Vei Taito 3 - Vakavakadewa Vou kei na iVola tale eso

Na i Tovo Vakarisito

¹ Tukuna tikoga vei ira na tamata lotu me ra dau talairawarawa ki na matanitu kei ira na veiliutaki; me ra talairawarawa vei ira ka vakarau tu me ra cakava na veicakacaka vinaka kecega.

² Me ra kakua ni vosavakacacataka e dua na tamata se dau veivala, ia me ra yalomalua ga ka vakarokorokotaki ira na tamata kecega.

³ Ni oi keda vakai keda eda a lialia ka dau talaidredre e liu. Eda a vakacalai ka vakabobulataki ena gagadre kei na veimataqali marau e vuqa. E a sinai na noda bula ena veiqati ca kei na vuvu. Era a cati keda na tamata ka da a veicati vakai keda.

⁴ Ia ni sa vakatakilai mai na yalovinaka kei na loloma ni Kalou na noda i Vakabula,

⁵ sa vakabulai keda o koya. E a sega ni vakabulai keda ena vuku ni noda caka dodonu, ena vuku ga ni nona yaloveivosoti. Sa vakabulai keda ni sa vakasavasavataki keda ena veivakasucumi vou kei na veivakavoui ni Yalo Tabu.

⁶ Ni sa sovaraka vakayauyau mai na Yalo Tabu na Kalou ena vuku i Jisu Karisito na noda i Vakabula,

⁷ me da vakadonui kina ena nona loloma-savu ka me da taukena kina na bula tawamudu eda namaka tiko.

⁸ Sa dina na veika kece au sa tukuna oti oqo. Au vinakata mo vakabibitaka tikoga na veika oqo, me ra cakava tikoga kina na ka vinaka o ira era vakabauta na Kalou ni sa vinaka na veika oqo ka yaga raraba vei ira na tamata.

⁹ Ia mo kakua ni vakaitavi ena veileti sega na betena, na tuva kawa, na veiba, kei na veiletitaka na lawa i Mosese ni ra sa ka mate walega ka tawayaga.

¹⁰ Ia kevaka o sa vunauca vakarua e dua e vakavuna tiko na veisei ka sega tikoga ni rogoca, mo kakua tale ni kauwaitaka na tamata o ya.

¹¹ Sa yaga mo kila ni sa tamata ca na tamata o ya ka sa vakaraitaka na nona i valavala ca ni sa cala dina.

Na i Tinitini ni Veivakaro

¹² E na gauna au na tala yani kina vei iko e dua vei rau o Aritema se o Tikiko tovolea sara ena nomu i gu taucoko mo lako mai vei au ki Nikopoli, ni'u sa nakita voli me'u na la'ki tiko e kea ena vula i liliwa.

¹³ Tovolea mo vukei rau o Sina, o koya na loya, vata kei Apolosa ena nodrau i lakolako, ka raica me kakua ni dua na ka me leqa vei rau.

¹⁴ Me ra vakavulici talega na noda me ra vakayagataka na nodra gauna ena qaravi ni cakacaka vinaka ka me rawa ni sotavi kina na veigagadre e vinakati vakatotolo, ka me ra kakua ni tawayaga kina vua.

¹⁵ Era sa loloma tu yani vei iko o ira kece sara era tiko vata kei au. Keitou sa loloma kece sara tale tu ga yani vei ira na noda i tokani ena vakabauta. Me sobuti kemuni kecega na loloma ni noda Kalou.