Vosavakaibalebale 3 - Vakavakadewa Vou kei na iVola tale eso

Vakasala me Vakadinati ka Rokovi na Kalou

¹ Na luvequ, mo kakua ni guilecava na noqu i vakavuvuli vei iko. Mo maroroya ga e lomamu na noqu i vakaro.

² Na noqu i vakavuvuli ena vakavuna me balavu na nomu bula ka na yaco talega mo bula sautu.

³ Me kakua ni yali vei iko na yalololoma kei na dina. Taubeni rau e domomu ka vola talega e yalomu.

⁴ Ena ka oqo, o na dau vinakati kina ka rogo vinaka ena mata ni Kalou kei na mata ni tamata.

⁵ Mo vakararavi vei Jiova ena yalomu taucoko. Kakua ni vakararavi ki na nomu kila-ka.

⁶ Mo nanumi Jiova ena ka kecega o cakava, ena qai vakaraitaka vei iko o koya na sala dodonu.

⁷ Kakua sara ni nanuma ni o sa vuku, ia mo rerevaki Jiova ga ka gole tani mai na sala ca.

⁸ Kevaka o na cakava oqo, ena vaka na wainimate vinaka sa vakaotia na nomu mavoa ka vakamalumutaka na nomu mosi.

⁹ Mo dokai Jiova ena nomu i yau kei na i sevu ni veika vinaka o sa rawata mai na nomu qele.

¹⁰ Kevaka o na kitaka na ka oqo, ena sinai sara na nomu lololo ena vua ni nomu qele ka levu sara na memu waini ka na sega ni rawa mo maroroya taucoko.

¹¹ Na luvequ, ni sa vakadodonutaki iko o Jiova, mo vakarorogo sara ka muria na nona i vakaro.

¹² Sa dau vakadodonutaki ira na tamata sa lomani ira o Jiova, me vaka na nona vakadodonutaka e dua na tama na luvena e sa dau taleitaka vakalevu.

¹³ Sa kalougata na tamata sa rawata na vuku kei na tamata sa yaco me kila-ka.

¹⁴ Ni sa levu cake na ka sa rawata mai kina ka lailai mai na siliva; sa levu cake na kena yaga vei iko mai na koula.

¹⁵ Sa yaga cake vakalevu o yalomatua mai na vatu talei; sa sega sara ni dua na ka o gadreva me vakatauvatani kaya.

¹⁶ Sa solia vei iko o yalomatua na bula balavu ka vakakina na i yau kei na dokai.

¹⁷ E rawa ni cakava o yalomatua mo bula marau ka gole kece na nona sala ki na vakacegu.

¹⁸ Sa vaka na kau ni bula o yalomatua vei ira era sa mokota, ia sa kalougata o ira era sa tauri koya matua.

¹⁹ Sa tauyavutaki vuravura o Jiova ena nona vuku, Ka sa vakarautaki lomalagi ena nona lewa.

²⁰ Na nona yalomatua sa vakavuna me drodro na veiuciwai Kei na o me vakatauca na uca ki vuravura.

²¹ Na luvequ, mo taura vinaka na yalomatua kei na lomavuku: kakua sara ni laiva me rau lako tani mai vei iko.

²² E rau na solia vei iko na bula na bula marau ka vakaibalebale.

²³ O na qai maroroi vinaka kina ena nomu i lakolako, ka na sega ni tavutu na yavamu.

²⁴ O na sega ni rere ni o sa davo sobu mo moce, ia o na moce vakavinaka sara ena bogi taucoko.

²⁵ O na sega ni taqayataka na leqa tubu koso sa yaco vakidacala mai, me vaka na ka ca sa yacovi ira na tamata ca.

²⁶ Ena taqomaki iko ga o Jiova. Ena sega ni laivi iko o koya mo coko ena dai.

²⁷ Kakua ni bureitaka na ka vinaka vei ira era gadreva, ni sa tu vei iko na kaukauwa mo cakava kina.

²⁸ Kakua ni tukuna vua na wekamu me lesu tale mada ka me qai lako tale mai ni mataka ni sa rawa mo vukei koya ga edaidai.

²⁹ Kakua ni nakita e dua na ka me na vakaleqai kina na wekamuni, o koya sa bula volekati iko ka sa tiko na nomudrau veivakabauti.

³⁰ Kakua ni veileti kei na tamata ka sega na ka e vakavuna, ka sega ni bau cakava e dua na ka ca vei iko.

³¹ Kakua ni vuvutaki ira na tamata i tovo kaukauwa se nakita mo muria na nodra i valavala,

³² baleta ni sa cata o Jiova na tamata e cakava na ka ca, ka sa nuitaki ira ga na yalododonu.

³³ Sa tau na cudru i Jiova ki na nodra vale na tamata ca, ia sa vakalougatataka na nodra vale na yalododonu.

³⁴ Sa sega na kedra yaga na dauveibeci vei Jiova, ia sa yalovinaka ga o koya vei ira sa yalomalumalumu.

³⁵ Era na dokai ka rogo na tamata vuku, ia ena nodra na madua na tamata lialia.