Vosavakaibalebale 2 - Vakavakadewa Vou kei na iVola tale eso

Na i Cocovi ni Yalomatua

¹ Na luvequ, mo katona na noqu i vakavuvuli vei iko ka kakua ni guilecava na noqu i vakaro.

² Mo vakarorogo ki na veika sa yalomatua, ka tovolea mo kila sara.

³ Io, mo tagica ga na vuku, ka tabalaka cake na domomu mo kila-ka.

⁴ Mo vakasaqara matua sara me vaka o sa vakasaqara na siliva se dua na yau vuni.

⁵ Kevaka o sa vakayacora vakakina, o na qai kila kina na i balebale ni rerevaki Jiova ka rawata mo kila na Kalou.

⁶ Ni sai Jiova sa dau solia na yalomatua, ka sa taka mai vua na kila-ka kei na lomavuku.

⁷ Sa solia na veivuke kei na veitaqomaki vei ira na tamata yalododonu ka yalodina.

⁸ Sa taqomaki ira na tamata dodonu, ka maroroi ira era yalodina vua.

⁹ Ia o sa na qai kila na ka vinaka kei na ka dodonu, ka muria na sala vinaka.

¹⁰ O na yaco mo vuku ka na vakamarautaki iko na nomu kila-ka.

¹¹ Ena taqomaki iko na kila-ka kei na yalomatua,

¹² ka tarovi iko mo kakua ni cakava na ka e cala. Ena tarovi iko mo kakua ni muri ira na tamata dauveivakacalai,

¹³ o ira era sa dau biuta na veika vinaka ka dau vakayacora na veika ca,

¹⁴ o ira sa dau marautaka na cakava na veika ca ka taleitaka na ca,

¹⁵ ka ra sa tamata sega ni nuitaki ka sega ni vakadinati.

¹⁶ Ena rawa kina mo vorata na yalewa dautagane sa via veretaki iko ena nona vosa veicavilaki,

¹⁷ o koya sa sega ni yalodina vua na watina, ka sa guilecava na nona vosa ni yalayala.

¹⁸ Kevaka o lako ki na nona vale, o sa muria ga na sala sa gole ki na mate. Na lako i kea sa vakavolekataki keda sara ki na nodra vuravura na mate.

¹⁹ Sa sega ni dua e lako vua me lesu tale mai. Sa sega ni lesu tale mai ki na sala ni bula.

²⁰ O koya oqo mo muria kina na nodra i vakarau na tamata vinaka ka vakayacora na veika vinaka.

²¹ O ira na tamata yalo savasava, o ira na tamata dina era na tiko ena noda vanua.

²² Ia ena muduki ira na tamata ca e vuravura na Kalou me vaka sa cavuraki tani na kau mai na qele.