Vakatekivu 32 - Vakavakadewa Vou kei na iVola tale eso

Sa Vakavakarau o Jekope me Sotavi Iso

¹ Ni sa gole yani o Jekope ena nona i lakolako, a sa qai sota kei ira na agilosi ni Kalou.

² Ia ni sa raici ira, sa qai kaya, “Oqo na keba ni Kalou”; ka sa qai vakatoka kina na vanua o ya me yacana o Meneimi.

³ Sa qai mani tala yani eso na mata o Jekope me ra liu vei Iso na tuakana, ki na vanua o Sia ena matanitu o Itomi.

⁴ A sa vakaroti ira me ra kaya: “Dou la'ki vosa vakaoqo vua na noqu turaga o Iso, ‘E kaya mai vakaoqo na nomuni tamata o Jekope; Au sa tiko voli ga kei Lepani, ka sa dede kina na noqu lesu tale mai me yacova mai na gauna oqo.

⁵ Sa tu na noqu bulumakau, na asa, na sipi, na me, kei ira na nona tamata. Au sa talatala yani vua na noqu turaga, ka'u sa vinakata me'u kune loloma e matamuni.’ ”

⁶ Era sa lesu mai na mata ka mai tukuna vei Jekope, “Keitou sa lako vua na tuakamu o Iso, ka sa lako tiko mai me tavaki iko. E salavata voli mai kei koya era lewe 400 na tamata.”

⁷ A sa rere ka kidroa o Jekope, ka sa lako mai ka wasei ira vakarua na tamata era tiko kaya, ka vakakina na sipi, na bulumakau kei na kameli.

⁸ Na nona vakasama sa kaya vakaoqo, “Kevaka e lako mai o Iso ka ravuta na i matai ni wasewase, era na rawa ni dro bula na kena i karua.”

⁹ Sa qai masu o Jekope ka kaya, “Kemuni na Kalou i Epara-ama na tukaqu, na Kalou i Aisake na tamaqu, mo ni rogoci au mada! Oi kemuni ga sa kaya vei au me'u lesu tale ki na noqu vanua vei ira na wekaqu, ka o ni na cakava me vinaka na ka kecega sa yacovi au.

¹⁰ Sa sega ni kilikili kei au na nomuni loloma tawa yalani kei na nomuni yalodina o ni sa vakaraitaka vei au na nomuni tamata. Au sa lako kosova na Joritani ena liga lala ka vakavo duadua ga na noqu i titoko; ia oqo, au sa lesu mai kei na rua na matailawalawa.

¹¹ Au sa kerei kemuni kina, mo ni yalololoma ka vakabulai au mai na liga i Iso na tuakaqu. Au sa rerevaki koya, de sa mani lako mai oqo ka mokuti keimami kece, ka okati kina o ira na yalewa kei na luvedra.

¹² Mo ni qai nanuma na nomuni vosa ni yalayala ena nomuni na cakava me vinaka na ka kecega sa yacovi au, ka vakalevutaka talega na noqu kawa me vaka na nuku ni matasawa, era na sega ni wiliki rawa.”

¹³ A sa moce mai kea ena bogi o ya o Jekope, ka sa wasea eso na ka e tu vua me i loloma vei Iso na tuakana;

¹⁴ e 200 na me yalewa kei na 20 na ka tagane, e 200 na sipi yalewa kei na 20 na ka tagane,

¹⁵ e 30 na tina ni kameli kei ira na luvedra, e 40na bulumakau yalewa ka 10 na ka tagane.

¹⁶ A sa biuti ira vakaiwasewase na manumanu ka lesia yadua na nona tamata me ra vakatawana na veiqele ni manumanu. Sa qai kaya vei ira, “Dou liu yani, ka me veilutuki toka na i lakolako ni veiqele ni manumanu yadua.”

¹⁷ Sa qai vakaroti koya sa liutaka na i lakolako, ka kaya “Ni sa sotavi iko o Iso na tuakaqu ka tarogi iko ‘O cei na nomu turaga? O sa lako tiko ki vei? E nei cei na manumanu oqo?’

¹⁸ Mo qai kaya, ‘Sa nei Jekope na nomuni tamata, era sa kau mai me i loloma vei Iso na noqu turaga; ia sa muri tiko mai o Jekope.’ ”

¹⁹ Sa vakaroti koya talega vakakina na kena i karua kei na kena i katolu, kei ira kece era kauti ira yani na qele ni manumanu, me ra kaya talega na ka o ya vei Iso ni ra sa sota.

²⁰ Mo dou qai kaya, ‘Ia sa qai muri sara tiko mai o Jekope na nomuni tamata.’ A sa vakasamataka o Jekope, “Au na vakayalovinakataki koya ena i loloma sa kau oqo e liu; ka me rawa ni ciqomi au kina ena gauna keirau sota kina ena matana votu.”

²¹ A sa vakauta yani e liu na i loloma, ka a moce ga ena keba o koya.

Veimulomulo kei na Kalou o Jekope

²² Ena bogi vata ga o ya, a sa lako yani o Jekope kei rau na watina, kei rau na watina lalai, kei iratou na luvena e lewe tinikadua, ka lako kosova na Uciwai o Japoki.

²³ Ni sa kauti iratou oti yani ki tai kadua, a sa vakatalai ira talega yani ki tai kadua na ka kecega e taukena.

²⁴ A sa qai mai vo taudua ga yani o Jekope. A sa qai lako mai e dua na tamata ka veimulomulo vata kaya me yacova na kida ni mataka.

²⁵ Ia ni sa raica na tamata o ya ni sa na sega ni qaqa rawa vei Jekope ena veimulomulo, a sa mokuta na dibina, ka mani veisiri kina na kena i sema.

²⁶ A sa kaya vua na tamata o ya, “Mo laivi au me'u lako; sa voleka mai na kida ni mataka.” Sa qai kaya o Jekope, “Au na sega ni laivi iko me yacova ni o sa vosavakalougatataki au.”

²⁷ Sa qai taroga na tamata o ya, “O cei na yacamu?” A sa sauma, “O Jekope,”

²⁸ Sa qai kaya tale na tamata o ya, “Ena sega tale ni vakatokai me yacamu o Jekope, ia sa na vakatokai me yacamu o Isireli;” baleta ni o sa veimulomulo kei na Kalou vata kei ira na tamata, ka sa rawata na qaqa.

²⁹ Sa qai kaya o Jekope, “Yalovinaka, mo kaya mada mai vei au na yacamu.” Ia e sa qai kaya na tamata o ya, “A cava o sa taroga kina na yacaqu?” Sa qai vakalougatataki koya mai kea.

³⁰ A sa kaya o Jekope, “Au sa raica na mata ni Kalou, ia ka'u se bula tikoga”; ka sa vakatoka kina na vanua o ya o Jekope me yacana o Penieli.

³¹ A sa cadra mai na matanisiga ni sa biuti Penieli o Jekope, ka sa lako vakaca yani ena vuku ni dibina.

³² O ya na vuna era sega kina ni dau kania na Isireli na ua mai na i sema ni dibi me yacova na siga edaidai, baleta ni a laumoku na ua ni dibi i Jekope.