Vosavakaibalebale 6 - Vakavakadewa Vou kei na iVola tale eso

Ai Vakasala Eso

¹ Na luvequ, o sa yalataka li mo sauma na nona dinau e duatani tale na tamata?

² O sa coko beka ena nomu vosa ka tacori ena nomu vosa ni yalayala?

³ Ia oqo na luvequ, o sa tu ena ligana na tamata o ya, ia sai koya ga oqo na sala mo sereki iko kina: Mo lako vakatotolo sara vua ka vakamasuti koya me sereki iko.

⁴ Kakua mada ni o vakusakusa mo la'ki moce se mo cegu vakalekaleka.

⁵ Mo lako tani rawa vakatotolo mai na dai, me vaka na manumanu vuka se na dia sa dro mai na ligana na dauvakasasa manumanu.

⁶ O ira na tamata vucesa e dodonu me ra vuli mai na nodra bula na qasikalolo.

⁷ Sa sega ni dua na nodra i liuliu, se turaga, se tui,

⁸ ia era sa kumuna na kedra kakana ena vula i katakata me baleta na vula i batabata.

⁹ Ena vakaevei na dede ni nona davo voli na tamata vucesa? Ena qai duri cake li ena gauna cava?

¹⁰ Sa kaya ga na tamata vucesa, Au se davo mada ga vakalailai; au se roqo liga mada ka vakacegu vakalailai.

¹¹ Ia ni sa moce koto ga, ena qai ravuti koya o dravudravua me vaka e dua na daubutako vakaiyaragi.

¹² Era sa veilakoyaki voli ka tukuna wavoki na i tukutuku lasu o ira na tamata tawayaga ka vucesa.

¹³ Sa sauriva na matadra ka ra sa vakatabataba me ra vakacalai iko,

¹⁴ ka ra sa bosea tikoga na veika ca e yalodra ka ia na vakatubu ca ena veiyasana kecega.

¹⁵ Ena vuku ni ka oqo, ena yacovi ira kina vakasauri na leqa ka ra na mavoa vakaca sara.

¹⁶ E ono na ka sa cata o Jiova; io, e vitu sa ka vakasisila vua:

¹⁷ na rai vakaviavialevu, na yame lasulasu, na liga sa vakamatea na tamata sa sega ni cala,

¹⁸ na yalo sa nakita na veika ca, na yava sa totolo yani ki na caka ca,

¹⁹ na i vakadinadina lasu sa cala na nona i tukutuku, kei na tamata sa vakavuna na veivala vei ira na wekana.

Na i Vakasala me Kakua na Veibutakoci

²⁰ Na luvequ, mo muria na i vakaro i tamamu ka kakua ni guilecava na i vakavuvuli i tinamu.

²¹ Mo vauca tikoga oqo ki lomamu, ka vakaisalusalutaka e domomu.

²² Era na dautuberi iko ni o sa lako voli, ena taqomaki iko ena bogi, ena vakasalataki iko ena siga.

²³ Sa cina serau na nodrau i vakaro ka sa sala ni bula na nodrau veivakadodonutaki.

²⁴ Ena maroroi iko mai vei ira na yalewa ca kei na nodra vosa veicavilaki na watidra na tagane tale eso.

²⁵ Kakua ni rawai ena kedra rairai totoka; kakua talega ni tacori mai na rai ni gagano e matadra.

²⁶ Sa rawa vua e dua na tagane me sauma na yalewa dauvolitaki koya ena i sau ni buli madrai, ia na i sau ni veibutakoci ena kania na veika kece e taukena na tagane oqo.

²⁷ O na rawa beka ni biuta ki lomaseremu na bukawaqa ka me qai sega ni kama na nomu i sulu?

²⁸ O na rawa li ni lako ena dela ni qilaiso waqa ka me qai sega ni kama na yavamu?

²⁹ Sa rerevaki vakakina o koya sa moce vata kei na watina e dua tale na tagane. O koya sa kitaka oqo ena sota kaya ga na kena i totogi.

³⁰ Era sa sega ni cudruvi koya na daubutako o ira na tamata kevaka e la'ki butako me vakacegui koya kina ena vuku ni nona viakana.

³¹ Kevaka e mani vesu, e dodonu me na vakavitutaki na ka me sauma lesu, ka veitalia ga kevaka ena vakayalia kina na i yau kece e tu vua.

³² Ia na tamata sa veibutakoci sa sega ni yalomatua; sa vakarusai koya ga vakataki koya.

³³ Na rogo ca kei na mavoa sa nona i votavota, ka na sega ni taqusi tani vakadua na nona madua.

³⁴ Sa daucudru katakata ga na tagane vakawati ena gauna sa tarai koya kina na yalovuvu, io ena sega tale ni qai yalololoma kina ena siga ni veisausaumi.

³⁵ Ena sega ni ciqoma e dua na i soro ni ca sa vakayacori vua; ena bese ga ni taura e dua na i solisoli se veivaqumi, ka veitalia na kena levu.