Vakatekivu 3 - Vakavakadewa Vou kei na iVola tale eso

Ai Tekitekivu ni i Valavala Ca

¹ Na gata sa manumanu qaseqase duadua vei ira na manumanu kecega a bulia na Kalou o Jiova. A sa kaya na gata vua na yalewa “Sa tukuna li na Kalou mo drau kakua ni kania na vuanikau kecega sa tu ena i teitei?”

² A sa kaya na yalewa, “E rawa me keirau kania na vuanikau kecega sa tu ena i teitei.

³ Ia na kau ga e tiko ena lomadonu ni i teitei, sa kaya kina na Kalou me keirau kakua sara ni kania, se tara; de keirau mate.”

⁴ A sa kaya na gata, “Drau na sega dina ni mate kevaka o drau na kania.

⁵ Ia e kila na Kalou ni gauna o drau kania kina, ena qai rai na matamudrau, drau na qai vaka na Kalou ka kila na ka vinaka kei na ka ca.”

⁶ Ni sa raica na yalewa na vunikau kei na rairai vinaka ni vuana, ka ni sa rui talei vakalevu na vuana me rawati kina na vuku, a sa qai tauca eso na vuana ka kania. E a solia talega eso na vuana vua na watina, ka sa kania talega.

⁷ Ia ni rau sa kania, sa qai rai na matadrau, erau sa qai raica ni rau sa luvawale. E rau a qai cula vata na drau ni lolo me rau vakaisulu kina.

⁸ Ena yakavi, ni mudremudre vinaka na cagi, erau a qai rogoca ni lako voli na Kalou o Jiova ena loma ni teitei. E rau a qai vunitaki rau ena veikau.

⁹ A sa qai kacivi Atama na Kalou o Jiova ka kaya, “O sa tiko e vei?”

¹⁰ A sa qai sauma o koya ka kaya, “Au sa rogoca ni o ni sa lako voli ena loma ni i teitei; au a qai rere ka vunitaki au ni'u sa luvawale.”

¹¹ A sa taroga na Kalou, “O cei sa tukuna vei iko ni o sa luvawale? O sa kania beka na vuanikau ka'u a vakarota vei iko mo kakua ni kania?”

¹² A sa kaya o Atama, “Na yalewa ga o ni sa solia vei au, sa solia vei au na vuanikau, ka'u sa mani kania.”

¹³ A sa taroga talega na yalewa na Kalou o Jiova, ka kaya, “A cava o sa cakava kina na ka oqo?” A sa kaya na yalewa, “Sa vosa vaqaseqase vei au na gata, ka'u sa mani kania.”

Vakatauca na Nona Lewa na Kalou

¹⁴ A sa qai kaya na Kalou o Jiova vua na gata: “Ena vuku ni ka o sa cakava oqo, O sa cudruvi kina vakalevu vei ira na manumanu yava i va kecega; mo na dolo e ketemu mai na gauna oqo ka lako yani, ka o na kana mai na kuvu ni soso ena veisiga kece sara o na bula kina.

¹⁵ Au na cakava mo na veimecaki kei na yalewa, era na veimecaki talega na nomudrau kawa. Ena butuqaqia na ulumu na kawa ni yalewa, ia o na katia na bukubuku ni yavadra na luvena.”

¹⁶ A sa kaya vua na yalewa, “Au na vakalevutaka na nomu rarawa ni o sa kunekune, kei na nomu vutugu ni o sa vakasucu gone, ia o na vinakata tikoga na watimu, ka na lewai iko o koya.”

¹⁷ A sa kaya vei Atama. “Ni o sa vakarorogo vua na watimu, ka kania na vuanikau, ka'u sa kaya vei iko, Mo kakua ni kania, sa cudruvi na qele ena vukumu; o na cakacaka vakaukauwa mo rawata kina na kemu kakana ena veisiga kece sara o bula kina.

¹⁸ Ena vakatubura talega vei iko na kau votovotoa kei na co gadrogadro, ka na kemu kakana na wa kei na kau ni veikau.

¹⁹ Mo na cakacaka vakaukauwa ka kana mai na buno ni yadremu, me yacova na gauna o na lesu tale kina ki na qele o a buli kina. Ni o a buli ga mai na qele, ia o na suka tale ki na qele.”

²⁰ A sa vakatoka na watina o Atama me yacana o Ivi (a kena i balebale, Sa bula), ka ni sa tinadra na kawa tamata kecega.

²¹ A sa qai cakava na Kalou o Jiova na i sulu kuli-ni-manumanu ka vakasulumi rau kina o Atama kei Ivi.

Rau Vakasavi o Atama kei Ivi mai na i Teitei

²² A sa kaya na Kalou o Jiova, “Raica, sa yaco na tamata me vakataki kedatou, ni sa kila na ka vinaka kei na ka ca me kakua ni tara na kau ni bula, de mani kana kina, ka qai bula ka sega ni mudu.”

²³ A sa qai vakatalai koya tani na Kalou o Jiova mai na i teitei o Iteni, me cakacakataka na qele a buli mai kina.

²⁴ A sa vakasava tani na tamata o koya, ka sa vakatikori rau na agilosi ena Tokalau ni teitei o Iteni kei na dua na i seleiwau bukawaqa, sa veigoleyaki na yamena ki na veiyasana kecega, me kakua kina ni yacova na kau ni bula e dua na tamata.