Vunau ni Soro 19 - Vakavakadewa Vou kei na iVola tale eso

Vakarau ni Bula Vakayalo kei na Dodonu

¹ Sa tukuna vei Mosese o Jiova

² me vosa vei ira taucoko na lewenivanua e Isireli ka kaya vei ira: “Mo ni savasava, ni'u sa savasava oi au o Jiova, na nomuni Kalou.

³ Na tamata kecega me vakarokorokotaka na tamana kei na tinana, ka mo ni vakatabuya na noqu Siga ni Vakacecegu: Sai au, o Jiova, na nomuni Kalou.

⁴ “Kakua ni golevi ira na kalou lasu, se bulia na nomuni kalou matakau mai na ka sa vakawaicalataki: Ni sai au o Jiova na nomuni Kalou.

⁵ “Ni o ni sa vakacabora e dua na i soro ni veivinakati vei Jiova, mo ni vakacabora ena i valavala me na vakadonui kina.

⁶ Me laukana ga ena siga o ni sa cabora kina, se ena mataka ka tarava; ia me vakamai ena bukawaqa na kena vo ena kena i katolu ni siga.

⁷ Kevaka sa laukana e dua na tikina ena kena i katolu ni siga, sa na ka e vakasisilataki; ena sega ni vakadonui.

⁸ Ia o ira kecega era kania era na cudruvi ena nodra caka cala, ni ra sa cakava me ka wale na ka sa tabu vei Jiova; ia na tamata o ya ena sega ni wiliki tale vakadua me noqu tamata.

⁹ Ni o ni sa tamusuka na vuata ni nomuni vanua, mo ni kakua ni tamusuka kece sara ki na tutu ni nomuni veiwere, ka kakua ni tomika na kena i vovo ni sa oti na tatamusuki.

¹⁰ Mo ni kakua ni lesu tale ki na nomuni loganivaini mo ni la'ki vetia na i soso qerepi o ni a calata, se tomika na qerepi era sa lutu tu ki na qele; mo ni laiva tu yani me nodra na dravudravua kei ira na vulagi. Sai au o Jiova, na nomuni Kalou.

¹¹ “Mo ni kakua ni butako, se cakacaka vakailasu, se vosa lasu vua e dua tale na tamata.

¹² Mo ni kakua ni bubului vakailasu ena yacaqu kevaka o ni sega dina ga ni via maroroya na veiyalayalati, baleta ni vakamadualaka na yacaqu na ka oqo. Sai au o Jiova, na nomuni Kalou.

¹³ “Mo kakua ni lawakitaka na kai nomu, se butakoci koya. Mo kakua ni vesuka na kena i sau na nomu tamata cakacaka me yacova na mataka ka tarava.

¹⁴ Mo kakua ni vosavakacacataka e dua na tamata didivara, se biuta e dua na ka ena nona sala na mataboko me tarabe kina; ia mo rerevaki koya na nomu Kalou: Sai au, o Jiova.

¹⁵ “Mo kakua ni vakatanitaka na lewa dodonu; mo kakua ni vakaduiduitaki ira na dravudravua mai vei ira na vakaitutu lelevu, ia mo tauca ga na lewa dodonu vua na kai nomu.

¹⁶ Mo kakua ni veilakoyaki voli me vaka e dua na daukakase ena kedra maliwa na kai nomu; ka mo kakua ni vakaleqa na nona bula na kai nomu: Sai au, o Jiova.

¹⁷ “Mo kakua ni cata na wekamu e lomamu. Mo vunauca vakadodonu na kai nomu, mo kakua kina ni wasea vata kei koya na nona cala.

¹⁸ Mo kakua ni via sauma lesu na ca, se yalo ca vua na wekamu: ia mo lomana na wekamu me vaka o sa lomani iko: sai au oqo o Jiova.

¹⁹ “Dou muria na noqu i vunau. Mo kakua ni laiva na nomu manumanu yava i va me la'ki vakawa vua na manumanu tani; mo kakua ni kaburaka e rua na mataqali sore ni tei ena nomu i teitei; mo kakua talega ni dara na i sulu sa caka mai na rua na mataqali i sulu.

²⁰ Kevaka e dua na yalewa bobula sa musuki me watina lailai e dua na tagane, ka se bera ni sereki vakailavo me soli kina vua na galala, ia ka rau qai veimoceri kei na dua tale na tagane, erau na cudruvi. Ia erau na sega ga ni vakamatei, baleta ni sa bera ni galala mai na bobula o yalewa.

²¹ Ia me kauta mai o tagane ka cala e dua na sipi tagane ki na katuba ni Vale ni Veitavaki me nona i madrali ni veisausaumi se i soro ni cala vei Jiova.

²² Me qai sorovaki koya na bete ena kena cabori na sipi tagane me i soro ni nona caka cala e mata i Jiova; ena qai vosoti koya kina na Kalou.

²³ Ni o ni sa yaco ki na vanua o Kenani ka teivaka na veimataqali kau vuata kecega, mo ni okata na vuanikau kece e basika ena i matai ni tolu na yabaki me ra tawa savasava. Me kakua sara ni laukana ena loma ni gauna oqori.

²⁴ Ena i kava ni yabaki, mo ni qai vakacabora na vuanikau taucoko sara me nomuni i soro ni vakavinavinaka vei au o Jiova na nomuni Kalou.

²⁵ Ia mo ni qai kania na vuadra ena kena i kalima ni yabaki. Ena vuku ni ka oqo ena qai vuavuai vinaka kina na vuadra vei kemuni. Ni sai au o Jiova na nomuni Kalou.

²⁶ Mo ni kakua ni kania e dua na lewe ni manumanu sa tu kina na kena dra. Mo ni kakua talega ni vakaluveniwai se qaravi tevoro.

²⁷ Mo ni kakua ni kotiva me mokimokiti na tutu ni vacumuni, se toroya na tutu ni kumimuni.

²⁸ Mo ni kakua ni tavalaka na yagomuni me i loloku ni mate, se samuqawetaka na yagomuni: Ni sai au o Jiova.

²⁹ “Mo ni kakua ni vakalolomataki ira na luvemuni yalewa ena nomuni soli ira yani me ra bete yalewa ni burekalou; ke o ni sa kitaka oqo, o ni na vuki tani ka qarava na veikalou tani eso ka sinai kina na vanua ena i valavala vakasisila.

³⁰ Ni vakatabuya na noqu veisiga ni vakacecegu, ka vakarokorokotaka na noqu vale tabu: Ni sai au o Jiova na nomuni Kalou.

³¹ “Kakua ni golevi ira na dauvakatevoro se daurairai, baleta ni o ni na vakadukadukalitaki kina. Ni sai au o Jiova na nomuni Kalou.

³² “Mo ni nanumi ira na qase sara, ka vakarokorokotaki ira, ka rerevaka na nomuni Kalou. Ni sai au o Jiova.

³³ “Ia kevaka sa tiko vulagi kei kemuni ena nomuni vanua eso na kai tani, mo ni kakua ni vakasosataki ira.

³⁴ Me ra okati na kai tani sa tiko vulagi kei kemuni me ra vakataki ira ga na i taukei ena kemuni maliwa; ia mo ni lomani ira me vaka o ni sa lomani kemuni. Mo ni nanuma ni o ni a tiko vulagi mai na vanua o Ijipita ena dua na gauna. Sai au ga o Jiova na nomuni Kalou.

³⁵ “Kakua ni lawakitaka e dua na tamata ena kena tukuni vakailasu na balavu ni dua na ka, se na kena bibi, se na kena levu.

³⁶ Ia me vakayagataki ga vakasavasava na i vakarau dodonu ni ka, se na kena bibi, se balavu. Ni sai au o Jiova na nomuni Kalou, o koya ka kauti kemuni tani mai na vanua o Ijipita.

³⁷ Mo ni vakabauta na noqu i vakaro kei na lawa taucoko sara. Ni sai au o Jiova.