Vakatekivu 29 - Vakavakadewa Vou kei na iVola tale eso

Sa Yaco vei Lepani o Jekope

¹ A sa tomana yani na nona i lakolako o Jekope, ka yaco sara ki na nodra vanua na tamata mai na tokalau.

² Ni sa rai yani ki liu, a qai raica e dua na i keliwai ena loma ni buca, ka ratou davo volekata koto e tolu na qele ni sipi. Era sa dau mai gunu na sipi ena i keliwai oqo ka koto e delana e dua na vatu levu.

³ Ni ra sa dauyaco kece yani kina na qele ni sipi, era na qai vaqiqica tani na vatu na i vakatawanisipi me ra gunu na sipi. Era a qai dau biuta lesu tale na vatu ena dela ni keliwai.

⁴ Sa tarogi iratou na i vakatawanisipi o Jekope, “Kemudou na wekaqu, o dou sa lako mai vei?” E ratou sa kaya, “Oi keitou oqo mai Karana.”

⁵ Sa qai kaya vei iratou, “O dou bau kilai Lepani na makubui Neori?” E ratou a sauma ka kaya, “Io, keitou kilai koya.”

⁶ Sa qai tarogi iratou tale, “E bulabula vinaka tiko beka o koya?” E ratou sa kaya, “Io, e bulabula vinaka tiko. Raica, sa lako mai oqo o Raijeli na luvena yalewa vata kei na nona qele ni sipi.”

⁷ A sa kaya o Jekope, “E sa siga levu tu na vanua, ka se bera na gauna me ra dau kau mai kina i loma na sipi. A cava o dou sega ni vagunuva kina na sipi ka kauti ira yani me ra kana ena veico?”

⁸ E ratou sa kaya, “Keitou sega ni rawa ni cakava na ka oqori me yacova ni ra sa yaco kece mai na i vakatawanisipi, ka me qai vaqiqici tani na vatu mai na gusu ni keliwai ka ra sa na qai vagunuvi na sipi.”

⁹ Ni sa veivosaki tiko kei ira, sa kauti ira mai na sipi nei tamana o Raijeli ka ni dau vakatawani ira tiko.

¹⁰ Ia oqo ni sa raici Raijeli na luve i Lepani yalewa na ganei tinana o Jekope kei na sipi nei na vugona o Lepani, sa lako yani o Jekope ka vaqiqica tani na vatu mai na gusu ni keliwai ka vagunuvi ira na sipi nei na vugona o Lepani.

¹¹ A sa reguci Rejieli o Jekope ka tagi vakadomoilevu.

¹² Sa kaya vua, “Oi au na luve i Repeka na ganei tamamu.” Sa qai cici yani o Raijeli ka la'ki kaya vei tamana,

¹³ ia ni rogoca o Lepani na i tukutuku baleti Jekope na luve i ganena, sa cici talega yani me la'ki tavaki koya; sa mokoti koya ka reguca, ka kauti koya yani ki vale. A sa kaya vei Lepani o Jekope na ka kece sa yaco.

¹⁴ Sa qai kaya vua o Lepani. “O sa tiki ni yagoqu dina ka daru dra vata.” A sa tiko e kea o Jekope ena dua taucoko na vula.

Sa Cakacaka vei Lepani o Jekope

¹⁵ A sa kaya vei Jekope o Lepani, “E sega ni dodonu mo cakacaka wale tu ga vei au baleta ni o wekaqu. Tukuna mai vei au se vica na kemu i sau.”

¹⁶ E rua tiko na luve i Lepani goneyalewa; o koya e qase e yacana o Lia, ka gone vei rau o Raijeli.

¹⁷ E rairai vinaka na yaloka ni matai Lia, ia o Raijeli e yalewa rairai totoka ka bulicaki vinaka.

¹⁸ Ia sa domoni Raijeli o Jekope ka kaya, “Au na cakacaka vei iko me yabaki vitu kevaka o vakadonuya me'u vakawatitaki Raijeli.”

¹⁹ A sa kaya o Lepani, “E vinaka cake me'u soli koya vei iko, ka ca kevaka au soli koya vua e dua na tamata tani e tiko kei au.”

²⁰ A sa mai cakacaka yani o Jekope me yabaki vitu me baleti Raijeli. E lekaleka wale ga na gauna o ya vei Jekope ka ni sa rui domoni Raijeli vakalevu.

²¹ Sa qai kaya o Jekope vei Lepani, “Sa oti na noqu gauna ni cakacaka, solia mai vei au na luvemu yalewa me keirau vakawati.”

²² Sa qai cakava e dua na magiti levu o Lepani, ka sureti ira kece mai na tamata ena vanua o ya.

²³ Ia ni sa bogi na vanua sa qai kauti Lia na luvena yalewa vei Jekope; erau a mocevata kei Jekope.

²⁴ (Ia o Lepani sa soli Silipa na nona bobula vei Lia me nona meimei.)

²⁵ Ia ena mataka ka tarava sa qai kunei Lia o Jekope. Sa qai kaya vei Lepani, “A cava o sa cakava kina na ka oqo vei au? Au a cakacaka vei iko me baleti Raijeli, A cava o veidabuitaki au kina?”

²⁶ Sa qai kaya o Lepani, “E sega ni dau kena i vakarau ena neimami vanua me soli me vakawati e liu o koya e gone ni sa bera o koya e qase.

²⁷ Mo wawa mada me oti na macawa ni solevu ni vakamau, au na qai soli Raijeli talega, kevaka o na cakacaka tale vei au me yabaki vitu.”

²⁸ Sa mai vakadonuya yani o Jekope, ia ni sa cava na macawa ni solevu ni vakamau, sa qai soli Raijeli tale o Lepani vua me watina.

²⁹ (Ia o Lepani sa soli Pila na nona yalewa bobula vei Raijeli me nona meimei.)

³⁰ A sa moceri Raijeli talega o Jekope, ka sa domoni koya cake vakalevu mai vei Lia. E a qai cakacaka vei Lepani me vitu tale na yabaki.

O ira na Luve i Jekope

³¹ Ia ni sa raica o Jiova na nona lomani ga vakalailai o Lia mai vei Raijeli, a sa vakarawarawataka vua me vakaluveni; ia sa sega ga ni vakaluveni o Raijeli.

³² A sa bukete o Lia, ka vakasucuma e dua na gonetagane. A sa kaya, “O Jiova sa raica na noqu rarawa, ena qai lomani au kina o watiqu”; ka sa vakatoka kina me yacana o Rupeni.

³³ A sa bukete tale ka vakasucuma e dua tale na gonetagane, ka sa kaya, “O Jiova sa solia tale vei au na gonetagane oqo, baleta ni sa rogoca o koya ni'u sa sega ni lomani”; ka sa vakatoka kina me yacana o Simione.

³⁴ A sa bukete tale, ka vakasucuma e dua tale na gonetagane. A sa ka kaya, “Ia oqo, e sa na qai kabiti au vakalevu cake o watiqu, baleta ni'u sa vakasucuma vua e lewe tolu na luvena tagane”; ka sa mani vakatoka kina me yacana o Livai.

³⁵ Ia sa qai bukete tale, ka vakasucuma e dua tale na luvena tagane. A sa kaya, “Ena gauna oqo ka'u sa na qai vakacaucautaki Jiova kina”; ka sa vakatoka kina me yacana o Juta. A sa qai cegu na nona vakaluveni.