Vosavakaibalebale 25 - Vakavakadewa Vou kei na iVola tale eso

Eso Tale na Vosa Vakaibalebale i Solomoni

¹ Oqo eso tale na vosa vakaibalebale i Solomoni era a vola na tamata i Esekaia na tui Juta.

² Sa rogo na Kalou ni vunia na ka; eda sa dokai ira na tui ena veika era sa tukuna.

³ E sega ni rawa mo kila na ka e vakasamataka e dua na tui; sa siviti keda na nona vakasama me vaka na cecere ni lomalagi se na titobu ni wasawasa.

⁴ Kauta tani na veika duka mai na siliva ena qai rawa me cakava na dautuki kaukamea e dua na ka rairai vinaka.

⁵ Kauta tani na dauvakasala ca mai vua na tui ena qai kilai kina na nona matanitu ena kena lewa dodonu.

⁶ Kakua ni via vakaraitaka na ka e baleti iko ni o tu e matana e dua na tui se via vakaraitaka na nomu cecere.

⁷ E uasivi cake mo kacivi mai mo la'ki dabe ki cake, ka ca me qai tukuni mai mo solia na nomu i dabedabe vua e dua e cecere cake.

⁸ Kakua ni vakusakusa mo la'ki veilewai ena dua na ka o a raica. Kevaka e qai vakadinadinataka e muri e dua na tamata i vakadinadina ni o cala, na cava o na qai cakava?

⁹ Kevaka e duidui na nomudrau vakasama kei na kai nomu, drau tovolea mo drau raica vata na kena duidui ka kakua ni vakaraitaka na ka vuni baleti koya e dua vei kemudrau.

¹⁰ Kevaka e sega era na qai kila na tamata kece ni o sega ni rawa ni maroroya e dua na ka vuni, ka na sega ni oti rawa na kemu i rogorogo.

¹¹ Na vakasama e vakamacalataki vakavinaka e vaka e dua na ka e caka ena koula ka dregati ki na i yaya siliva.

¹² E uasivi cake na i vakasala e solia e dua na tamata vuku vua e dua na tamata e via rogoca, mai na sau koula se na i ukuuku caka mai na koula dina.

¹³ Na daukau i tukutuku nuitaki, sa vakabulabulataki koya sa talai koya, me vaka na wai batabata ena katakata ni vula i tatamusuki.

¹⁴ Na tamata e sega ni solia na ka e yalataka e vaka na cagi kei na o e sega na kena uca.

¹⁵ Na veivakamasuti ena yalo vosota sa rawa ni musuka sobu na yalo e kaukauwa, sa rawa talega ni rawai kina o ira na turaga.

¹⁶ Kakua ni kania vakasivia na oni, kevaka e sivia sa na rawa ni o lualua tale kina.

¹⁷ Kakua ni la'ki sikova vakawasoma e dua na nomu i tokani, de na qai vuturi ka yaco me cati iko.

¹⁸ Na tamata e tukuna na veika lasu me baleta na wekana sa vaka e dua na i seleiwau, na i wau, se dua na gasau ni dakaititi momoto sara.

¹⁹ Na vakararavi ki na dua na tamata e sega ni nuitaki ena dua na gauna ni leqa, sa vaka na kana ena bati sa yavavala se na lako ena yava sa lokiloki.

²⁰ Ena tautauvata talega kei na nomu via katakata ena dua na siga batabata ena nomu luvata tani na nomu i sulu. Na laga sere vua e dua na tamata sa yalo rarawa, sa vaka ni o luvata na nona i sulu ena siga batabata se vaka na masia e dua na mavoa ena masima.

²¹ Kevaka sa viakana na kemu meca, vakani koya; kevaka sa viagunu; vagunuvi koya.

²² Na ka oqori o na vakamaduataki koya kina ka na qai saumi iko o Jiova.

²³ Na kakase sa vakavuna na cudru me vaka na kena kauta mai na vualiku na uca.

²⁴ E vinaka cake na tiko ena tutu ni dela ni vale mai na tiko kaya na yalewa dauvakatubu veileti.

²⁵ Na rogoca na i tukutuku vinaka mai na vanua tani sa vaka na gunuva na wai batabata ena gauna ni karamaca.

²⁶ Na tamata yalododonu sa soli koya yani vua e dua na tamata ca, sa vaka na mata ni wai vuvu se na i keliwai ca.

²⁷ Sa sega ni vinaka vei iko mo kania vakalevu na oni, ka vakakina na nomu saga mo vakacaucautaki vakalevu.

²⁸ Kevaka o sega ni tarova rawa na yalomu, o sa vaka e dua na koro sa bale na kena bai ena kena malumalumu.