Vosavakaibalebale 4 - Vakavakadewa Vou kei na iVola tale eso

Na Kena Yaga Vakalevu o Yalomatua

¹ Dou rogoca mada na luvequ na noqu i vakavuvuli. Dou vakarorogo vakavinaka mo dou kila-ka kina.

² Au sa vakavulici kemudou ena i vakavuvuli vinaka, ia dou kakua sara ni biuta tani.

³ Ni'u a se gonetagane lailai, ni'u sa luvedrau tagane e duabau ga na noqu i tubutubu,

⁴ sa dau vakavulici au o tamaqu ka kaya vei au, Nanuma vinaka sara na ka au sa tukuna vei iko ka kakua sara ni guilecava. Mo vakayacora na veika au sa tukuna vei iko, ni o na bula kina.

⁵ Mo rawata na vuku kei na yalomatua! Kakua sara ni guilecava se vakawaletaka na ka au sa tukuna vei iko.

⁶ Kakua ni biuta na yalomatua, ena taqomaki iko o koya. Mo lomani koya, ni na maroroi iko o koya.

⁷ Na rawata na yalomatua sai koya na ka cecere duadua mo cakava; ia ke dua tale na ka mo rawata, io na lomavuku.

⁸ Mo taleitaka na yalomatua, ena qai vakacerecerei iko o koya. Mo tauri koya matua sara, ni na vakavuna na nomu dokai.

⁹ Ena solia na yalomatua na i sala dokai vakaturaga sa vakaiukuuku mo tokara e ulumu.

¹⁰ Mo rogoci au mada, na luvequ. Mo taura vakabibi na noqu vosa ka tugana ki lomamu, ena qai balavu kina na nomu bula.

¹¹ Au sa vakavulici iko ena sala mo yalomatua kina kei na sala dodonu mo bula voli kina.

¹² Ni o na lako kina o na sega ni bale, ni o na cici o na sega ni tarabe.

¹³ Mo nanuma deivaki na ka o sa vulica. Na nomu vuli sai koya na nomu bula mo maroroya vinaka sara.

¹⁴ Kakua ni lako ki na vanua era lako kina na tamata ca. Kakua ni muria na nodra i vakarau na i valavala ca.

¹⁵ Kakua ni cakava! Gole tani mai na ca! Mo cata sara ka lako tani ga yani.

¹⁶ Era na sega ni moce rawa na tamata ca me yacova ni ra sa cakava oti na ka tawa dodonu. Era na yadra koto ga me yacova ni ra sa vakacacana oti e dua na tamata.

¹⁷ Na i tovo ca kei na i tovo kaukauwa sa vaka na kakana kei na waini vei ira.

¹⁸ Na sala era sa muria na yalododonu sa vaka na cadra cake ni matanisiga, ena toro cake tikoga na kena rarama me yacova na sigalevu tutu.

¹⁹ Ia na sala era lakova na i valavala ca sa vaka na butobuto loaloa ni bogi. Era sa bale sobu, ia era sa sega ga ni kila se na cava sa vakatarabetaki ira.

²⁰ Na luvequ, mo vakatudaliga vinaka ki na veika au sa tukuna. Rogoca matua na noqu vosa.

²¹ Me ra kakua ni yali tani mai vei iko. Nanumi ira vinaka ka tugana ki na vu ni yalomu.

²² Era na vunibula vei ira sa kunea ka vakabulabulataka na veitiki ni yagodra taucoko sara.

²³ Ia na ka bibi duadua oqo: Mo qarauna vinaka na yalomu, ni sa taka mai kina na i vurevure ni bula.

²⁴ Kakua sara ni tukuna e dua na ka e sega ni dina. Tarovi iko mai na vosa lasu sa dauveivakacalai.

²⁵ Rai vakadodonu ga ki liu ena vakanuinui sa savasava. Kakua ni vakacuva sobu na ulumu ena madua.

²⁶ Mo tuvana vakamaqosa na veika o via cakava, ena qai vinaka kina na ka kecega o vakayacora.

²⁷ Tarovi iko mai na ca ka lako vakadodonu ga ki liu. Kakua ni gole tani mai na sala vinaka.