tabu e dua na tamata ni sa sega ni kila, me qai vakaisosomitaka na i madrali vua na bete, ka solia me kena i kuri e dua na i kalima ni kena i voli.

¹⁵ O ira na bete me ra kakua ni vakacacana na i soro tabu era sa cabora na Isireli

¹⁶ mai na nodra vakatara me kania e dua ka sega ni dodonu me kania; oqo ena vakavuna na nona cudruvi ena vuku ni nona caka cala na tamata oqo; Ni sai au o Jiova, o koya sa vakasavasavataka na i madrali.

¹⁷ A vosa talega vei Mosese o Jiova

¹⁸ me tukuna vei Eroni kei iratou na luvena na i vakaro oqo. Kevaka e dua vei ira na mataqali i Isireli, se na kai tani sa tiko vulagi kei ira na Isireli, sa vakacabora na nona i soro kama, ena vuku ni dua na nona bubului, se na nona i soro ena yalo vinaka, na manumanu me vakacabori vei Jiova e dodonu me savasava.

¹⁹ Me vakacabora e dua na bulumakau tagane sa sega na ka e ca kina mai na nomu qele ni bulumakau, se na sipi, se na me, mo vakadonui kina.

²⁰ Ia mo ni kakua ni cabora kevaka sa vakaleqai tu, ka ni na sega ni vakadonuya se vinakata o Jiova.

²¹ Ena gauna sa vakacabora kina vei Jiova na nona i madrali ni veivinakati e dua na tamata, ena vuku ni dua na bubului se i soro ena yalo e vinakata, na manumanu sa cabora e dodonu me sega na tikina e ca, me rawa kina ni ciqomi na i madrali oqo.

²² Kakua ni cabora vei Jiova e dua na manumanu e mataboko tu, se ramusu na yavana, se mudu e dua na tikina, se mavoa vakabalavu, se tauvi bo, se tauvi mate ni kuli. Kakua ni vakama e dua na mataqali manumanu vakaoqo ena i cabocabonisoro me i madrali vei Jiova.

²³ E rawa ni o vakacabora e dua na manumanu e vakaleqai tu me vaka e nomu i solisoli vakailoloma ga, ia ena sega ni ciqomi kevaka e cabori ena vuku ni bubului.

²⁴ Kakua ni vakacabora vei Jiova e dua na manumanu sa vakaleqai na nona soresore, ni sa drakusi tu, se mavoa, se kavoro, se kadresu. Oqo e ka vakatabui e nomuni vanua.

²⁵ Kakua talega ni cabora me nomu i madrali e dua na manumanu sa tauri mai vei ira na kai tani. Na manumanu vakaoqo era sa okati me ra vakaleqai ka sega ni vakadonui.”

²⁶ Sa vosa talega vei Mosese o Jiova, ka tukuna,

²⁷ “Ni sa sucu e dua na bulumakau, se na sipi, se na me, e dodonu me tiko voli mada kei tinana me siga vitu; ia mai na kena i kawalu ni siga ka lako yani sa rawa ni cabo ena bukawaqa me i soro vei Jiova.

²⁸ Na bulumakau yalewa, se sipi yalewa mo ni kakua ni vakamatea vata na tinana kei na luvena ena dua vata ga na siga.

²⁹ Ia ni o ni sa via vakacabora e dua na i soro ni vakavinavinaka vei Jiova, mo ni vakacabora ena i valavala mo ni vinakati ka vakadonui kina.

³⁰ Ia me laukana ena siga ga o ya, me kakua ni vo tiko me yacova na mataka ka tarava: Ni sai au o Jiova.

³¹ Mo ni vakabauta na noqu i vakaro, ka muria; Ni sai au o Jiova.

³² Dou kakua ni vakacacana na yacaqu tabu; ka me ra vakadinadinataka kece na Isireli na noqu yalosavasava ka vakarokorokotaki au. Ni sai au o Jiova, o koya sa vakasavasavataki kemuni,

³³ ka kauti kemuni tani mai na vanua o Ijipita me'u nomuni Kalou. Ni sai au o Jiova.