Vosavakaibalebale 28 - Vakavakadewa Vou kei na iVola tale eso

¹ Era na dau dro na tamata ca ni sega ni dua e vakasavi ira, ia na tamata yalodina ena qaqa me vaka na laione.

² Ena qaqa ka tudei e dua na matanitu ni ra vuku ka yalomatua na kena i liuliu.

³ Na i liuliu e dau vakacacani ira na tamata dravudravua sa vaka na uca ni sa vakarusa na i teitei.

⁴ Kevaka o sega ni maroroya na lawa o sa to vata kei ira na tamata ca, ia kevaka o muria o sa saqati ira.

⁵ Era sa sega ni kila na i valavala dodonu, ia o ira era rerevaki Jiova era sa kila vinaka sara.

⁶ E daumaka cake me da dravudravua ka da yalodina, ka ca me da vutuniyau ka dau veivakaisini.

⁷ Na cauravou sa muria na lawa sa vuku, ia o koya sa vakailawalawa kei ira na tamata tawa yaga sa ka ni veivakamaduataki vei tamana.

⁸ O koya sa vutuniyau ena tubu sivia e rawata mai vei ira na tamata nona i yau sa kumuna vata ena qai nona e dua tani tale na tamata e dau lomani ira na dravudravua.

⁹ Kevaka o na sega ni muria na lawa, ena sega ni taleitaka na Kalou me rogoca na nomu masu.

¹⁰ Kevaka o veidabuitaka e dua na tamata yalododonu me cakava na ka ca, o na coko ga ena dai o sa cakava. Ena taura ga na kena i sau o koya sa sega na nona cala.

¹¹ Sa dau nanuma ga na tamata vutuniyau ni sa vuku, ia na tamata dravudravua yalomatua ena kilai koya.

¹² Ni yaco me ra veiliutaki na tamata yalododonu era marau na tamata kecega, ia ni ra i liuliu na tamata ca, era na vuni na tamata.

¹³ O na sega ni toro cake kevaka o vunia tiko na nomu i valavala ca. Mo vakatusa ga ka biuta tani, ena qai vakaraitaka kina vei iko na Kalou na nona yaloveivosoti.

¹⁴ Ni o rerevaka tiko na Turaga o na marau tikoga. Kevaka o na veisaqasaqa o na rusa.

¹⁵ Na i liuliu ca sa vaka na laione sa tagi mai se na bea sa cici mai vei ira na dravudravua.

¹⁶ Na i liuliu sa sega ni vuku ena dau veivakasaurarataki. Ia o koya e cata na veivakaisini ena balavu na nona veiliutaki.

¹⁷ Na tamata sa vakadinadinataka ni laba, ena dauveidroyaki voli ga me yacova sara na mate. Me kakua sara ni dua Me vukei koya.

¹⁸ O koya sa caka dodonu ena vagalalataki, ia o koya ena ia na veivakaisini ena bale.

¹⁹ Na dauteitei daucakacaka ena levu na kena, ia o koya sa dau vakatawayagataka na gauna ena ka levu na nona dravudravua.

²⁰ Na tamata yalodina ena vakalougatataki vakalevu, ia o koya sa vakusakusa me vutuniyau ena totogitaki.

²¹ Sa sega ni dodonu na veitotaki. Ia sa rawa me ra cata na turaganilewa, kevaka era saumi me ra kakua ni cakava na ka e dodonu.

²² Na tamata daunanumi koya ena dau vakusakusa me vutuniyau ka sega kina ni kila ni sa voleka na dausiga.

²³ Vakadodonutaka e dua na tamata, ena qai la'ki vinakata cake e muri mai na veicavilaki.

²⁴ O koya e nanuma ni sega ni cala na nona butakoca na nodrau i yaya na nona i tubutubu sa sega ni duidui kei na daubutako.

²⁵ Na daunanumi koya vakai koya sa dau vakavuna ga na leqa. Ena daumaka cake sara na ka o sota kaya kevaka o vakadinati Jiova.

²⁶ Sa ka lialia me da muria ga na noda nanuma, ia o koya sa muria na nodra i vakavuvuli na tamata vuku ena vakabulai.

²⁷ Dau soli ka vei ira na dravudravua, ena sega na ka o na leqa kina, ia o koya e via vunitaki koya mai vei ira na dravudravua ena cudruvi.

²⁸ Era na vuni na tamata ni ra sa yaco me ra i liuliu na tamata ca. Ia ni ra sa bale mai na i tutu ni veiliutaki era na duri cake tale na tamata yalododonu.