Vakatekivu 6 - Vakavakadewa Vou kei na iVola tale eso

Na i Valavala Ca ni Tamata

¹ Ena gauna o ya era a lewe levu sara na kawa ni tamata ena dela i vuravura, ka sa sucu e lewe levu na luvedra yalewa,

² ka so vei ira na kawa ni lomalagi era sa raica na kedra matavinaka na goneyalewa, era sa mani tauri ira kina era sa digitaka ka vakawatitaki ira.

³ A sa qai kaya o Jiova, “Na yaloqu ena sega ni tiko vakadua vua na tamata, baleta ni sa vakaiyalayala ga na nona bula, ni sa vakayago ga. Me vakatekivu oqo, na nona bula ena sega ni sivia na 120 na yabaki.”

⁴ Ena gauna o ya, kei na gauna talega e muri, era a bula voli kina e vuravura eso na tamata tuwawa ka luvedra na yalewa era kawa ni tamata kei ira na tagane era kawa ni lomalagi. Era a tamata qaqa sara ka rogo ena gauna e liu.

⁵ Ni sa raica o Jiova na vakasisila ni nodra i valavala na tamata ena dela i vuravura kei na ca ni nodra vakanananu ena gauna kece sara,

⁶ a sa rarawataka na Kalou na nona bulia na tamata ka vakatikora e vuravura. A sa mosi sara kina vakalevu na lomana

⁷ ka sa qai kaya, “Au na vakarusa na tamata kece sara au a bulia mai na dela i vuravura. Au na vakarusa na tamata, na manumanu yava i va, na manumanu qasi voli kei na manumanu vuka kece sara. Au sa rarawataka dina na noqu a buli ira.”

⁸ Ia sa yalovinaka ga o Jiova ena vuku i Noa.

Sa Vakalomavinakataka na Kalou o Noa

⁹ Oqo na i tukutuku ni kawa i Noa. A tolu na luvena tagane; na yacadratou o Semi, Ame kei Jefeca.

¹⁰ E turaga vinaka sara o Noa, ka tamata yalododonu vei ira kecega era bula ena gauna o ya; erau sa dau veitokani vakaveivolekati kei na Kalou,

¹¹ ia era sa tamata i vakarau ca ka vakasisila na vo ni tamata ena mata ni Kalou, ka sa sinai o vuravura ena i valavala kaukauwa.

¹² A sa raici vuravura na Kalou ka liaca na kena i tuvaki vakaloloma, ka ni sa ca vakalevu na nodra i tovo na tamata kecega.

¹³ Sa qai kaya vei Noa na Kalou, “Au sa nakita me'u vakarusai ira kecega na tamata. Au na vakarusai ira vakadua ka ni sa sinai o vuravura ena nodra i valavala ca.

¹⁴ Mo la'ki taya e dua na nomu waqa ena kau vinaka: me vakarumu ka boroya e loma, e tuba talega ena kuluta.

¹⁵ Me vakaoqo na kena i tata. Na kena balavu me 133 na mita, na kena raba me 22 na mita, ka me 13 na mita na kena cecere.

¹⁶ Mo cakava na delavuvu ni waqa, ka me dua na maliwa mai na dela ni waqa ki na yasa ni waqa me rauta e 44 na senitimita. Me taba tolu, ka mo cakava e dua na katuba ena yasa ni waqa.

¹⁷ Au na qai vakavuna e dua na waluvu ena dela i vuravura me na vakarusa na veika bula kecega.

¹⁸ Ia au na cakava e dua na veiyalayalati kei iko. Mo vodo ki na nomu waqa vata kei na watimu, kei iratou na luvemu tagane, kei na dui watidratou.

¹⁹ Mo vakavodoka talega e yarua na manumanu mai na kena veimataqali kecega, me dua na ka tagane ka dua na ka yalewa, me ra bula kina.

²⁰ Me yarua mai na veimataqali manumanu kecega, lelevu se lalai; me ra vodo ki waqa me ra na bula kina.

²¹ Mo vakarautaka talega na veimataqali kakana kecega e dau laukana, me kemu kei na kedra na manumanu.”

²² A vakayacora o Noa na ka kece sara a vakarota vua na Kalou.