Vakatekivu 41 - Vakavakadewa Vou kei na iVola tale eso

Vakadewataka o Iosefo na Tadra ni Tui

¹ Ni sa oti e rua na yabaki, sa qai tadra na tui Ijipita; a sa raica ni a tucake tu ena bati ni Uciwai na Naile,

² ka ratou cabe cake mai ena uciwai e vitu na bulumakau urouro vinaka, ka ra mai kana voli ena veico.

³ E ratou qai cabe cake talega mai ena uciwai e vitu tale na bulumakau; era sa bulumakau lila ka suivotu. Era a mai duri vata tu kei iratou na vo ni bulumakau kadua ena bati ni uciwai.

⁴ Ia o iratou na vitu na bulumakau lila ka suivotu, e ratou sa qai kani iratou na vitu na bulumakau urouro. A sa qai yadra na tui.

⁵ A sa qai moce ka tadra tale. Ia oqo, sa raica e vitu na sola ni sila ni ratou tubu toka ena dua ga na vuna; e ratou tawa vinaka sara ka sa matua talega.

⁶ Ia sa qai tubu talega mai e vitu na sola ni sila lila ka malai ena cagi tokalau ni vanua lala.

⁷ O iratou na sola ni sila lila, e ratou sa qai tilomi iratou na sola ni sila tawa ka matua vinaka. Sa qai yadra na tui ka qai kila ni tadra wale ga.

⁸ Ia ni sa mataka mai na vanua, a sa lomaleqa sara vakalevu. Sa qai talatala yani me ra lako kece mai na daucakamana kei na tamata vuku mai Ijipita. Sa qai kaya vei ira na nona tadra, ia sa sega sara ni dua me kaya rawa vua na kena i balebale.

⁹ Sa qai kaya na i liuliu ni dautalowaini vua na tui, “E daidai au sa qai nanuma lesu tale mai na noqu cala.

¹⁰ O ni a cudruvi au kei na i liuliu ni dauvavavi ena dua na gauna, ka qai biuti keirau vakavesu ena vale i koya na turaganivalu ni matayadra.

¹¹ Ena dua na bogi keirau a qai tadra, ia sa duidui ga na i balebale ni neirau tadra yadudua.

¹² A sa tiko talega kei keirau mai kea e dua na cauravou ni Iperiu, a nona bobula na turaganivalu ni matayadra. Keirau a vakaraitaka vua na neirau tadra, ka sa qai kaya vei keirau o koya na kena i balebale.

¹³ Ia sa qai yaco dina na ka sa kaya; o ni a vakalesui au lesu tale ki na noqu cakacaka, ka vakamatei koya na i liuliu ni dauvavavi ena nomuni a vakalilici koya.”

¹⁴ Sa qai talatala na tui me kau mai o Iosefo, ka ra sa kauti koya vakatotolo mai valeniveivesu. Ia ni sa mai toro oti ka veisau na nona i sulu, a rairai sara yani vua na tui.

¹⁵ Sa qai kaya na tui vei Iosefo, “Au a raica e dua na tadra, ka sega ni dua e rawa ni vakamacalataka na kena i balebale. Ia au sa rogoca na ka sa tukuni me baleti iko, ni o rawa ni vakamacalataka na i balebale ni tadra eso.”

¹⁶ Sa qai sauma o Iosefo ka kaya, “E sega ni o au; ia na Kalou ga ena vakatakila vua na tui na i balebale ni nona tadra.”

¹⁷ Sa qai kaya na tui, “Au a tadra ni'u a tucake tu ena bati ni uciwai na Naile,

¹⁸ ka ratou a qai cabe cake mai ena uciwai e vitu na bulumakau urouro vinaka ka mai kana voli ena veico.

¹⁹ Ni oti o ya, e ratou qai cabe cake mai e vitu tale na bulumakau, ia e ratou bulumakau suivotu, ka lila, ka rairai ca. Oqo eso na bulumakau rairai ca duadua me'u bau raica e Ijipita.

²⁰ E ratou a qai kani iratou na bulumakau urouro na bulumakau lila.

²¹ Ia ni ratou sa kania oti, sa sega sara ga ni bau vakilai vei iratou baleta ni ratou se lila tu ga me vaka e liu. Au a mai yadra sara yani.

²² Au a raica talega ena noqu tadra e vitu na sola ni sila tawa vinaka ka sa matua ena dua ga na vuna.

²³ Sa tubu talega mai e vitu na sola ni sila lala ka malai ena cagi tokalau ni vanua lala.

²⁴ E ratou sa qai tilomi iratou na sola ni sila tawa vinaka na sola ni sila lala. Au sa vakaraitaka oti na tadra oqo vei ira na daucakamana, ia sa sega sara ni dua me bau vakamacalataka rawa vei au.”

²⁵ Sa qai kaya o Iosefo vua na tui, “Sa dua ga na i balebale ni tadra ruarua oqo ni tui; sa vakatakila vei kemuni na Kalou na ka sa vakarau me vakayacora.

²⁶ Na vitu na bulumakau yago vinaka sai koya e vitu na yabaki; kei na vitu na sola ni sila vinaka sa vitu talega na yabaki; ia sa tautauvata ga na kedrau i balebale.

²⁷ Ia na vitu na bulumakau lila e ratou sa qai cabe cake mai muri, kei na vitu na sola ni sila lala ka malai ena cagi tokalau ni vanua lala sai koya e vitu na yabaki ni dausiga.

²⁸ Ena yaco me vaka na ka au sa kaya vei kemuni, sa vakatakila vei kemuni na Kalou na ka ena cakava.

²⁹ Ena vitu na yabaki ni sautu ena vanua taucoko o Ijipita.

³⁰ Ni sa oti o ya, ena tarava mai e vitu na yabaki ni dausiga, ka na qai guilecavi kina na veiyabaki vinaka i Ijipita, baleta ni na vakacacana sara na vanua oqo na dausiga.

³¹ Na gauna ni sautu ena guilecavi vakadua, baleta ni na vakadomobula sara na leqa ena kauta mai na dausiga.

³² Na kena yaco vakarua na tadra vua na tui sa kena i balebale ni sa vakadeitaka na Kalou na ka oqo, ka na vakayacora o koya ena dua na gauna lekaleka mai oqo.

³³ “Ia oqo mo ni qai digitaka kina na tui e dua na tamata kila-ka ka yalomatua me lewa na vanua o Ijipita.

³⁴ Mo ni lesia talega eso na vakailesilesi ena vanua taucoko, ka me ra taura vakatikitiki e dua na i kalima ni vua ni qele kece ena loma ni vitu na yabaki ni sautu.

³⁵ Mo ni vakaroti ira me ra kumuna vata na kakana kece oqo ena loma ni gauna vinaka sa lako tiko mai, ka mo ni vakadonuya me kumuni vata ka maroroi na kakana kece oqo ena veikoro, ka me yadravi vinaka.

³⁶ Na kakana o ya ena maroroi me baleta na vanua oqo ena loma ni vitu na yabaki ni dausiga ena yacovi Ijipita; ka me na kakua ni rusa na vanua o Ijipita ena gauna ni dausiga.”

Lesi me Kovana e Ijipita o Iosefo

³⁷ Sa marautaka na tui kei ira kece sara na nona vakailesilesi na i tuvatuva oqo.

³⁸ A sa kaya na tui vei ira na nona vakailesilesi, “Eda na kunea rawa li e dua tale na tamata me vakaoqo, ka me tiko vua na yalo ni Kalou?”

³⁹ Sa qai kaya na tui vei Iosefo, “Me vaka ni sa vakaraitaka vei iko na Kalou na ka kece oqo, sa sega tale ni qai dua me tamata kila-ka ka yalomatua me vakataki iko.

⁴⁰ Au na lesi iko oqo mo lewa na kena qaravi na noqu vanua, ka ra na vakarorogo vei iko na tamata kecega. Era na tiko kece sara ena ruku ni nomu lewa ka qai vakavo duadua ga oi au.”

⁴¹ Sa qai kaya na tui vei Iosefo, “Raica, au sa lesi iko oqo mo kovana ni vanua taucoko o Ijipita.”

⁴² Sa qai luvata na tui na nona mama mai na ligana ka daramaka ki na i qaqalo i Iosefo, ka vakasulumi koya ena i sulu lineni vinaka sara, sa qai vakataubena e domona e dua na i taube koula.

⁴³ Sa qai vakavodoki koya yani ena i karua ni nona kareti vakatui, ka ra liu vua na matayadra vakatui ka kailavaka voli, “Mo ni tekiduru!” A sa digitaki o Iosefo me kovana ena vanua taucoko o Ijipita.

⁴⁴ Sa qai kaya vua na tui, “Oi au na tui, ena sega ni dua na tamata ena vanua taucoko o Ijipita me na bau laveta e dua na ligana se yavana, ka vakavo kevaka o sa lewa.”

⁴⁵ A sa vakatoka me yaca i Iosefo o Savenaca Panea, ka soli Asenaca na luve i Potifera na bete yalewa mai Oni vua me watina. A sa soli na lewa ni vanua taucoko o Ijipita vei Iosefo.

⁴⁶ A sa yabaki 30 o Iosefo ni sa tekivu me veiqaravi vua na tui Ijipita. A sa lako tani mai na mata ni tui ka vakalakova na vanua taucoko sara o Ijipita.

⁴⁷ Ena loma ni vitu na yabaki ni sautu, a sa levu sara na vua ni qele.

⁴⁸ Sa qai kumuna vata yani o Iosefo na kakana ena loma ni vitu na yabaki ni sautu ena vanua o Ijipita, ka maroroi tu ena veikorokoro. A sa maroroya ena veikoro yadua na kakana a rawa mai na kena i teitei sa wavolita.

⁴⁹ Sa levu sara na sila sa kumuna rawa, ka sa vaka na nuku ni matasawa. A sa sivia na levu ni sila, ka sa la'ki mudu mai na kena vakarautaki ka ni sa sega ni caka rawa.

⁵⁰ Ni bera na veiyabaki ni dausiga, a sa rua na luve i Iosefo tagane vei Asenaca na watina.

⁵¹ A sa kaya o Iosefo, “Na Kalou sa vakavuna me'u guilecava na noqu rarawa taucoko kei na lewe ni vuvale i tamaqu, ka sa vakatoka kina na nona ulumatua me yacana o Manasa.”

⁵² A sa kaya talega vakaoqo, “Na Kalou sa solia na gone vei au ena vanua ni noqu rarawa”; ka sa vakatoka kina na kena i karua ni gone me yacana o Ifereimi.

⁵³ A sa qai mai cava yani na vitu na yabaki ni sautu ena vanua o Ijipita,

⁵⁴ ka sa tekivu na yabaki e vitu ni dausiga, me vaka sa kaya o Iosefo. Sa qai dausiga na veivanua kece sara, ia sa tu ga na kakana ena vanua kece o Ijipita.

⁵⁵ Ia ni sa yaco na viakana e Ijipita taucoko, era sa qai tagi vua na tui na tamata me so na kedra. Sa qai kaya vei ira kecega na kai Ijipita na tui, “Ni lako vei Iosefo, ka vakayacora na ka e kaya vei kemuni.”

⁵⁶ Ia ni sa tete yani na dausiga ena vanua taucoko o Ijipita, sa qai dolava na valeniyau kecega o Iosefo ka volitaka na sila vei ira na kai Ijipita.

⁵⁷ Era sa lako yani i Ijipita na tamata mai na veiyasa i vuravura kecega me ra voli sila vei Iosefo, baleta ni sa levu sara na dausiga e vuravura taucoko.