Vosavakaibalebale 12 - Vakavakadewa Vou kei na iVola tale eso

¹ Na tamata e gadreva na kila-ka ena vinakata me vakadodonutaki ni cala, ia o koya sa cata me vakadodonutaki sa tamata lialia.

² Sa taleitaki ira na tamata vinaka o Jiova, ia sa na vakarusai ira na tamata ca.

³ Na i valavala ca sa sega ni vakataudeitaka na bula ni tamata, ia na tamata yalododonu ga ena tudei.

⁴ Na marama radinivale vinaka sa vu ni reki kei na dokai vua na watina; ia na radinivale sa kauta mai na madua vua na watina sa vaka na mate (kenisa) sa vakavuna na vuca ni nona sui.

⁵ Na tamata yalododonu ena caka vinaka vei iko, ia na tamata ca ena gadreva tikoga me vakaisini iko.

⁶ Na vosa ni tamata ca sa vu ni mate, ia na nodra vosa na yalododonu sa sereki ira era sa vakatotogani.

⁷ Era na mate na tamata ca ka na sega ni vo bula e dua na nodra kawa, ia na nodra vuvale na yalododonu ena bula tikoga.

⁸ Kevaka o sa vuku, o na vakacaucautaki; ia kevaka o lecaika tiko, era na beci iko na tamata.

⁹ Sa vinaka cake me da vakataka ga e dua na lewenivanua sa cakacakataka na nona bula ni veisiga ka ca me da via la'ki vakataka voli e dua na tamata rogo ka kilai ia eda qai viakana tiko.

¹⁰ Na tamata vinaka sa dauqarava vinaka na nona manumanu, ia na tamata ca sa dau vakalolomataki ira ga.

¹¹ Na dauteitei e daucakacaka vakaukauwa sa levu sara na kena kakana, ia sa ka lialia me da vakaoti gauna tiko ena veicakacaka eso sa sega ni yaga.

¹² Na ka ga e gadreva na tamata ca sai koya me raica na ka me cakava, ia na tamata yalododonu ena tudei ga.

¹³ Na tamata ca ena tacori ga ena nona vosa, ia na tamata yalododonu ena vagalalataki koya mai na leqa.

¹⁴ Na i sau ni ka o na rawata sa vakatautaki ga ena veika o sa tukuna kei na ka o sa cakacakataka; o na rawata ga na veika sa dodonu ga me kemu i sau.

¹⁵ Na tamata lialia ena daunanuma ni sa dodonu tikoga o koya, ia na tamata yalomatua ena vakarogoca na i vakasala.

¹⁶ Ni cudru na tamata lialia ena totolo na nona vakaraitaka, ia na tamata yalomatua ena sega ni kauwaitaka na veivakacacani.

¹⁷ Ni o tukuna na ka dina, sa vakayacori na ka dodonu; ia na vosa lasu sa tini ga ena veivakaisini.

¹⁸ Na vosa e sega ni vakasamataki vinaka e rawa ni vakavuna na mavoa titobu me vaka na mavoa e vu mai na i seleiwau, ia na vosa ni vuku sa vakadewataki vakayalomatua sa ia kina na veivakabulai.

¹⁹ Sa sega ni bula dede na lasu, ia na ka dina sa bula tikoga ka tawa mudu.

²⁰ Sa kune na veivakaisini ena yalodra era nakita na ka ca, ia o ira era nakita na ka dodonu era na kunea na marau.

²¹ Ena sega na ka ca ena yacova na tamata yalododonu, ia na ka ga e sota kaya na tamata ca na leqa.

²² Sa cati ira na tamata lasulasu o Jiova, ia sa taleitaki ira ga sa dau vakayacora dina na nodra vosa.

²³ Na tamata yalomatua ena dau galuvaka na ka e kila, ia o ira na lecaika era na dau tukuna na ka lialia.

²⁴ Na cakacaka vagumatua ena solia vei iko na kaukauwa, ia na vucesa ena vakayacori iko mo tamata bobula.

²⁵ Na lomaocaoca ena rawa ni butakoca na nomu marau, ia na vosa vinaka ena vakayaloqaqataki iko.

²⁶ Na tamata yalododonu sa dau dikeva lesu tikoga na nona i vakarau, ia o ira na tamata ca era sa lako sese ena nodra i lakolako.

²⁷ Na tamata vucesa ena sega sara ni rawata na ka e vakasaqara, ia na tamata cakacaka vakaukauwa ena kunea na nona kalougata.

²⁸ Na yalododonu sa gaunisala ki na bula; na muri ni kena sala sa sega sara kina na mate.