Vosavakaibalebale 31 - Vakavakadewa Vou kei na iVola tale eso

Ai Vakasala i Tinai Lemueli na Tui

¹ Sa i koya oqo na veivosa sa kaya vei Lemueli na tui, o tinana,

² Sa i iko na luvequ tagane na i sau ni noqu masu. Na cava me'u tukuna vei iko?

³ Kakua ni vakayagataka na nomu kaukauwa kei na nomu i lavo kece vei ira na yalewa; era sa vakarusa na tui eso.

⁴ Rogoca sara Lemueli, sa sega ni kilikili me ra daugunu waini na tui se me ra dau gadreva me ra gunuva na waini kaukauwa.

⁵ Ni ra sa gunu era na guilecava na lewa ka sega ni kauwaitaka na nodra dodonu na tamata kei na ka era gadreva.

⁶ Solia na waini kaukauwa vei ira sa voleka ni rusa kei ira era sa loma bibi.

⁷ Laiva me ra gunu me ra guilecava kina na nodra dravudravua kei na nodra rarawa ena nodra dodonu kece na vakaleqai.

⁸ Mo vosa ena vukudra ka ra sega ni vosa rawa, ena nodra dodonu kece na vakaleqai.

⁹ Mo vosa ena vukudra, ka mo turaganilewa yalododonu. Taqomaka na nodra dodonu na dravudravua kei ira era leqa tu.

Na Radinivale Vinaka

¹⁰ Sa dredre sara me da raica e dua na radinivale vinaka! Ni sai yau levu o koya ka i yau lailai na vatu talei.

¹¹ Sa solia taucoko na turaga watina vua na nona veivakabauti, ka sa sega vakadua kina ni dravudravua o watina.

¹² Sa caka vinaka ga vua na turaga watina, ka sega ni caka ca, ena veisiga kece sara ni nona bula.

¹³ Sa vakasaqara na vutika ni sipi kei na i sulu lineni, ka sa makututaka na cakacaka ni ligana.

¹⁴ Sa dau kauta vakayawa mai na kena kakana, me vaka era dau vakayacora na waqa ni veivoli.

¹⁵ Sa dau yadra vakamataka ni se buto na vanua, ka sa vakarautaka na kedratou kakana ni matavuvale, kei na nodra i tavi na nona yalewa dauveiqaravi.

¹⁶ Sa raica na vanua ka volia ena i lavo sa rawa, me loganivaini.

¹⁷ Sa dau cakacaka kaukauwa, ka gugumatua o koya.

¹⁸ Sa kila na yaga ni veika kece e cakava ka sa dau cakacaka tiko o koya me yacova sara na bogi levu.

¹⁹ Sa vakaviviga ga na nona wa ni culacula ka talia ga o koya na nona i sulu.

²⁰ Sa yalovinaka vei ira na dravudravua kei ira na vakaloloma o koya.

²¹ Sa sega ni taqaya ni sa tau na wai cevata baleta ni sa tu na nodratou i sulu ni katakata na nona lewe ni vale.

²² Sa cakava ga na nona i tutuvi, ka daramaka na i sulu lokaloka vinaka sara.

²³ Sa kilai levu na watina tagane ka sa dua na lewe ni vanua nuitaki.

²⁴ Sa dautali i sulu o koya ka qai volitaka vei ira na volivoli.

²⁵ Sa qaqa ka dokai o koya ka sega ni rerevaka na gauna mai muri.

²⁶ Sa dau vosa ena yalovinaka kei na vuku.

²⁷ Sa dauogaoga tikoga ka qarava na leqa ni nodratou matavuvale.

²⁸ E ratou sa vakaraitaka vua na luvena na nodratou vakavinavinaka ka sa vakacaucautaki koya na watina tagane.

²⁹ Sa kaya na watina tagane, E levu na yalewa era radini vale vinaka, ia o sa uasivi duadua ga o iko.

³⁰ Na i tovo veitemaki ni yalewa e dau veivakacalai ka na takali na rairai vinaka, ia na yalewa sa rerevaka na Kalou ena vakacaucautaki.

³¹ Vakacaucautaki koya ena vuku ni veika kece sa cakava. Sa dodonu me ra dokai koya na tamata kecega.