Vosavakaibalebale 19 - Vakavakadewa Vou kei na iVola tale eso

¹ E vinaka cake me da dravudravua ka yalododonu, e ca ga me da tamata yalowai ka lasulasu.

² Na yalo gu sa segai kina na kila-ka sa sega ni vinaka; na sega ni dauvosota ena vakavuna na nomu leqa.

³ Eso na tamata era sa vakarusai ira ga ena veika lialia era cakava ka ra qai beitaki Jiova kina.

⁴ Na tamata vutuniyau sa dau levu cake tikoga na i wiliwili ni nona i tokani, ia na tamata dravudravua sa dredre vua me kabiti iratou matua tikoga na nona i tokani e lewe vica wale ga.

⁵ O koya e tukuna na ka lasu ena mataveilewai ena totogi ena sega ni rawa ni dro bula o koya.

⁶ Na tamata kece sa vinakata me ra vakalomavinakataki ira na tamata rogo ka kilai; era sa via veikilai kecega na tamata kei ira sa dausolia na ka ni veivuke eso.

⁷ Era sa sega ni yaga vua na tamata dravudravua na tacina; sa rauta me sega na nona i tokani. Veitalia sara ga na nona saga vakaukauwa, ena sega sara ni rawata e dua.

⁸ O koya sa rawata na vuku sa lomana na yalona; o koya sa maroroya na nona kila-ka ena kune ka vinaka.

⁹ E sega ni dua na tamata e tukuna na ka lasu ena mataveilewai me na sega ni totogi; ena yaco ga vua na leqa.

¹⁰ E sega ni dodonu me bula ena bula ni tamata vutuniyau na tamata lialia, ka sega ni dodonu me lewai ira na turaga, na tamata bobula.

¹¹ Na tamata yalomatua sa dau lewa vinaka na nona cudru ni yalona. Ni dua e caka ca vei iko, sai vakarau uasivi ga me da kakua ni via kauwaitaka.

¹² Na cudru ni tui sa vaka na tagi ni laione, ia na nona yalovinaka sa vaka na kena yaco mai na uca sa gadrevi vakalevu.

¹³ Na gone lailai sa rawa ni vakavuna na rusa i tamana, ia na yalewa vakawati dauveileti sa vaka na wai e turu tikoga ka sega ni mudu.

¹⁴ Sa rawa vua e dua na tamata me taukena e dua na vale kei na i lavo mai vei rau na nona qase, ia sa rawa duadua ga vei Jiova me solia vua e dua na watina yalomatua.

¹⁵ Na vucesa sa dauvakavuna na moce lutu; na tamata e tu wale ga ena sega na kena kakana.

¹⁶ Maroroya na lawa ni Kalou, ena balavu kina na nomu bula; ni kevaka o sega ni kauwaitaka, o na mate.

¹⁷ Na nomu soli-ka vua na tamata dravudravua sa vaka na soli-ka vei Jiova, baleta ni na sauma lesu o Jiova.

¹⁸ Vakavulica na luvemu ni ra se gone ni se rawa me ra vakavulici; kevaka e sega, o sa vukei ira tikoga me ra vakarusai ira.

¹⁹ Kevaka e dua na tamata e yalo katakata, laiva me sota kaya ga na i sau ni nona yalo katakata. Kevaka o sa vukei koya ena i matai ni gauna mo kauti koya tani mai na leqa, o na cakava tale vakarua.

²⁰ Kevaka o sa dauvakarorogo ki na i vakasala ka o sa gadreva mo vakavulici, ena yaco mo tamata yalomatua ena dua na siga.

²¹ Sa rawa ni nakita na tamata e vuqa sara na ka, ia ena qai vakayacori ga na loma i Jiova.

²² Sa dua dina na ka vakamadua me da kocokoco; sa vinaka cake sara na tamata dravudravua mai vua e dua sa daulasulasu.

²³ Mo talairawarawa vei Jiova, ena qai balavu kina na nomu bula ka yaco kina vei iko na bula vakacegu kei na tiko vinaka.

²⁴ Eso na tamata era sa rui vucesa vakalevu me ra biuta ga ki gusudra na kedra kakana.

²⁵ E dodonu me ra cudruvi na tamata dokadoka, me rawa ni ra vuli kina na tamata era lecaika. Kevaka o sa yalomatua, o na vulica na ka mai na nomu vakadodonutaki.

²⁶ Na tamata ga e veivakamaduataki ka veivakalolomataki ena vakasosataki tamana ka vakatala na tinana mai na nona vale.

²⁷ Na luvequ ni sa mudu ga na nomu vuli, sa na totolo talega na nomu guilecava na veika o sa bau kila tu.

²⁸ Na tamata i vakadinadina ca ena tukuna na ka lasu. Na tamata ca sa daugadreva ga me cakava na ka ca.

²⁹ Na tamata yalowai ka dauveivakaisini e ciqoma ga na kena kuita.