Vunau ni Soro 15 - Vakavakadewa Vou kei na iVola tale eso

Tawa Savasava ena Vuku ni Bura

¹ Sa solia o Jiova vei Mosese kei Eroni na i vakaro oqo me tukuni vei ira na Isireli:

² Kevaka sa turi na yagonatabu e dua na tagane, sa qai sega ni savasava ena vuku ni turi oqo,

³ veitalia kevaka sa mudu se turi tikoga.

⁴ Na i mocemoce kecega e dabeca se davo kina o koya sa sega ni savasava.

⁵ O ira kecega sa tara na nona i mocemoce e dodonu me savata na nodra i sulu, ka sisili ena wai, ia era na sega ni savasava me yacova na yakavi.

⁶ O ira kece era dabeca na veika cava ga sa dabeca o koya sa turi na yagonatabu me na savata na nona i sulu, ka sisili ena wai, ia ena sega ni savasava me yacova na yakavi.

⁷ O ira kece sa tarai koya sa turi oqo e dodonu me savata na nona i sulu, ka sili ena wai; ia ena sega ni savasava me yacova na yakavi.

⁸ Kevaka sa kasivita e dua na tamata sa savasava o koya sa turi, me qai sava na nona i sulu o koya sa kasiviti, ka me sili ena wai, ia ena sega ni savasava me yacova na yakavi.

⁹ Ena i dabedabe kecega sa dabe kina o koya sa turi, ena sega ni savasava.

¹⁰ Ia o koya ga sa tara e dua na ka ena ruku ni ka sa dabe kina o koya, ena sega ni savasava me yacova na yakavi; kei koya sa colata na ka vaka oqori, me sava na nona i sulu ka sili ena wai, ia ena sega ni savasava me yacova na yakavi.

¹¹ Kevaka sa tara tale e dua na tamata o koya sa turi ni se bera mada ni se vuya na ligana ena wai, me savata o koya na nona i sulu ka sili ena wai, ia ena sega ni savasava me yacova na yakavi.

¹² Na i yaya qele sa tara o koya sa turi, me vorolaki; kei na i yaya kau kecega me sava ena wai.

¹³ Ni sa oti na nona turi, me qai wilika e vitu na siga me vakasavasavataki kina, me savata na nona i sulu, ka sili ena wai drodro, ena qai savasava.

¹⁴ Ia ena i kawalu ni siga, me qai kauta o koya e rua na soqe, se rua na ruve gone, ka lako mai ki na mata i Jiova ki na katuba ni Vale ni Veitavaki, ka solia vua na bete.

¹⁵ Ena qai vakacabora na bete e dua vei rau me i soro ni valavala ca kei na kena i karua me i soro kama. Ena sala oqo sa vakayacora kina na bete na cakacaka ni veivakasavasavataki vua sa turi.

¹⁶ Kevaka sa bura na nona wai-ni-vakaluveni e dua na tagane, me qai sili kece na yagona ena wai, ia ena sega ni savasava me yacova na yakavi.

¹⁷ Na i sulu kei na kuli-ni-manumanu kece sa takava na wai-ni-vakaluveni nei tagane e dodonu me sava ena wai, ia ena sega ni savasava me yacova na yakavi.

¹⁸ Kevaka e rau sa mocevata na tagane kei na yalewa ka sa bura na nona wai-ni-vakaluveni o tagane, ia me rau qai sili ruarua, e rau na sega ni savasava me yacova na yakavi.

¹⁹ Ia kevaka sa turudra e dua na yalewa ena vuku ni nona matenivula, ena sega ni savasava o koya me bogi vitu. Kevaka ena tarai koya e dua na tamata, ena sega ni savasava na tamata o ya me yacova na yakavi.

²⁰ Na ka kecega sa dabeca se davoca o koya ena gauna ni nona matenivula, ena sega ni savasava.

²¹ O koya sa tara na nona i davodavo e dodonu me savata na nona i sulu, ka sili ena wai; ia ena sega ni savasava me yacova na yakavi.

²² O koya sa tara e dua na ka a dabe kina o koya e dodonu me savata na nona i sulu, ka sili ena wai, ia ena sega ni savasava me yacova na yakavi;

²³ se i davodavo, se dua ga na ka sa dabeca, na tamata sa tara ena sega ni savasava me yacova na yakavi.

²⁴ Ia kevaka sa mocevata kaya e dua na tagane, ka sa tauvi koya na dra ni nona mate vakayalewa, ena sega ni savasava o koya ka bogi vitu; kei na i davodavo taucoko sa davo kina na tagane o ya, ena sega ni savasava.

²⁵ Ia kevaka sa turi dra e dua na yalewa ka bogi vuqa, ni sa sega ni kena gauna dodonu, se me turi tiko ni sa oti na nona gauna ni matenivula; na siga kecega sa turi tiko kina ena sega ni savasava o koya; me vaka ena gauna ni nona matenivula.

²⁶ Na i davodavo kecega sa davo kina o koya ena siga kece ka turi dra tiko kina, ena sega ni savasava me vaka na nona i davodavo ni a mate vakayalewa ia na ka sa dabe kina o koya na sega ni savasava, me vaka ena gauna ni nona mate vakayalewa.

²⁷ Ia o koya sa tara na veika oqori ena sega ni savasava, ka me savata na nona i sulu, ka sili ena wai, ia ena sega ni savasava me yacova na yakavi.

²⁸ Ia kevaka sa mudu na nona turi, me qai wili siga me siga vitu, ena qai savasava kina o koya.

²⁹ Ena i kawalu ni siga, me qai kauta e rua na ruve, se rua na luve ni soqe vua na bete ena katuba ni Vale ni Veitavaki.

³⁰ Me qai cabora na bete e dua me i soro ni valavala ca, kei na kena i karua me i soro kama; ia me sorovaki koya na bete ena mata i Jiova ena vuku ni turi ka sega ni savasava kina.

³¹ Ia mo ni tawasei ira tani vakaoqo na Isireli mai na ka era sega ni savasava kina, me ra kakua ni mate mai na nodra tawa savasava, ni ra sa vakadukadukalitaka na noqu vale sa tu ena kedra maliwa.

³² Oqo na i vakaro ena vuku ni tagane sa turi, kei koya sa bura na nona wai-ni-vakaluveni, ka sa sega ni savasava kina;

³³ kei koya talega na yalewa sa yacovi koya na nona matenivula; kei koya sa turi, se tagane, se yalewa, kei koya na tagane sa mocera na yalewa sa sega ni savasava.