Vakatekivu 46 - Vakavakadewa Vou kei na iVola tale eso

Toki ki Ijipita na Vuvale nei Iosefo

¹ A mai vakarautaka yani o Jekope na veika kece sa taukena ka lako yani ki Perisepa, ka vakacabora kina eso na i soro vua na Kalou i Aisake na tamana.

² A sa vosa vua na Kalou ena dua na raivotu ena bogi ka kaya, “I Jekope, i Jekope!” A sauma o Jekope, “Oi au saka oqo.”

³ Sa qai kaya na Kalou, “Oi au na Kalou, na Kalou i tamamu. Kakua ni rere ni lako sobu ki Ijipita, au na la'ki vakatubura na nomu kawa mai kea mo yaco mo dua na matanitu levu.

⁴ Au na lako vata kei iko i Ijipita, ka'u na kauti iko lesu tale mai ki ke. Ena tiko vata kei iko o Iosefo me yacova na nomu mate.”

⁵ A sa qai biuti Perisepa o Jekope. A sa vakavodoki koya o iratou na luvena ki na qiqi sa tala mai na tui Ijipita, kei ira na dui luvedra, vata kei ira na watidra.

⁶ E ratou sa kauta na nodratou manumanu kei na ka kece sara sa rawati mai Kenani, ka lako ki Ijipita. A sa kauti ira kece na nona kawa o Jekope;

⁷ o iratou na luvena tagane, na makubuna tagane, na luvena yalewa, kei na makubuna yalewa.

⁸ Oqo na yacadra na kawa i Jekope era sa lako i Ijipita: o Jekope kei iratou na luvena tagane, o Rupeni na nona ulumatua,

⁹ kei iratou na luve i Rupeni tagane: o Inoke, o Palu, o Esironi, kei Kamai.

¹⁰ Sai iratou oqo na luve i Simione: o Jimueli, o Jamini, o Qati, o Jakini, kei Saula, o koya ka luvena e dua na yalewa ni Kenani.

¹¹ Sai iratou oqo na luve i Livai: o Kerisoni, o Koaca, kei Merari.

¹² Sai iratou oqo na luve i Juta: o Eri, o Onani, o Sela, o Peresi kei Sera. (O rau o Eri kei Onani, na luve i Juta, erau sa mate mai Kenani.) Oqo o rau na luve i Peresi: o Esironi kei Emuli.

¹³ Sai iratou oqo na luve i Isakari: o Tola, o Puva, o Jope kei Simironi.

¹⁴ Sai iratou oqo na luve i Sevuloni: o Sereti, o Eloni, kei Jalieli.

¹⁵ Sai ira o ya na luve i Lia kei Jekope mai Mesopotemia, kei na luvena yalewa o Taina. Na kedra levu taucoko na nona kawa vei Lia era lewe 33.

¹⁶ Sai iratou oqo na luve i Kata tagane: o Sifoni, o Aki, o Suni, o Esiponi, o Eri, o Aroti kei Areli.

¹⁷ Sai iratou oqo na luve i Aseri tagane: o Imina, o Isiva, o Isivi, o Piria, kei Sera na ganedratou. Oqo oi rau na luve i Peria tagane: o Eperi kei Malekieli.

¹⁸ Sai ira o ya na kawa i Silipa na vada sa solia o Lepani vei Lia na luvena yalewa.

¹⁹ Sai rau oqo na luve i Raijeli tagane na wati Jekope: o Iosefo kei Penijamini.

²⁰ Sai rau oqo na luve i Iosefo: o Manasa kei Ifereimi erau sa sucu e Ijipita vei Asenaca na luve i Potifera na bete mai Oni.

²¹ Sai ratou oqo na luve i Penijamini tagane: o Bela, o Pekeri, o Asipeli, o Kira, o Neamani, o Ei, o Rosi, o Mupimi, o Upimi kei Ariti.

²² Sai ira o ya na lewe tinikava na kawa i Jekope vei Raijeli.

²³ Na luvei i Tani tagane: o Usimi.

²⁴ Sai ira oqo na luve Navitalai: o Jasieli, o Kuni, o Jeseri kei Silemi.

²⁵ Sai ratou o ya na lewe vitu na kawa i Jekope vei Pila na vada sa solia o Lepani vei Raijeli na luvena yalewa.

²⁶ Na kedra i wiliwili kece na kawa dina i Jekope era sa lako ki Ijipita era sa lewe 66, ka ra sega ni wiliki vata kei na watidra na dui luvena tagane.

²⁷ E rua na luve i Iosefo tagane erau a sucu mai Ijipita, me ra sa qai lewe 70 taucoko kina na vuvale i Jekope era a lako ki Ijipita.

O Jekope kei na Nona Vuvale mai Ijipita

²⁸ A sa talai Juta yani o Jekope me liu, ka kerei Iosefo me ratou la'ki sota ki Qoseni. Ni ra sa yaco yani ki na vanua o Qoseni,

²⁹ sa vakarautaka na nona kareti o Iosefo, ka lako yani me tavaki Jekope na tamana. Ia ni sa raici Jekope sa mokoti koya, ka mai tagi yani ena dua na gauna balavu.

³⁰ Sa qai kaya o Jekope vei Iosefo, “Kevaka au sa na mate oqo, au sa yalo vakacegu ga baleta ni'u sa raici iko ka kila ni o se bula tikoga.”

³¹ Sa qai kaya o Iosefo vei iratou na tuakana kei na vuvale i tamana, “Au sa lako mada me'u la'ki kaya vua na tui, ‘E ratou sa lako mai vei au na tuakaqu kei na vuvale i tamaqu ka ra sa tiko mai na vanua o Kenani.

³² E ratou sai vakatawanisipi, ka dau vakana manumanu; e ratou sa kauta tale tikoga mai na nodratou sipi, na me, kei na ka kece sara e ratou taukena.’

³³ Ni sa na kacivi kemudou na tui ka tarogi kemudou, ‘A cava na nomudou cakacaka?’

³⁴ mo dou kaya, ‘Oi keitou saka na nomuni tamata keitou sai vakatawanisipi mai na gauna keitou a gone kina me vakataki ira ga na tama i keitou.’ Oqori ena vakavuna me solia kina na tui na vanua o Qoseni mo dou tiko kina.” A vosa vakaoqo o Iosefo baleta ni ra dau vakasisilataki ira na i vakatawanisipi o ira na kai Ijipita.