Vakatekivu 47 - Vakavakadewa Vou kei na iVola tale eso

¹ A sa lako yani o Iosefo, ka kaya vua na tui, “Sa lako mai o tamaqu kei iratou na tuakaqu mai na vanua o Kenani vata kei na nodratou sipi, na me kei na ka kecega e ratou taukena. Era sa tiko oqo ena vanua o Qoseni.”

² A sa kauti iratou e lewe lima na tuakana ka vakaraitaki iratou sara vua na tui.

³ Sa qai tarogi iratou na tui ka vaka, “A cava na nomudou cakacaka?” E ratou sa kaya, “Oi keitou saka na nomuni tamata, keitou sai vakatawanisipi, me vakataki iratou ga na tama i keitou.

⁴ “Keitou sa lako saka mai me mai tiko ena vanua oqo, baleta ni sa rui levu sara na dausiga ena vanua o Kenani ka sa sega na co me kedra na neitou manumanu. Keitou kerei kemuni mo ni solia vei keitou na nomuni tamata me keitou tiko ena vanua o Qoseni.”

⁵ Sa qai kaya na tui vei Iosefo, “Sa lako mai vei iko o tamamu kei iratou na tuakamu.

⁶ Sa tu e matamu na vanua taucoko o Ijipita. La'ki vakatikori tamamu kei iratou na tuakamu ena dua na vanua vinaka e Ijipita; solia vei iratou me ratou la'ki tiko i Qoseni, ia kevaka o kila eso na tamata gugumatua vei iratou, lesi iratou me ratou qarava na noqu manumanu.”

⁷ A sa qai kauti Jekope na tamana o Iosefo ka vakaraitaki koya vua na tui. A sa qai vosa vakalougatataka na tui o Jekope.

⁸ A sa tarogi koya na tui, “Sa vica na yabaki na dede ni nomu bula?”

⁹ A qai kaya o Jekope, “Sa 130 na yabaki ni noqu veilakoyaki. Sa lekaleka ga ka rui dredre na veiyabaki oqori, ka sa sega ni tautauvata kei na yabaki ni nodra veilakoyaki na noqu qase.”

¹⁰ A sa qai solia o Jekope vua na tui na nona veivakalougatataki ni veitalatala, ka sa gole yani.

¹¹ A sa la'ki vakatikori tamana kei iratou na tuakana o Iosefo ena vanua o Ijipita, ka solia vei iratou na tiki ni qele vinaka duadua ena vanua o Ramisese, me vaka sa vakarota na tui.

¹² A sa solia o Iosefo na kakana me baleti tamana, kei iratou na tuakana, kei na vuvale nei tamana me yaco sara vei koya ka gone.

Na Dausiga e Ijipita

¹³ A sa levu sara na dausiga ka sega na kakana ena vanua taucoko, ka ra sa malumalumu mai ena viakana na tamata e Ijipita kei Kenani.

¹⁴ A sa kumuna vata kece o Iosefo na i lavo era sa vakayagataka na tamata e Ijipita kei Kenani ena sila ka kauta ki na valenitui.

¹⁵ Ia ni oti kece na i lavo e Ijipita kei Kenani, era a lako kece mai na kai Ijipita vei Iosefo ka kaya, “Solia mai na kakana vei keimami, de keimami mate e matamuni!” Sa oti na neimami lavo.

¹⁶ Sa qai kaya o Iosefo, “Ni kauta mai na nomuni manumanu; au na solia me kena i sau na kakana, kevaka sa oti na nomuni lavo.”

¹⁷ Era sa qai kauta mai na nodra manumanu vei Iosefo, ka solia vei ira na kakana me veisau kei na nodra ose, sipi, me, bulumakau, kei na asa. Ena yabaki o ya sa solia vei ira na kakana me veisau kei na nodra manumanu kece sara.

¹⁸ Sa oti na yabaki o ya; ena yabaki ka tarava era sa lako tale mai vua ka kaya, “Keimami na sega ni vunitaka na ka dina vei kemuni, o ya ni sa oti kece na neimami lavo, ka sa nomuni na neimami manumanu. Sa sega ni dua na ka e vo me nomuni, ia sa vo ga na yago i keimami kei na neimami vanua.

¹⁹ A cava me keimami mate kina e matamuni, oi keimami kei na neimami vanua? Ni voli keimami kei na neimami vanua ena kakana. Keimami sa na qai bobula ni tui, ka me nona na neimami vanua. Ni solia vei keimami na sila me keimami bula tikoga kina, ka vakakina na i tei me keimami teivaka ki na qele.”

²⁰ A sa volia o Iosefo na vanua taucoko o Ijipita me nona na tui. Era a volitaka na kai Ijipita kece na nodra dui vanua, baleta ni sa rui levu sara ga na dausiga. A sa yaco me nona na tui na vanua taucoko.

²¹ A sa cakava o Iosefo me ra bobula na tamata mai na dua na yasa i Ijipita me yaco ki na yasana kadua.

²² Na vanua duaduaga ka sega ni volia o koya o ya na nodra vanua na bete. E sega ni dodonu me ra volitaka na nodra qele baleta ni oqo e nodra i votavota ga mai vua na tui, ka me ra bula tiko kina.

²³ Sa qai kaya o Iosefo vei ira na tamata, “Raica, au sa voli kemuni kei na nomuni vanua edaidai me nona na tui. Oqo na nomuni itei mo ni teivaka ki na qele o ni tiko kina.”

²⁴ Ena gauna sa matua kina, mo ni solia lesu vua na tui e dua na i kalima ni veika o ni tamusuka. Na kena vo mo ni qai lewa, me nomuni itei se me na kemuni kakana vakavuvale.

²⁵ Era sa qai kaya, “O ni sa vakabulai keimami; o ni sa dau yalololoma ga vei keimami, ka keimami na qai nona bobula na tui.”

²⁶ A sa vakatulewataka o Iosefo me sa yaco me lawa ni vanua o Ijipita na kena dau soli e dua na i kalima ni veika era tamusuka na tamata me i votavota ni tui. Sa rokovi tiko na lawa oqo me yacova na siga edaidai. Ia na nodra vanua duadua ga na bete sa sega ni okati me nona na tui.

Na i Otioti ni Kerekere i Jekope

²⁷ Era sa tiko na Isireli mai Qoseni ena vanua o Ijipita, ka sa yaco me ra vutuniyau ka levu na luvedra.

²⁸ A bula voli mai Ijipita o Jekope me yabaki tinikavitu, me yacova ni sa 147 na nona yabaki ni bula.

²⁹ Ia ni sa voleka mai na gauna ni nona mate, sa qai kacivi Iosefo mai na luvena ka kaya vua, “Kevaka o sa lomani au, mo biuta na ligamu ena ruku ni sagaqu, ka cavuta na nomu vosa ni bubului ni o na sega ni buluti au e Ijipita.

³⁰ Au vinakata me'u la'ki bulu vata ga kei ira na noqu qase; ia mo kauti au tani mai Ijipita ka la'ki buluti au ena nodra i bulubulu.” Sa qai sauma o Iosefo ka kaya, “Au na vakayacora me vaka na ka o vinakata.”

³¹ Sa qai kaya o Jekope, “Mo bubului mada vei au ni o na vakayacora vakakina.” A sa vosa bubului o Iosefo, ka sa ia na vakavinavinaka o Jekope ena nona i davodavo.