Vakatekivu 42 - Vakavakadewa Vou kei na iVola tale eso

La'ki Voli Sila i Ijipita na Tuakai Iosefo

¹ Ia ni sa kila o Jekope ni tu na sila mai Ijipita, sa kaya vei iratou na luvena tagane, “A cava dou sa tu wale ga kina ka sega ni cakava e dua na ka?

² Au sa rogoca ni sa tu na sila mai Ijipita, dou lako mada ka volia mai eso na keda, me da kakua ni mate ena viakana.”

³ A ratou sa qai lako kina e lewe tini na tuakai Iosefo me ratou la'ki voli sila ki Ijipita.

⁴ A sa sega ni soli Penijamini na taci Iosefo o Jekope me lako vata kei iratou na tuakana, baleta ni sa taqayataka de na yacovi koya e dua na leqa.

⁵ E ratou sa mai lako yani na luve i Jekope kei ira tale eso me ra la'ki voli sila ni sa dausiga talega na vanua o Kenani.

⁶ Sa kovana tiko ena vanua o Ijipita o Iosefo, ka volitaka tiko na sila vei ira kecega na tamata e vuravura. Ia ni ratou sa lako yani na tuakai Iosefo, e ratou sa cuva sobu ki na qele e matana.

⁷ Sa raici iratou o Iosefo ka kilai iratou, ia sa sega ni vakatakilai koya vei iratou. Sa qai vosa vakaukauwa vei iratou ka kaya, “Dou sa lako mai vei?” E ratou sa kaya, “Keitou sa lako mai Kenani me keitou mai voli kakana.”

⁸ A sa kilai iratou na tuakana o Iosefo, ia e ratou sa sega ni kilai koya.

⁹ Sa qai nanuma na tadra ka a tadra me baleti iratou ka kaya, “Oi kemudou na yamata, o dou sa mai vakadikeva na ka sa malumalumu kina na vanua oqo.”

¹⁰ E ratou sa qai kaya, “E sega saka! Keitou sa lako ga mai na nomuni tamata me voli kakana.

¹¹ Keitou sa luvena taucoko saka e dua ga na tamata. Keitou sa tamata dina ka sega saka ni yamata.”

¹² Sa qai kaya o Iosefo vei iratou, “E sega! O dou sa lako mai mo dou mai vakadikeva na ka sa malumalumu kina na vanua oqo.”

¹³ E ratou sa kaya, “Keitou sa lewe tinikarua saka na veitacini, keitou luvena e dua saka ga na tamata mai na vanua o Kenani. O koya e gone sara sa tiko ga yani kei tama i keitou, ka dua saka tale sa mate.”

¹⁴ Sa sauma yani o Iosefo, “Sa donu vinaka na veika au sa kaya, dou sa yamata o kemudou.

¹⁵ Sai koya oqo na ka mo dou vakadinadinataka kina: Au sa bubului ena yaca ni tui ni dou na sega ni biuta na vanua oqo me yacova sara ni sa lako mai eke na tacimudou.

¹⁶ Dou tala e dua vei kemudou me la'ki kauti koya mai. Ia o kemudou na kena vo dou na vesu tiko mai me yacova ni sa vakadinadinataki na nomudou vosa. Kevaka ena sega, me vaka sa bula na tui, dou sa okati ga ni dou sa yamata vuni.”

¹⁷ Sa mai biuti iratou kece yani ki na valeniveivesu me tolu na siga.

¹⁸ Ena i katolu ni siga sa kaya vei iratou o Iosefo, “Oqo na ka mo dou cakava mo dou bula kina, ka ni'u sa rerevaka talega na Kalou.

¹⁹ Kevaka o dou sa tamata vinaka, e dua ga vei kemudou me tiko ena valeniveivesu; ia oi kemudou na kena vo, dou kauta yani na kemudou sila sa voli oti ki na nomudou veivuvale ni ra sa viakana tu.

²⁰ Dou kauta sara mai vei au na tacimudou gone, me macala kina na dina ni ka o dou kaya, dou na qai sega ni mate.” E ratou sa mai vakadonuya yani na ka oqo.

²¹ E ratou sa qai veivosaki vakai iratou, “Sa dina sara, e datou sa qai sotava oqo na i sau ni cala tou a cakava vua na tacidatou, ni datou a sa raica na nona rarawa kei na nona kere bula, ia tou a qai sega ni via rogoci koya. Oqo na vuna sa yacovi kedatou tiko kina na leqa oqo.”

²² Sa qai kaya o Rupeni, “Au a sa kaya oti mo dou kakua ni vakamavoataka na tacidatou, ia dou a sega ni via rogoca. Ia oqo sa saumi lesu vei kedatou na nona mate.”

²³ E ratou sa sega ni kila ni macala vinaka tu vei Iosefo na ka e ratou sa kaya, ka ni a tiko e dua na dauvakadewa vosa ena kedratou maliwa.

²⁴ Sa lako tani mada mai vei iratou o Iosefo ka tagi. Ia ni sa rawa ni vosa tale vei iratou, sa lesu tale yani ka tauri Simione, ka vesuki koya e matadratou.

Lesu na Tuakai Iosefo ki Kenani

²⁵ Sa qai lewa o Iosefo me tawa na sila ena taga, ka me biu na dui nodratou i lavo ena nodratou taga, ka me soli talega na i vaqa ni nodratou i lakolako; sa mani vakayacori vakakina vei iratou.

²⁶ E ratou sa vakavodoka yani na nodratou asa ena sila e ratou a volia ka lako yani.

²⁷ Ia ni ratou sa la'ki vakacegu ni sa bogi na vanua, sa qai dolava na nona taga e dua vei iratou me vakania na nona asa; a sa qai kunea na nona i lavo ena dela ni taga.

²⁸ Sa qai kaya vei iratou na tacina, “Sa vakalesui tale mai vei au na noqu i lavo, sa tiko ga oqo ena dela ni noqu taga.” A sa taqaya na yalodratou, ka ratou veiraici ena rere ka kaya, “Na cava sa cakava oqo vei kedatou na Kalou?”

²⁹ Ia ni ratou sa yaco yani ki Kenani, e ratou a tukuna vei Jekope na tamadratou na ka kece sara sa yacovi iratou, ka kaya,

³⁰ “Sa vosa vakaukauwa sara vei keitou na kovana ni Ijipita, ka beitaki keitou ena cakacaka vakayamatavuni ki na nodra vanua.”

³¹ Keitou sa kaya vua, ‘Keitou sa tamata dodonu, ka sega ni yamatavuni.

³² Keitou sa lewe tinikarua na veitacini, keitou sa luvena tagane e dua ga na tamata. E dua sa mate, ka tiko yani o koya e gone sara vata kei tama i keitou mai Kenani.’

³³ Sa qai kaya na tamata o ya, ‘Oqo na ka me i vakadinadina ni dou sa tamata dodonu: e dua vei kemudou me na tiko mai eke, na kena vo mo dou kauta yani na sila ki na nomudou vuvale sa viakana tu.

³⁴ Dou la'ki kauta mai vei au na tacimudou ka gone duadua. Au na qai kila kina ni dou sa sega ni yamatavuni, ka dou sa tamata dodonu ga; ka'u na qai solia tale vei kemudou na tacimudou, ka dou sa na qai rawa tale ni veivoli ena vanua oqo.’ ”

³⁵ Ia ni ratou sova na nodratou taga, sa tiko ga na dui nodratou taga i lavo, e ratou sa rere vata kei tamadratou.

³⁶ Sa qai kaya vei iratou o Jekope na tamadratou, “Dou sa vakararawataki au, ni dou sega ni laiva e dua na gone vei au. Sa yali o Iosefo; sa yali o Simione, ia oqo dou sa via kauti Penijamini tale.”

³⁷ Sa qai kaya o Rupeni vei tamana, “Kevaka au na sega ni kauti Penijamini lesu tale mai vei iko, mo vakamatei rau na luvequ tagane. Laivi koya ki na ligaqu, au na kauti koya lesu mai vei iko.”

³⁸ Sa qai kaya o Jekope, “Ena sega ni lako kei kemudou na luvequ oqo; sa mate o tuakana ka sa vo duadua ga o koya. Ena rawa ni yacovi koya e dua na leqa ena nomudou i lakolako. Au sa qase sara, kei na rarawa dou na vakayacora vei au ena vakamatei au.”