Vosavakaibalebale 5 - Vakavakadewa Vou kei na iVola tale eso

Ai Vakasala me Kakua na Veibutakoci

¹ Na luvequ mo vakarorogo mada, ka rogoca vakavinaka na noqu yalomatua kei na lomavuku.

² O na qai kila kina na sala mo i tovo vinaka kina, ka na vakaraitaka talega na nomu vosa kei na nomu kila-ka.

³ Sa kamica me vaka na oni na tebe ni gusuna na watina na tamata tani, ka sa yagoyago vinaka me vaka na waiwai olive na nona i regu,

⁴ ia ni sa oti na ka kecega, sa qai biuta tu mai vei iko o koya na gaga kei na mosi ni lomamu.

⁵ Ena kauti iko sobu o koya ki na nodra vuravura na mate; na sala sa muria sa sala ga ki na mate.

⁶ Sa sega ni kabita o koya na sala ni bula; ia sa lako tani ga mai kina ka sa sega ni kila na veika sa yaco.

⁷ Ia oqo mo vakarogoci au mada na luvequ, ka kakua sara ni guilecava na noqu vosa.

⁸ Mo yawa tani mai na yalewa vaka o ya! Kakua sara mada ga ni lako volekata na nona katuba.

⁹ Kevaka o na cakava oqori, o sa solia kina na nomu dokai vei ira na tani, o na mate talega ena ligadra na tamata sega ni dauloloma.

¹⁰ Era na qai kauta na kai tani na nomu i yau ka ra na taukena na tani na ka o a ocataka.

¹¹ O na qai davo vutugu voli ena nomu i davodavo, ka na yavu yani na lewemu kei na yagomu.

¹² O na qai kaya, Na cava mada au a sega ni vulica rawa kina? Na cava au a sega kina ni vinakata me dua me vakadodonutaki au?

¹³ Au a sega ni via vakarorogo vei ira na noqu qase ni vuli. Au a sega ni bau kauwaitaki ira.

¹⁴ Au sa qai raica ni'u sa vakamaduataki vakasauri ena matadra na lewe vuqa.

¹⁵ Mo yalodina tikoga vua na watimu ka vagolea duadua ga vua na nomu dodomo.

¹⁶ Na nomu vakaluveni mai vei ira na yalewa tale eso ena sega ni kauta mai vei iko na ka vinaka.

¹⁷ O ira na luvemu e dodonu me ra tubu cake me ra vukei iko, ka sega ni vukei ira na tani.

¹⁸ O koya oqo mo rekitaka kina na watimu ka kunea na nomu marau mai vua na yalewa o sa vakamautaka

¹⁹ sa rairai totoka ka vakaciriloloma me vaka na dia. Laiva ga na nona i vakarau kamikamica me vakamarautaka na yalomu; ka laiva na nona loloma me tu vakavolivoliti iko.

²⁰ Na luvequ, na cava mada na vuna mo vagolea kina na nomu dodomo vua e dua tale na yalewa? Na cava na vuna mo vinakata kina na nona i tovo kamikamica na watina e dua tale na tagane?

²¹ Sa raica o Jiova na veika kecega o vakayacora. Ena vanua kecega o sa lako kina, sa dau wanonovi iko o koya.

²² Na nodra i valavala ca na tamata ca sa vaka e dua na dai. Era sa coko ga ena nodra dui i valavala ca.

²³ Era sa mate ga baleta ni ra sa sega ni lewai ira rawa vakai ira. Na nona lialia ga ena vakauti ira tale ki na kedra i bulubulu.