Vosavakaibalebale 8 - Vakavakadewa Vou kei na iVola tale eso

Na Vakacerecerei ni Yalomatua

¹ Rogoca mada! Sa kacikaci tiko o Yalomatua. Sa kaci mai me rogoci o lomavuku.

² Sa tucake tu o koya ena veidelana ena yasa ni sala Kei na veibasoga ni gaunisala.

³ Sa kaci mai ena yasa ni matamata ni koro, Kei na mata ni katuba ni curucuru me vakaoqo:

⁴ Au sa vakamasuti kemuni kece sara; Au sa kacivi kemuni na tamata kecega e vuravura.

⁵ O ni sa yalowai tiko beka? Ni vulica mo ni yalomatua. O ni sa lecaika tiko beka? Ni vulica mo ni kila-ka.

⁶ Ni rogoca na noqu veivosa momona oqo; Sa dodonu na veika kece au tukuna vei kemuni.

⁷ Sa vosataka ga na ka dina na gusuqu; Ka'u sa cata sara na lasu.

⁸ Sa dina na veika kece sara au sa kaya; Sa sega na ka e lasu se veivakacalai.

⁹ Sa macala vinaka vei ira sa yalomatua; Ka sa matata vinaka vua sa sinai ena kila-ka.

¹⁰ Digia ga na noqu i vakaro ka me kakua na siliva. Digia ga na kila-ka ka me kakua na koula dina sara.

¹¹ Oi au o Yalomatua, ka'u sa uasivi cake mai na vatu talei; Sa sega na ka o vinakata me vakatauvatani kei au.

¹² Oi au o Yalomatua, sa tu vei au na rai yawa; Sa tu vei au na kila-ka kei na vakatulewa matau.

¹³ Na rerevaki Jiova sai koya na cata na ca; Au sa cata na dokadoka kei na viavialevu, Na i tovo ca kei na vosa lasu.

¹⁴ Au sa dau tuvatuva-ka, ka'u sa vakayacora na kena cakacaka. Sa tu vei au na kila-ka, ka'u sa kaukauwa talega.

¹⁵ Au sa vukei ira na tui ena nodra veiliutaki Kei ira na i liuliu me ra buli lawa vakavinaka.

¹⁶ Sa ia na veiliutaki na i liuliu kecega mai na noqu veivuke, Sa vakakina o ira na vakalesilesi kei na kawa vakaturaga.

¹⁷ Au sa lomani ira era sa lomani au; O koya sa vakasaqarai au ena kunei au.

¹⁸ Era bini tu vei au na i yau kei na ka dokai me'u solia, Na bula sautu kei na rawa ka.

¹⁹ Na ka o na rawata mai vei au sa uasivita na koula dina, Sa ka vinaka cake sara mai na siliva digitaki.

²⁰ Au sa lako ena sala ni yalododonu; Ka'u sa muria voli na sala ni lewa dodonu,

²¹ au sa solia me ra vutuniyau o ira era sa lomani au, Ka vakasinaita na nodra vale ena i yau talei.

²² A sa buli au taudua e liu o Jiova, Na i sevu ni nona cakacaka mai liu sara.

²³ Au a buli mai na i vakatekivu ni gauna, Mai liu sara ni bera ni tauyavu o vuravura.

²⁴ Au a sucu ni bera ni buli na wasawasa, Ni bera ni dua na mataniwai e basika.

²⁵ Au a sucu ni bera ni tauyavu na veiulunivanua, Ni bera ni ra qai buli na veidelana,

²⁶ ni bera ni bulia na Kalou na vuravura kei na vanua Se na i matai ni bulibuli qele.

²⁷ Au a tu e kea ni sa vakarautaka o koya na lomalagi, Ni sa cakava na i yalayala ni wasawasa e dela ni wai titobu,

²⁸ ena gauna sa bulia kina na o ni lomalagi, Ena gauna sa bulia kina na i vurevure ni wasawasa,

²⁹ ka sa vakarota kina na wai ni wasawasa Me kakua tale ni tubu cake me vaka na nona vosa. Au a tu e kea ena kena vakayavutaki o vuravura.

³⁰ Au a tu e tikina me vaka e dua na daudroini vale, Ka'u sa vu ni nona reki ena veisiga, Ka'u sa marau tikoga e matana

³¹ ka marau vata kei na vuravura Ka sa taleitaki ira na kawa tamata.

³² Ia oqo, mo ni vakarorogo mada vei au, ragone. Ni muria na noqu vosa, mo ni na qai marau kina.

³³ Ni rogoca vinaka na ka o ni sa vakavulici kina. Mo ni yalomatua; kakua sara ni vakawaletaka.

³⁴ O ira era na vakarorogo vei au era na kune kalougata O ira sa tiko ga ena noqu mata ni katuba ena veisiga, Ka wawa tiko ena matamata ki na noqu vale.

³⁵ O ira sa kunei au sa kunea na bula, Ka sa taleitaki ira o Jiova.

³⁶ O ira sa sega ni kunei au sa vakacacani ira ga vakai ira; O koya sa cati au sa vinakata ga na mate.