Vosavakaibalebale 20 - Vakavakadewa Vou kei na iVola tale eso

¹ Na gunu vakasivia sa vakavuna na kosakosa kei na lialia. Sa dauveivakasesei na daumateni.

² Na nona cudru e dua na tui sa vaka na tagi ni laione. O koya sa vakacudruya na tui sa tautauvata ga kei koya sa vakamatei koya vakai koya.

³ Na tamata lialia ga sa vakavuna na veivala, ia sa ka dokai me da galala mai kina.

⁴ Na dauteitei sa vucesa ni siviyarataka na nona vanua ena kena gauna ena sega na ka e tamusuka.

⁵ Na nona vakasama e dua na tamata sa vaka na wai ena dua na i keliwai, ia na tamata vuku sa rawa ni kauta mai ki tuba.

⁶ Sa tukuna kecega na tamata na nodra yalodina kei na nodra yalovinaka, ia tovolea mada ga mo vakaraica mai e dua na tamata sa yalodina ka yalovinaka vakaidina sara!

⁷ Era sa kalougata na gone e yalodina na tamadra ka ra cakava na ka e dodonu.

⁸ Sa dabe na tui ena i dabedabe ni veilewai ka kila na tamata ca ena gauna e raica kina.

⁹ E rawa li ni dua na tamata me kaya ni sa savasava na yalona, ka savasava mai na i valavala ca?

¹⁰ Sa cati ira o Jiova na tamata era vakayagataka na vatu i vakarau bibi ca kei na i vakarau ca.

¹¹ Sa vakaraitaka na i tovo ni gone na ka e cakava, ka na rawa mo tukuna kina se gone vinaka se ca.

¹² Sa solia vei keda o Jiova na mata me da rai rawa kina kei na daliga me da rogoca rawa kina na rorogo.

¹³ Ni o vakayagataka na nomu gauna ena moce o na dravudravua ga kina. Ni o vakaogai iko ena qai levu na kemu.

¹⁴ Era sa dau vosa kudrukudru tikoga na dauvolivoli ni sa rui sivia na i sau ni yaya, ia ni sa lako tani yani sa qai la'ki dokadokataka.

¹⁵ Ni o kila na ka o vosataka tiko, sa tu vei iko na ka e uasivi cake mai na koula se na vatu talei sara.

¹⁶ Na tamata lialia e bolea me sauma na dinau ni tamata tani e dodonu me solia ga na ka e taukena me i vakadei ni dinau e sauma.

¹⁷ Na ka o rawata ena veivakaisini o na marautaka me vaka na kakana vinaka; ia e sega ga ni dede, ena vaka na gusu sa sinai ena laqere.

¹⁸ Taura na i vakasala vinaka o na qai rawata na ka o nakita kakua ni cici yani ki na i valu ka sega ni dua na nomu i naki.

¹⁹ Na tamata dau vakau vosa ena sega ni vunitaka e dua na ka vuni. Kakua ni lasa kei na tamata e levu na nona vosa.

²⁰ Kevaka o rulaki rau na nomu qase, na nomu bula ena vaka na cina boko ena vanua buto.

²¹ Na rawarawa ga ni sala o rawata kina na nomu i yau, na lailai ni ka vinaka o rawata kina.

²² Kakua ni nanuma mo qai sauma o iko na ca e caka. Waraki Jiova ena vukei iko o koya.

²³ Sa cata o Jiova na tamata e vakayagataka na vatu i vakarau bibi kei na i vakarau ca.

²⁴ Sa lewa o Jiova na noda gaunisala, e rawa vakacava vua e dua na tamata me kila na nona bula?

²⁵ Vakasama vakavinaka sara ni bera ni o yalataka e dua na i solisoli vua na Kalou. De o na qai veivutunitaka e muri.

²⁶ Na tui yalomatua ena vakasevi ira tani na tamata ca, ka vakatauca vei ira na i totogi.

²⁷ Sa solia vei keda o Jiova na vakasama kei na noda lewa-e-loma, sa sega ni rawa ni dauvunitaki keda.

²⁸ Na nona veiliutaki e dua na tui ena dei tikoga kevaka e dodonu ka dina ka vinaka.

²⁹ Eda sa qoroya na nodra kaukauwa na cauravou ka doka na sikoa ni uludra na qase.

³⁰ Eda sa dausotava ena veigauna eso na draki ni bula mosimosi me kauta mai na veisau ki na noda bula.