Vosavakaibalebale 7 - Vakavakadewa Vou kei na iVola tale eso

Na i Veivakacalai ni Veibutakoci

¹ Na luvequ mo muria noqu vosa ka kakua ni guilecava na noqu i vakavuvuli.

² Mo vakayacora na veika au sa vakavulica vei iko mo bula kina. Qarauna vinaka mo muria na noqu i vakavuvuli me vaka na nomu taqomaka na yaloka ni matamu.

³ Mo vakayacora na noqu i vakavuvuli ena veigauna kecega, ka mo vola sara ki na vu ni yalomu.

⁴ Mo okata na yalomatua me ganemu, ka okata na lomavuku me nomu i tokani voleka sara.

⁵ E rau na taqomaki iko mai na watidra na tagane tani, mai vei ira na yalewa dauveitemaki ena nodra vosa.

Na Yalewa Dautagane

⁶ Au a vakararai toka mai na katubaleka ni noqu vale ena dua na gauna,

⁷ ka'u raica sara e vuqa na cauravou era sa sega ni yalomatua, ia au a vakaraica toka e dua vei ira ka sa rui yalowai sara vakalevu.

⁸ A lako voli yani na cauravou oqo ena gaunisala, ka muria yani na sala sa volekata na i tikotiko ni dua na yalewa

⁹ ni sa karobo sobu na vanua, ka sa ologi vuravura na butobuto ni bogi.

¹⁰ A qai lako mai na yalewa o ya me rau sota; a sa vakaisulu tu me vaka na yalewa dauvolitaki koya ka sa qaseqase na yalona.

¹¹ Sa yalo doudou na yalewa oqo ka sega ni madua; sa sega ni dau tiko vakamalua e vale

¹² ni sa dauwawa voli ga ena i gole ni sala, kei na gauna eso ena bati ni sala, vata kei na gauna tale eso ena veivanua ni veivoli.

¹³ A sa mokoti cauravou ka reguca; ka rai vakadodonu ki na yaloka ni matana, ka tukuna vei cauravou,

¹⁴ Au sa cabora oti na noqu i madrali ni veivinakati, ka'u sa ia oti na noqu bubului ena siga edaidai.

¹⁵ Ia au sa lako mai kina oqo me'u vakasaqarai iko, ni'u sa gadreva dina me'u sotavi iko, ka'u sa kunei iko!

¹⁶ Au sa ukutaka oti tu na noqu i davodavo ena i sulu, ena siti lineni totoka duiroka ni Ijipita.

¹⁷ Au sa kaburaka oti kina na i vakaboi vinaka, oqori na mura, na yasi kei na sinamoni.

¹⁸ Lako mai! Me daru moce vata mada me yacova na kida ni mataka, ka vakacegui kedaru ena marau ni dodomo.

¹⁹ E sega ni tu oqo e vale na watiqu. E se lako tu vakayawa sara o koya.

²⁰ E dua na i lavo levu e kauta tu, ka na qai lesu mai ni oti e rua na macawa.

²¹ Mai na veivosa kamikamica, a sa temaki cauravou kina, ka sa rawai koya mai na vosa veicavilaki ni gusuna.

²² E sega ni bera ni sa muri yalewa yani o cauravou, me vaka na bulumakau sa kau yani me la'ki vakamatei, se vaka na dia sa ciciva yani na dai,

²³ me yacova ni sa coba ki yatena na gasau. O cauravou sa vaka na manumanu vuka sa vakusakusa yani ki na i cori, ka sega ni kila ni na vakaleqai kina na nona bula.

²⁴ Ia oqo, kemudou na luvequ, mo dou vakarorogo mada vei au. Dou rogoca vinaka na vosa ni gusuqu.

²⁵ Dou kakua ni vakatara me rawai na yalomudou mai vua na yalewa vakaoqo; kakua ni lako sese voli ena nomu vakasaqarai koya.

²⁶ Ni sa vakaleqai ira oti e vuqa na tagane o koya ka sa vakavuna na nodra mate e lewe vuqa.

²⁷ Kevaka o na lako ki na nona vale, o sa muria tiko na sala ki na vuravura ni mate. Oqo na gaunisala lekaleka ki na mate.