Vakatekivu 9 - Vakavakadewa Vou kei na iVola tale eso

Na Veiyalayalati ni Kalou kei Noa

¹ A sa vakalougatataki Noa kei iratou na luvena tagane na Kalou ka kaya, “Dou vakaluveni ka tubu me lewe vuqa mai, ka vakatawai vuravura.

² Era na rerevaki kemudou na veimataqali manumanu kecega ena dela i vuravura, na manumanu vuka, na manumanu era dau qasi kei na ika kecega ni wasawasa. Era sa soli talega ki na ligamudou mo dou lewai ira.

³ Na manumanu kecega kei na kau drokadroka kecega ena rawa mo dou kania, au sa solia vei kemudou me kemudou kakana.

⁴ E dua wale ga na ka mo dou kakua sara ni kania, sai koya na lewe ni manumanu e tu kina na bula, o ya na kena dra.

⁵ Kevaka e dua e kauta tani na bula ni dua tale na tamata, ena totogitaki o koya. Au na solia na i totogi mate vua na manumanu sa vakamatea e dua na tamata.

⁶ O koya yadua sa vakamatea e dua na tamata, ena vakamatei o koya mai vua e dua tale, ka ni a buli na tamata me vaka na Kalou.

⁷ “Mo dou vakaluveni ka tubu me lewe vuqa, ka me ra lewe levu na nomudou kawa ka vakatawana na veiyasa i vuravura.”

⁸ A sa kaya na Kalou vei Noa kei iratou na luvena tagane.

⁹ “Au sa cakava oqo e dua na noqu veiyalayalati vata kei iko kei ira na nomu kawa,

¹⁰ kei ira talega na veika bula kecega era tiko kei iko, na manumanu vuka, na manumanu manoa, kei na manumanu kila, na ka kecega a sobu mai ena waqa.

¹¹ Oqo na veika au na vakayacora ena noqu veiyalayalati kei iko: Au sa yalataka ni na sega tale ni vakarusai na veika bula kecega ena dua tale na waluvu; ena sega tale vakadua ni dua na waluvu me na vakarusa na vuravura.”

¹² A sa kaya tale na Kalou, “Sai koya oqo na i vakatakilakila ni veiyalayalati au sa cakava kei kemudou kei ira talega na manumanu kecega,

¹³ au na biuta na noqu drodrolagi ena o. Oqo na i vakatakilakila ni noqu veiyalayalati kei vuravura.

¹⁴ Ena gauna au na ubia kina na lomalagi ena o ni uca ka rairai mai na drodrolagi ena o,

¹⁵ au na qai nanuma na ka au a yalataka vei kemudou kei ira kecega na manumanu.

¹⁶ Ena gauna ena rairai kina na drodrolagi ena o, au na qai raica na noqu veiyalayalati tawa mudu vata kei ira na veika bula kecega ena dela i vuravura.”

¹⁷ A sa kaya na Kalou vei Noa. “Sai koya oqo na i vakatakilakila ni veiyalayalati au sa cakava oqo kei ira na veika bula kecega ena dela i vuravura.”

O Noa kei Iratou na Luvena Tagane

¹⁸ Sai iratou oqo na luve i Noa tagane e ratou a sobu mai ena waqa: o Semi, kei Ame, vata kei Jefeca. (O Ame na tamadra na kai Kenani.)

¹⁹ O iratou na luve i Noa oqo e ratou sa tamadra na tamata kecega ena dela i vuravura.

²⁰ A sa yaco me dauteitei o Noa, o koya na i matai ni tamata me tea e dua na veivaini.

²¹ A sa qai gunuva eso na waini, ka mani mateni kina. A sa luvata na nona i sulu, ka qai davo luvawale tu ena loma ni nona valelaca.

²² Ni sa raica na luvawale i tamana o Ame na tama i Kenani, a mani lako yani ka tukuna vei rau na tuakana.

²³ E rau a qai kauta e dua na i tutuvi o Semi kei Jefeca ka taura e dakudrau me sivia na tabadrau ka lako vakanadaku yani ki loma ni valelaca me rau ubia na tamadrau; erau a vagolea tani na matadrau me rau kakua ni raica na nona luvawale.

²⁴ Ia ni sa yadra cake o Noa mai na nona moce ni mateni, a qai kila na ka sa cakava vua o koya na luvena tagane ka gone duadua,

²⁵ a sa kaya, “Me tau na cudru vei Kenani! Ena yaco me bobula vei ira na tuakana.”

²⁶ A sa kaya talega, “Me vakacaucautaki o Jiova na Kalou i Semi! O Kenani ena yaco me bobula i Semi.

²⁷ Me ia na Kalou na vakalevutaki i Jefeca! Me ra tiko ena vale i Semi na nona kawa! O Kenani ena yaco me bobula i Jefeca.”

²⁸ Ni oti na waluvu, a qai bula voli o Noa me 350 tale na yabaki

²⁹ ka sa qai mate ni sa yacova na yabaki 950.