Vakatekivu 49 - Vakavakadewa Vou kei na iVola tale eso

Na i Otioti ni Vosa i Jekope

¹ Sa qai kacivi iratou mai na luvena tagane o Jekope ka kaya, “Dou soqoni mada mai ka me'u kaya vei kemudou na ka ena yaco vei kemudou ena veigauna mai muri.

² “Dou soqoni vata mai ka rogoca na luve i Jekope; mo dou mai rogoci Jekope na tamamudou.

³ “Rupeni, na noqu ulumatua, sai iko na noqu kaukauwa. Sai iko na i matai ni luvequ ni'u a qai tamata bula, na luvequ vakairogorogo ka kaukauwa duadua vei ira na luvequ tagane.

⁴ O sa sega ni tarovi rawa me vaka na waluvu, ia o na sega sara ni tamata uasivi duadua, Baleta ni o sa mocera e dua na wati tamamu; ka vakadukadukalitaka kina na i davodavo i tamamu.

⁵ “O Simione kei Livai erau veitacini. E rau sa vakayagataka na nodrau i yaragi me vakayacori kina na i valavala kakauwa.

⁶ Au na sega ni curu ki na nodrau veivosaki vuni; Au na sega ni wili ena nodrau bose, Baleta ni rau vakamate tamata ena dela ni nodrau cudru, ka rau vakaleqai ira na bulumakau ena dela ni nodrau yalo ca.

⁷ Me totogitaki na nodrau cudru baleta ni sa rui rerevaki, Me vakakina na nodrau yalo ca baleta ni sa rui veivakalolomataki. Au na vakatalabusesetaki rau ena vanua o Isireli, Au na veibiuyaki rau ena kedra maliwa na lewenivanua.

⁸ “O iko Juta, era na vakacaucautaki iko na tuakamu. O na vesuki ira na nomu meca ena usouso ni domodra; Era na cuva vei iko na luve i tamamu.

⁹ Sa vaka na laione o Juta, Sa vakamatea na kena meca ka suka lesu ki na nona i vunivuni, Sa vakadodo ka davo sobu. Sa sega ni dua e via vakasagai koya.

¹⁰ O Juta ena taura na i titoko tabu ni veiliutaki, O ira na nona kawa era na dauveiliutaki tikoga. Era na dauvakacerecerei koya na veimatanitu e vuqa, Ka cuva sobu ena vakarokoroko e matana.

¹¹ Sa vesuka na nona asa ki na vunivaini, Ki na vunivaini vinaka sara. Sa savata na nona i sulu ena waini Kei na nona kote ena dra ni qerepi;

¹² Na matana sa wadradra mai na waini, na batina sa vulavula ena gunu sucu.

¹³ “O Sevuloni ena tiko e baravi; Na nona matasawa ena yaco Me nodra i kelekele ni waqa talei na waqa lelevu. Na nona i yalayala Ena yaco sara vaka ki Saitoni.

¹⁴ “O Isakari e dua na asa kaukauwa, Sa davo koto ena kedra maliwa na bai ni sipi.

¹⁵ Ia sa raica na kena vinaka na vanua ni vakacegu, Ka sa rui totoka na vanua. Sa qai cuva sobu me colata na nona i colacola, Ka sa yaco kina me bobula sa vakaukauwataki me cakacaka kaukauwa.

¹⁶ “O Tani ena liutaki ira na nona tamata. Era na vakataki ira na veimataqali tale eso e Isireli.

¹⁷ O Tani ena vaka na gata e bati ni gaunisala, E dua na gata bati gaga ena yasa ni sala, Sa katia na bukubuku ni yava ni ose, Me lutu kina ki ra o koya sa vodoka tiko.

¹⁸ “Au sa waraka na nomuni veivakabulai, i Jiova.

¹⁹ “O Kata ena ravuti mai vua e dua na i lala daubutako, Ia ena ravuti ira lesu o koya ka vakasavi ira.

²⁰ “Na vanua i Aseri ena vuataka na kakana vinaka ka bulabula. Ena vakarautaka na kakana e ganita na tui.

²¹ “O Navitalai sa vaka na dia ka sa tasere, Ka sa vakasucuma na vosa vinaka.

²² “O Iosefo sa vaka e dua na kau vuavuai vinaka, Sa koto na kau dauvua ena bati ni wai tovure; Ka sa salava yani na bai vatu na tabana.

²³ Era sa ravuti koya vakaca na dauvavana; era vanai koya ka sagai koya.

²⁴ Ia sa tudei ga ka kaukauwa na nona dakaititi, Ka sa vakaukauwataki na tabana, Mai vua na Kalou Qaqa i Jekope, Mai vua na i Vakatawa, na Uluvatu i Isireli.

²⁵ Sai koya na Kalou i tamamu sa vukei iko, Na Kalou Qaqa sa vakalougatataki iko, Kei na veivakalougatataki mai na lomalagi e cake, Kei na wai titobu mai na ruku ni qele, Na veivakalougataki mai na levu ni manumanu kei ira na gone na i solisoli,

²⁶ Na veivakalougatataki ni sila kei na senikau, Na veivakalougatataki ni veiulunivanua kilai, Na veika talei mai na veidelana tudei. Na veivakalougatataki kece oqo me tau ki na ulu i Iosefo, Ena vacuvacu ni matana sa digitaki mai vei ira na tuakana.

²⁷ “O Penijamini sa vaka na olifa daukata. Ka sa dauveivakamatei ena mataka kei na yakavi.”

²⁸ Sai ira oqo na tinikarua na mataqali i Jekope, kei na ka sa kaya na tamadra vei ira me vosa vakalougatataki ira kina ni ra sa vakarau veitalatala vakadua.

Na Mate kei na Bulu nei Jekope

²⁹ Sa qai vakaroti iratou o Jekope ka kaya, “Au sa qai vakarau toki yani vei ira na wekaqu; dou qai la'ki buluti au vata kei ira na tamaqu ena qara vatu ka tiko ena vanua i Efironi na Itaiti,

³⁰ mai Makipila ena tokalau kei Mamire ena vanua o Kenani. E a volia kina o Epara-ama na qara vatu kei na vanua o ya vei Efironi na Itaiti me i bulubulu.

³¹ O ya na vanua era sa buluti Epara-ama kina kei Sera na watina; o ya na vanua era sa buluti Aisake kina kei Repeka na watina; o ya na vanua au sa buluti Lia kina.

³² Na vanua kei na qara vatu ka tiko kina, e sa voli vei ira na Itaiti.”

³³ Ia ni vakaroti ira oti na luvena o Jekope, sa qai lokia cake na yavana ki na i mocemoce ka mai ciba yani; ka sa toki yani vei ira na wekana ki na i bulubulu.