Vosavakaibalebale 22 - Vakavakadewa Vou kei na iVola tale eso

¹ Kevaka mo digia na rogo vinaka se na i yau levu, mo digitaka ga na rogo vinaka.

² E dua na ka oqo e rau sa tautauvata kina na vutuniyau kei na dravudravua: sa buli rau ruarua ga na Kalou.

³ Na tamata yalomatua ena raica na leqa ni sa yaco mai ka na taqomaki koya, ia na tamata yalowai ena lako ga yani kina ka na qai veivutuni e muri.

⁴ Rerevaki Jiova ka yalo malumalumu, o na qai vutuniyau, dokai ka bula balavu kina.

⁵ Kevaka o sa lomana na nomu bula, kakua ni volekata na dai era sa coko kina na tamata ca ena bati ni sala.

⁶ Vakavulica na gone ena sala e dodonu me lako kina, ia ni sa qase mai ena sega sara ni lako tani mai kina.

⁷ Na tamata dravudravua sa nona bobula na tamata vutuniyau. Na tamata e dinau ena nona bobula na tamata e dinau vua.

⁸ O koya e kaburaka na sore ni kau tawa dodonu ena tamusuka talega na veika ca, na i totogi bibi sara ena vakarusai iko.

⁹ Mo lomasoli ka vota na kemu kakana vei ira na dravudravua, o na qai vakalougatataki kina.

¹⁰ Vakatala tani na tamata dauveivakaisini, ena qai oti kina na veivala, na veileti, se na veivosacataki.

¹¹ O koya sa yalo savasava ka dau totoka na nona i vosavosa, ena yaco me nona i tokani na tui.

¹² Ena raica tiko o Jiova me taqomaki na ka dina mai na nodra vosa lasu na tamata lasulasu.

¹³ Na tamata vucesa sa dau tiko ga e vale; sa kaya ni na vesuki koya e dua na laione kevaka e lako yani ki tuba.

¹⁴ Na veibutakoci e dua na dai sa dau vesuki ira na tamata ka sa cudruva o Jiova.

¹⁵ Era sa dau cakava na gone na veika lialia ka sega ni vakasamataki vinaka, ia na kuita ni veituberi ena rawa ni vakaotia.

¹⁶ Kevaka o soli i loloma vei ira na vutuniyau, se tabaki ira sobu na dravudravua mo vutuniyau kina, o na yaco mo dravudravua sara.

Na Vosa ni Vuku e Tolusagavulu

¹⁷ Vakarorogo mada, me'u tukuna vei iko na ka era sa tukuna na yalomatua, ka vulica na nodra i vakavuvuli.

¹⁸ Ena talei sara kevaka o tugana ki yalomu ka wiligusutaka e gusumu.

¹⁹ Au vinakata mo vakadinati Jiova matua sara; ni sai koya oqori na vuna ka'u sa via tukuna kina oqo vei iko.

²⁰ Au sa vola e tolusagavulu na vosa ni vuku me baleti iko; Era sa tu kina na kila-ka kei na i vakasala momona.

²¹ Sa na tuberi iko talega mo kila na ka dina. Ia ni o sa talai mo la'ki raica mai na ka dina, o na kauta lesu mai na kena i sau dodonu.

Ai Matai ni Vosa ni Vuku

²² Kakua ni via butakoca na ka era taukena na dravudravua kei na tamata malumalumu ena matamata ni koro.

²³ Ena totaki ira o Jiova ka na vakacacana na nona bula na tamata e via vakacacani ira.

Na Kena i Karua

²⁴ Kakua ni veitokani kei ira na tamata yalo katakata ka yalokaukauwa.

²⁵ Ena rawa ni o vulica na nodra i vakarau ka qai dredre mo veisau.

Na Kena i Katolu

²⁶ Kakua ni yalataka mo sauma na nona dinau e dua na tamata vulagi.

²⁷ Kevaka o na mani sega ni sauma rawa, ena rawa ni ra kauta tani sara talega na nomu i mocemoce.

Na Kena i Kava

²⁸ Kakua sara ni tosoya e dua na i yalayala ni vanua makawa era sa cakava tu na qase.

Na Kena i Kalima

²⁹ Vakaraitaka mada vei au e dua na tamata dau cakava na ka vinaka, au na qai vakaraitaka vei iko e dua na tamata e uasivi sara mai vei ira e lewe vuqa ka yaga me nodra i tokani na tui.