Vakatekivu 43 - Vakavakadewa Vou kei na iVola tale eso

Sa Kau ki Ijipita o Penijamini

¹ Sa qai levu sara na dausiga ena vanua o Kenani.

² Ena gauna era sa kania oti kina na vuvale i Jekope na sila era a kauta mai Ijipita, a sa kaya tale o Jekope vei iratou na luvena tagane, “Dou lako ka la'ki volia tale mai vakalailai eso na kakana me keda.”

³ Sa qai kaya vua o Juta, “Sa vakaroti keitou matua sara na tamata o ya ka kaya ni na sega ni vakatarai me keitou lai raici koya tale ka vakavo duadua kevaka sa tiko kei kemudou na taci keitou.

⁴ Kevaka o na solia na taci keitou me keitou lako vata, keitou na qai la'ki voli kedatou kakana mai.

⁵ Ia kevaka o na sega ni soli koya, keitou na sega ni lako, baleta ni sa kaya na tamata o ya, ‘Dou na sega ni vakatarai mo dou rairai tale mai ki mataqu, vakavo ke sa tiko kei kemudou na tacimudou.’ ”

⁶ Sa qai kaya o Jekope, “A cava dou sa cakava kina vakaoqo vei au, ena nomudou kaya vua ni dua tale tiko na tacimudou?”

⁷ E ratou sa qai kaya, “Sa vakataroga vakavinaka sara na tamata o ya na veika me baleti keitou kei na matavuvale, ‘E se bula tiko na tamamudou? E dua tale tiko li na tacimudou?’ Keitou a sauma kece na nona taro. E rawa vakacava me keitou kila ni na tukuna me keitou mai kauta yani na taci i keitou?”

⁸ Sa qai kaya o Juta vei tamana, “Vakatalai Penijamini vata kei au, keirau sa na lako sara ga oqo. Ena sega kina ni dua vei kedatou me mate ena vuku ni viakana.

⁹ Au sa yalataka na noqu bula ena vukuna; ka mo solia vei au na i tavi me'u na dau raici koya tiko. Kevaka au na sega ni kauti koya lesu bula mai vei iko, au sa tu vakarau me'u beitaki kina ena noqu bula taucoko.

¹⁰ Kevaka tou a sega ni wawa tiko vakadede, ke keitou a sa lesu tale mai oqo vakarua.”

¹¹ Sa qai kaya vei iratou o tamadratou, “Kevaka e sa vakaoqori, dou cakava na ka oqo: dou kauta eso na vuata vinaka sara ni vanua oqo me i loloma vua na kovana: me vakalailai na i lumu wainimate, na oni, na drega, na mura, na ivi, kei na amodi.

¹² Me vakaruataki talega na levu ni lavo mo dou kauta, baleta ni dou na kauta lesu tale tikoga na i lavo ka vakalesui mai ena nomudou taga. De rairai a vakacalakataki na kena a biu cala mai.

¹³ Dou kauta na tacimudou ka totolo lesu tale mai.

¹⁴ Ia me vakavuna na Kalou Kaukauwa vua na tamata o ya me lomani kemudou, ka me soli tacimudou kei Penijamini lesu vei kemudou. Kevaka sa dodonu me ratou kau tani vei au na luvequ, ia me ratou kau tani ga.”

¹⁵ E ratou sa mai taura yani na i loloma, kei na i lavo a vakaruataki na kena levu vata kei Penijamini. E ratou a cavutu sara ka lako yani ki Ijipita, me ratou la'ki rairai sara vei Iosefo.

¹⁶ Ni sa raici Penijamini kei iratou o Iosefo, sa kaya vua na tamata sa dau qarava na nona vale, “Kauti iratou na tamata oqo ki vale, mokuta e dua na manumanu, ka vakarautaka, ka ni ratou na la'ki vakayakavi vata kei au”

¹⁷ A sa vakayacora na tamata o ya na ka sa vakarota vua o Iosefo, ka kauti iratou ki na vale i Iosefo.

¹⁸ Sa dua tani na nodratou rere ni ratou sa kau ki na vale i Iosefo, ka ni ratou nanuma, “E datou sa kau mai ki ke baleta na i lavo ka a vakasukai ki na nodatou taga e liu. Era na vesuki kedatou, ka taura na nodatou asa, ka kauti kedatou me nona bobula.”

¹⁹ Ia e ratou sa lako yani vua na i vakatawa ni vale ka kaya vua e katuba,

²⁰ “Ni yalo vinaka na turaga, keitou sa lako mai ki ke e liu, me voli kakana.

²¹ Ia ni keitou sa yaco ki na vanua me keitou vakacegu kina, keitou sa qai dolava na neitou dui taga, ka raica na neitou dui taga i lavo ni tiko kecega kina na neitou dui i lavo. Keitou sa kauta lesu tale mai oqo,

²² Keitou sa kauta mai eso tale na i lavo me keitou mai voli kakana kina. Keitou sega sara ni kila se o cei a biuta lesu tale na neitou i lavo ki na dui neitou taga”

²³ Sa qai kaya na dauveiqaravi, “Dou kakua ni taqaya, dou kakua ni rere. Na nomudou Kalou, na nona Kalou na tamamudou sa rairai biuta vakaidina na i yau oqori ki na nomudou taga me baleti kemudou. Au a sa taura oti na nomudou i sau ni kakana e liu.” A sa qai kauti Simione mai vei iratou.

²⁴ Sa qai kauti iratou o koya na dauveiqaravi ki na vale i Iosefo ka solia vei iratou na wai me ratou vuya kina na yavadratou; ka vakania talega na nodratou asa.

²⁵ E ratou sa mai vakarautaka sara toka yani na nodratou i loloma me baleta na lako mai i Iosefo ena yakavi, ka ni ratou sa rogoca ni ratou na kana e kea.

²⁶ Ni lesu mai o Iosefo, e ratou sa la'ki cuva sobu ki na qele e matana.

²⁷ Sa mai taroga yani na i tuvaki ni nodratou bula, ka kaya, “E sa vakacava tiko na tamamudou o dou a kaya vei au? E vakaevei, e se bula tiko?”

²⁸ E ratou sa qai kaya, “Na nomuni tamata na tama i keitou e se bula, ka bulabula vinaka tiko.” E ratou sa qai cuva sobu yani ena vakarokoroko vua.

²⁹ Ni sa raici Penijamini na tacina dina o Iosefo, a sa kaya, “Sai koya li oqo na tacimudou o dou a kaya vei au? Me vakalougatataki iko na Kalou, i na luvequ.”

³⁰ A qai biuti iratou yani vakasauri o Iosefo, baleta ni sa rui luluvu na yalona ena vuku i tacina, ka sa voleka sara ni turu na wai ni matana; ia sa gole ga yani i loma ni nona rumu ka tagi.

³¹ Ni sa savata oti na matana, a sa lako tale mai ki tuba, ni sa qai tauri koya vakavinaka, ka vakarota me vakarautaki na kakana.

³² A sa vakarautaki na kakana kei Iosefo ena dua na teveli, ka vakarautaki na kedratou na tuakana ena dua tale. A sa vakarautaki tani ga na kedra na kai Ijipita, baleta ni tabu vei ira na kai Ijipita me ra kana vata kei ira na Iperiu.

³³ E ratou sa dabe na veitacini ena teveli, ka ratou veiraici mata toka kei Iosefo, ka ratou tuvani veitarataravi mai vei koya e qase sara kivei koya e gone duadua. Ni ratou sa raica na veitarataravi ni nodratou i dabedabe, e ratou sa veiraici ena kurabui.

³⁴ A sa vakarautaki mai na teveli i Iosefo na kedratou kakana, ka sa vakalimataki na i vakarau ni kakana e soli vei Penijamini mai vei iratou na kena vo. E ratou sa qai kana ka gunu vata kei Iosefo ena marau.