Vosavakaibalebale 11 - Vakavakadewa Vou kei na iVola tale eso

¹ Sa cata o Jiova na tamata e vakayagataka na i vakarau ni ka e sega ni dodonu. Sa vinakata ga o koya na i vakarau ni ka sa dodonu vinaka.

² E dau sega ni dede era sa vakamaduataki na tamata dokadoka; ia sa laurai na yalomatua vei ira na yalomalumalumu.

³ Sa tuberi ira na tamata vinaka na nodra yalodina. O ira sa sega ni dinati sa vakarusai mai na nodra daucakacaka vakatawadodonu.

⁴ Sa sega ni yaga na i yau ena siga o na mate kina, ia na i valavala dodonu sa rawa ni vakabulai iko.

⁵ Na nona i valavala dodonu na tamata vinaka ena vakarawarawataka na nona i lakolako, ia na tamata ca ena vakavuna ga na nona bale.

⁶ Na yalosavasava sa vueta na nona bula na tamata dodonu, ia na tamata e sega ni vakadinati ena tacori ga ena nona kocokoco.

⁷ Ni sa mate e dua na tamata ca, sa mate vata kaya na nona i nuinui. Na i yau era sa nuitaka na tamata tawa vakabauta ena seavu ka yali ga yani.

⁸ Sa taqomaki na tamata yalododonu mai na leqa; ia sa yacovi ira ga na tamata ca na leqa.

⁹ O na rawa ni vakarusai o iko mai na nodra vosa na tamata era sega ni kila na Kalou, ia ena rawa ni o vakabulai ga ena nodra yalomatua na tamata yalododonu.

¹⁰ Sa marau na koro ena nodra toro cake na yalododonu, ka sa rogo na kaila ni marau ni sa mate na tamata ca.

¹¹ Sa toro cake na veikoro ni ra sa ia na veivakalougatataki na yalododonu, ia sa vakarusai ga na koro ena nodra vosa na tamata ca.

¹² Sa ka lialia na vosa beci ira na tani, ia na tamata yalomatua ena tiko lo ga.

¹³ E sega ni dua na daukakase sa nuitaki vua me maroroya na i tukutuku vuni, ia sa rawa ga ni o vakararavi vua na tamata nuitaki.

¹⁴ Ena bale e dua na matanitu kevaka sa sega na veivakasalataki. Ena yaco ga na tiko vinaka ni sa levu na daunivakasala.

¹⁵ Ke o sa yalataka mo sauma na nona dinau e dua na tamata vulagi, o na qai veivutunitaka e muri. E vinaka cake mo kakua ga ni vakaitavi kina.

¹⁶ Sa dau dokai na yalewa yalovinaka, ia na yalewa sa sega na nona i tovo sa kauta mai na veivakamadualaki. Na tamata vucesa ena sega na nona i lavo, ia na tamata gugumatua ena yaco me vutuniyau.

¹⁷ O na caka vinaka vei iko kevaka o sa dauloloma. Kevaka o sai tovo kaukauwa, o sa vakacacani iko ga vakai iko.

¹⁸ Era na sega ni rawata na kedra i sau dina na tamata ca; ia kevaka o sa teivaka na ka dodonu, o na tamusuka dina ga na kena i sau dina.

¹⁹ Na tamata e nakita me cakava na ka dodonu ena bula, ia na tamata ena cakava tikoga na ka ca ena mate.

²⁰ Sa cati ira na tamata vakasama ca o Jiova, ia sa taleitaki ira ga sai valavala dodonu.

²¹ Sa rawa mo vakadinata ni ra na totogitaki na tamata ca, ia o ira na yalododonu era na vakabulai.

²² Na totoka ni kena i rairai na yalewa sa sega ni dauvakatulewa vinaka sa vaka na mama koula ena ucu ni vuaka.

²³ Na ka era gadreva na tamata yalododonu sa dau basika ga kina na vinaka; ia ena gauna era rawata kina na tamata ca na ka era gadreva, sa basika ga na cudru.

²⁴ Eso na tamata era sa daulomasoli ena vakayagataki ni nodra i yau ka sa tubu cake ga kina na nodra vutuniyau. Eso tale era sa dauqaqarauni ena kena maninitaki na ka, ia sa tubu cake ga kina na nodra dravudravua.

²⁵ Mo dausolisoli, ni o na qai vakavutuniyautaki. Mo dauvukei ira na tani, era na qai vukei iko.

²⁶ O ira na tamata sa cudruvi koya sa maninitaka na sila, me qai volitaki ni sa toso cake na kena i sau; ia era sa vakacaucautaki koya ga ka sa volitaka yani.

²⁷ Kevaka sa vinaka na nomu i tuvatuva, o na dokai kina; ia kevaka o sa vakasaqara ga na ca, sai koya ga na ka oqori o na rawata.

²⁸ O ira era vakararavi ki na nodra i yau era na lutu me vaka na lutu ni draunikau ena vula i botabota, ia era na tubu vinaka ga na yalododonu me vaka na draunikau ena vula i katakata.

²⁹ Na tamata e dauvakavuna na leqa ki na nona vuvale ena sega na ka e taukena e muri. O ira na tamata lecaika era na dauqaravi ira tikoga na tamata yalomatua.

³⁰ Na yalododonu sa vakavuna na bula, ia na i tovo kaukauwa sa kauta tani tale.

³¹ O ira sa vinaka era sa taura na kedra i sau ena vuravura oqo, ia o ira na tamata ca kei ira na i valavala ca era na totogitaki.