Vosavakaibalebale 21 - Vakavakadewa Vou kei na iVola tale eso

¹ Sa lewa o Jiova na vakasama ni tui me vaka na rawarawa ni nona lewa na vanua me drodro kina na uciwai lailai.

² A sala kece ni tamata sa rairai dodonu ga vua, ia sa dikeva o Jiova na yalo ni tamata.

³ Na kena vakayacori na ka e dodonu ka savasava sa taleitaka vakalevu cake o Jiova mai na vakacaboisoro.

⁴ Era sa lewai na tamata dauveivakaisini mai na nodra viavialevu kei na dokadoka, ka sai valavala ca oqo.

⁵ Ni o vakavakarau vinaka, ena levu na ka o rawata; ia ke o rui vakatotolo, ena sega ni veirauti na ka o rawata.

⁶ Na i yau o rawata mai na sala vakatani ena yali yani, ia ena kauti iko mada e liu ki na katuba ni mate.

⁷ Na nodra i tovo kaukauwa na tamata ca ena vakarusai ira ga; era sa bese ni cakava na ka dodonu.

⁸ Era sa muria na sala veve na tamata era kila tiko ni ra cala; ia era sa cakava ga na ka dodonu na tamata cakacaka vakadodonu.

⁹ E vinaka cake me da la'ki tiko vakatikitiki e dela ni vale, ka ca ni da tiko vata e vale kei na marama watida dauveileti.

¹⁰ Na tamata ca sa guta vakalevu na veika ca; ka sa sega ni bau lomana e dua na tamata.

¹¹ Ni sa cudruvi na dauveivakalialiai, sa vuku kina na yalowai; ia ni sa vakavulici na yalomatua, sa kila-ka kina.

¹² Na Kalou, o Koya na Yalododonu sa dikeva na nodra vale na tamata ca, ka sa vakavuna na nodra rusa.

¹³ Kevaka o bese ni rogoca na tagi ni tamata dravudravua, ena sega ni rogoci na nomu tagi ni kere veivuke.

¹⁴ Kevaka e dua e cudruvi iko tiko, ena oti na nona cudru ke soli lo vua e dua na i loloma.

¹⁵ Ni vakayacori na ka dodonu, era marau kina na tamata yalododonu, ia era domobula kina na tamata ca.

¹⁶ O koya sa gole tani mai na sala ni yalomatua ena la'ki cava ena nodra i soqosoqo na mate.

¹⁷ O koya sa dautaleitaka na marau kei na lasa, ena yaco me dravudravua; kei koya sa dauvinakata na waini kei na waiwai ena sega ni rawa ni vutuniyau.

¹⁸ Ena yacovi ira ga na tamata ca na veika ca era via cakava vei ira na tani.

¹⁹ E vinaka me da tiko ena dua na vanua lala ka ca na tiko vata kei na marama watida dauveileti ka daucudru.

²⁰ Sa tiko e nona vale na tamata yalomatua na kakana kei na waiwai, ia na tamata yalowai sa kania kece na veika e tu vua.

²¹ O na bula balavu kevaka o tamata yalovinaka ka daucakacaka vakadodonu; era na dokai iko ka caka vinaka vei iko na tani.

²² Na tamata yalomatua sa vakadruka rawa na nodra koro na qaqa, ka talaraka sobu na veiyavu kaukauwa era dauvakararavi kina.

²³ Kevaka o vinakata mo kakua ni coko ena dua na leqa ia mo qarauna vinaka na ka o tukuna.

²⁴ Mo dusia mada vei au e dua na tamata dokadoka ka'u na qai dusia vei iko e dua na tamata qaciqacia, viavialevu, ka sega ni dauveikauwaitaki.

²⁵ Na gagadre ni tamata vucesa e rui rerevaki, baleta ni ra dau bese ni cakacaka na liga vucesa.

²⁶ Ena siga yadua era sa vakananuma na ka era garova, ia o ira na yalododonu era sa lomasoli ena dausolisoli.

²⁷ A nodra i soro na tamata ca sa ka vakasisila; sa qai ca vakalevu ni cabori ena yalo vakatani.

²⁸ A i vakadinadina lasu ena rusa, ia na tamata dauvakarorogo vinaka ena vakabauti na nona vosa.

²⁹ A tamata ca sa vakaukauwataka na matana, ia na tamata yalododonu sa dikeva vinaka na nona sala.

³⁰ Sa sega na vuku, se na kila-ka, se na i vakasala me uasivi cake mai vei Jiova.

³¹ Sa rawa ni vakarautaki tu na ose me la'ki valu, ia na qaqa ena solia duaduaga o Jiova.