Vosavakaibalebale 13 - Vakavakadewa Vou kei na iVola tale eso

¹ Na gone vuku ena vakarorogo ni vakadodonutaki koya o tamana, ia na tamata dokadoka ena sega ni via vakabauta ni cala.

² Era na saumi na tamata vinaka ena veika era sa kaya, ia o ira na tamata lawaki ca era sa viakania ga na i valavala kaukauwa.

³ Qarauna vinaka na ka o tukuna ka taqomaka na nomu bula. Na tamata e sega ni dau qarauna na nona vosa sa vakarusai koya ga vakai koya.

⁴ Veitalia sara ga na levu ni nona gadreva e dua na ka na tamata vucesa, ena sega sara ni rawata.

⁵ Na tamata yalododonu e cata na lasu, ia na nona i tovo na tamata ca sa vakasisila ka veivakamaduataki.

⁶ Sa maroroya na tamata yalododonu na nona yalododonu, ia na i tovo vakasisila sa vakarusai ira ga na tamata i valavala ca.

⁷ Eso na tamata era dau via vakaraitaka ni ra vutuniyau, ia sa segai sara na ka e tu vei ira. Eso tale era via vakaraitaka ni ra dravudravua, ia sa levu sara na ka e tu vei ira.

⁸ Na tamata vutuniyau ena vakayagataka na nona i lavo me qaravi kina na nona bula, ia sa sega ga ni vakasosataki na nona bula na tamata dravudravua.

⁹ O ira na yalododonu era sa vaka na rarama ni cina serau, ia o ira na tamata ca era sa vaka na cina kata bokoboko.

¹⁰ Na yaloviavialevu sa vakatubura ga na veileti. Sa ka ni yalomatua ga me dautarogi na i vakasala.

¹¹ Na i yau e rawa vakarawarawa ena yali talega vakarawarawa, ia na i yau e rawa vakadredre ena vakalevutaki.

¹² Na ka e nuitaki qai sega ni yaco sa vakavorotaka na yalo, ia na kena yaco na ka e gadrevi sa vaka na kau ni bula.

¹³ Kevaka o besetaka na i vakasala vinaka, o sa vinakata sara tikoga na leqa; ia ni o sa muria, o na vakabulai.

¹⁴ Na nodra i vakavuvuli na tamata yalomatua sai vurevure ni bula, era na vukei iko ni o sa leqa.

¹⁵ Na tamata kila-ka ena dokai, ia o ira sa sega ni vakadinati era sa lakova na i lakolako me ra rusa kina.

¹⁶ Na tamata yalomatua ena dauvakasama mada e liu ni bera ni cakava e dua na ka, ia na tamata yalowai ena vakaraitaka na nona lecaika.

¹⁷ Na daukau i tukutuku e sega ni vakadinati ena vakatubu leqa, ia o ira era vakadinati era sa vakavuna na veisaututaki.

¹⁸ Na tamata e bese ni vakavulici ena dravudravua ka madua, ia na tamata ena ciqoma na nona vakadodonutaki ena dokai.

¹⁹ Sa dua na ka talei ni o sa rawata na ka o gadreva! Na tamata lecaika sa bese ga ni gole tani mai na ca.

²⁰ O na yaco mo yalomatua ni o sa vuli mai vei ira na tamata yalomatua, ia o na rusa kevaka o sa vakailala vata kei ira na tamata lecaika.

²¹ Na leqa ena muri ira na tamata ca ki na veivanua kecega era lako kina, ia era na saumi na tamata yalododonu ena veika vinaka.

²² Na tamata vinaka ena laiva tu mai na i yau me nodra na makubuna, ia na nodra i yau na tamata ca ena nodra na yalododonu.

²³ Na vanua e sega ni teivaki e rawa ni rawati mai kina na kakana me kedra na dravudravua, ia era sa tarova na tamata ca me kakua ni teivaki.

²⁴ Kevaka o sega ni totogitaka na luvemu, o sa sega sara ni lomani koya. Kevaka o sa lomani koya dina, o na vakadodonutaki koya.

²⁵ Sa ka levu sara na kedra kakana na tamata yalododonu, ia era na dau viakana tu ga na tamata ca.