Vosavakaibalebale 9 - Vakavakadewa Vou kei na iVola tale eso

Na Yalomatua kei na Lecaika

¹ Sa tara na nona vale na Yalomatua ka sa cakava e vitu na kena duru.

² Sa mokuta e dua na manumanu me kena magiti, a sa ulia ki na waini na i saluwaki eso, a sa qai vakarautaka na teveli.

³ Sa talai ira yani na nona goneyalewa dauveiqaravi me ra la'ki veisureti mai na veiyasa ni koro kece, ka me ra kacivaka yani:

⁴ Ni lako mai, oi kemuni na tamata lecaika! A sa kaya vei ira na yalowai o koya,

⁵ Ni lako mai, mo ni mai vakayagataka na magiti au sa vakarautaka kei na waini au sa ulia.

⁶ Ni laivi ira tu yani na tamata lecaika, mo ni bula kina. Ni muria ga na sala ni kila-ka.

⁷ Kevaka o vakadodonutaka e dua na dauveivakalialiai, o na vakamaduataki ga kina. Kevaka o vunauca e dua na tamata ca, o na rawa ni mavoa wale ga kina.

⁸ Kakua ni vakadodonutaka e dua na dauveivakalialiai, ena cati iko wale ga kina o koya. Ia kevaka o na vakadodonutaka e dua na tamata vuku, ena dokai iko o koya.

⁹ E dua na ka o na kaya vua na tamata vuku ena vakalevutaka cake na nona vuku. Na ka ga o kaya vua na tamata yalododonu ena vakuria na nona kila-ka.

¹⁰ Na i matai ni kalawa ki na yalomatua sai koya na rerevaki Jiova. Kevaka o sa kilai koya na Le Dua Yalo Savasava, o sa yalomatua.

¹¹ O Yalomatua ena vakuria na yabaki ni nomu bula.

¹² Kevaka o sa yalomatua ena yaga sara ga vei iko; ia kevaka o na vakanadakuya, sai iko ga ena nomu na kena leqa.

¹³ Ia o lecaika sa vaka e dua na yalewa domolevu, yalowai ka sega ni kila na madua.

¹⁴ Sa dabe tiko o koya ena katuba ni nona vale se ena dua na i dabedabe ena yasa ni koro cere duadua,

¹⁵ ka sa kacivi ira tiko na tamata era lako siviti koya, vei ira era sa cakava ga na nodra dui cakacaka, me vakaoqo:

¹⁶ Ni lako mai ki ke na tamata lecaika! A sa kaya vei ira na tamata yalowai,

¹⁷ Sa kamikamica na wai butakoci. Sa kana vinaka cake ga na madrai butakoci.

¹⁸ Ia era sa sega tiko ni kila o ira sa temaki ni ra na mate na tamata kece sara era lako ki na nona vale, kei ira kece sara sa curuma oti era sa tiko ena vuravura ni mate.