Vakatekivu 33 - Vakavakadewa Vou kei na iVola tale eso

E Rau sa Sota o Jekope kei Iso

¹ A sa raici Iso o Jekope ni sa lako tiko mai vakayawa vata kei na 400 na nona tamata. Sa qai wasei ira na luvena o koya vei Lia, kei Raijeli, kei rau na nodrau yalewa dauveiqaravi.

² E a lesi rau na yalewa dauveiqaravi kei iratou na luvedrau me ratou liu sara tiko, ka tarava yani o Lia kei iratou na luvena, ka qai muri sara yani o Raijeli kei Iosefo.

³ A sa qai liu sara vei ira kece o Jekope, ka sa cuva vakavitu ki na qele, ni sa toro voleka yani vei tuakana.

⁴ Ia sa cici yani o Iso me sotavi koya, ka sa mokota, ka reguci koya, ka rau sa ia na veitagicaki.

⁵ Ni sa veiraiyaki o Iso ka raici iratou na yalewa kei ira na gone, a sa qai taroga, “O ira mai vei oqo era sa tiko vata kei iko?” A sa kaya o Jekope, “Sai ira saka oqo na gone sa solia mai vei au na Kalou me vaka na nona yalovinaka.”

⁶ E rau sa qai lako mai na yalewa dauveiqaravi kei iratou na luvedrau, ka cuva vua;

⁷ ka tarava mai o Lia kei ratou na luvena, ka qai muri sara mai o Iosefo kei Raijeli; era sa lako yani ka cuva vua.

⁸ Sa qai taroga o Iso, “E vakacava ga na matailawalawa kei na qele ni manumanu era se liu taumada mai? A cava na kena i balebale o ya?” A sauma o Jekope, “Oqori na veika me'u kune loloma kina vua na noqu turaga.”

⁹ Ia sa kaya o Iso, “I taciqu, sa rauti au vinaka na veika au sa taukena; mo la'ki maroroya ga na ka sa tu vei iko me nomu.”

¹⁰ A sa kaya o Jekope, “E sega! Au sa kerea me kua. Ni kevaka o ni sa lomani au, ni taura na noqu i loloma; na noqu raica na matamuni sa vaka na noqu raica na mata ni Kalou, ia o ni sa ciqomi au ena yalololoma.

¹¹ Yalo vinaka, ni ciqoma na i solisoli oqo ka'u sa kauta mai me nomuni, baleta ni sa vakalougatataki au na Kalou ka sa solia vei au na veika taucoko e ganiti au.” A sa cikevi koya matua sara o Jekope me yacova ni sa vakadonuya.

¹² A sa kaya o Iso, “Me daru sa gole yani. Au na liu vei iko.”

¹³ A sauma o Jekope, “O ni sa kila na noqu turaga ni ra se malumalumu na gone, ka dodonu me'u nanumi ira talega na manumanu kei na luvedra. Kevaka era vakusakusataki ena loma ni dua mada ga na siga, era na mate taucoko.

¹⁴ Mo ni yalovinaka ka liu yani, ka'u na muri yani vakamalua, ka me vakatautaki ena totolo ni nodra toso na manumanu kei ira na gone me yacova ni daru sota yani mai Itomi.”

¹⁵ Sa qai kaya o Iso, “Me'u lesia mada eso na noqu tamata me ra salavata mai kei iko.” A sa sauma o Jekope, “E sega ni kilikili me vakakina, ka ni'u sa gadreva ga mo ni yalololoma vei au.”

¹⁶ Ena siga o ya, a sa qai gole yani e liu o Iso me lesu tale ki Itomi.

¹⁷ Ia sa gole yani ki Sukoci o Jekope ka tara kina e dua na nona vale kei na vanua ni vakaruru ni nona manumanu. Oqori na vuna e vakatokai kina na vanua koya me o Sukoci.

¹⁸ A sa yaco bula mai o Jekope ki Sikemi ena vanua o Kenani ena nona i lakolako mai Mesopotemia, ka sa mai vakaitikotiko donuya na koro.

¹⁹ E a volia na tiki ni qele oqori mai vei ira na kawa i Amori na tamai Sikemi ena 100 na tiki ni siliva.

²⁰ A sa tara cake mai kea e dua na i cabocabonisoro, ka sa vakatoka na yacana me o Na Kalou, Na Kalou ni Isireli.