Vakatekivu 28 - Vakavakadewa Vou kei na iVola tale eso

¹ A sa kacivi Jekope o Aisake, ka vakabula vua, ka sa kaya vua, “Mo kakua sara ni vakawati kei na dua na yalewa ni Kenani.

² Mo vakarau, ka lako ki Mesopotemia, ki na vale i Pecueli na tama i tinamu, ka la'ki taura kina e dua na goneyalewa mai kea me watimu, e dua vei ira na luve i Lepani na ganei tinamu.

³ Me vakalougatataka na nomu vakawati na Kalou Kaukauwa o Jiova ka solia me vuqa na luvemu, mo yaco rawa kina mo tamadra e vuqa na veimatanitu.

⁴ Me solia vei iko na Kalou o Jiova na veivakalougatataki me vaka sa solia vei Epara-ama, ka mo taukena talega na vanua o sa tiko kina oqo, na vanua sa solia na Kalou vei Epara-ama.”

⁵ Sa qai vakatalai Jekope yani o Aisake, ka sa mai lako yani o Jekope ki Mesopotemia vei Lepani na luve i Pecueli na kai Aramea, na ganei Repeka, na tina i Jekope kei Iso.

Taura Tale e Dua na Watina o Iso

⁶ A sa kila o Iso ni sa vakalougatataki Jekope o Aisake ka sa vakatalai koya yani ki Mesopotemia me la'ki vakawati kei na dua na yalewa mai kea. Sa kila talega ni sa vakaroti koya ena gauna e sa vosa vakalougatataki koya kina me kakua sara ni vakawati kei na dua na yalewa ni Kenani.

⁷ A sa kunea talega ni sa talairawarawa o Jekope vei rau na tamana kei na tinana, ka sa lako yani ki Mesopotemia.

⁸ Ia sa qai kila o Iso ni sega ni vinakati ira na yalewa ni Kenani o tamana.

⁹ A mai lako yani vei Isimeli ka la'ki vakawati tale kei na dua na yalewa, o Meleci na ganei Nepeioci na luve i Isimeli, o koya na luve i Epara-ama mei kuri ni watina.

Na Tadra i Jekope mai Peceli

¹⁰ A sa biuti Perisepa o Jekope ka lako yani ki Karana.

¹¹ A sa yaco yani ki na dua na vanua ni sa bogi na vanua. A taura e dua na vatu e kea me nona i lokoloko, ka davo sobu me moce.

¹² Sa qai tadra o koya, ka raica ni sa tu e kea e dua na i kabakaba balavu, ka sa tu na vuna mai vuravura ka yaco yani i lomalagi na ulu ni kabakaba; era sa siro sobu ka cabe cake na agilosi i Jiova ena i kabakaba o ya.

¹³ Ia sa duri tu e yasana o Jiova, ka kaya vua, “Oi au o Jiova, na Kalou i Epara-ama na tamamu kei na Kalou i Aisake, au na solia na vanua o davo koto kina oqo vei iko kei ira na nomu kawa.

¹⁴ Era na lewe vuqa sara na nomu kawa me vaka na kuvu ni soso, era na tete yani ki na ra, ki na tokalau, ki na vualiku, ka vakakina ki na ceva. Ena vukumu kei ira na nomu kawa ka'u na vakalougatataki ira kina na veimatanitu kecega e vuravura.

¹⁵ Au na tiko ga kei iko, ka taqomaki iko ena vanua kecega o lakova, ka'u na kauti iko lesu tale mai ki na vanua oqo. Au na sega sara ni laivi iko me yacova ni'u sa vakayacora rawa na ka au sa yalataka oqo vei iko.”

¹⁶ Sa qai yadra mai ena nona moce o Jekope ka kaya, “Sa tiko vakaidina o Jiova ena vanua oqo, ia ka'u a sega tiko ni kila.”

¹⁷ Sa qai tuburi koya na rere ka kaya, “Sa dua na vanua rerevaki oqo! Sai koya ga oqo na vale ni Kalou; sai koya oqo na matamata sa tadola yani ki lomalagi.”

¹⁸ A sa yadra sara ena mataka lailai o Jekope, ka sa taura na vatu e vakalokoloko tiko kina, ka vakaduria me vatu ni vakananumi, ka lumuta na delana ena waiwai.

¹⁹ Sa qai vakatoka me yaca ni vanua o ya o Peceli. (Na yaca ni koro o ya e liu o Lusa.)

²⁰ Sa qai bubului yani o Jekope ka kaya, “Kevaka ena tiko ga kei au na Kalou, ka taqomaki au ena noqu i lakolako oqo, ka solia vei au na kakana me'u kania kei na i sulu me'u vakaisulu kina,

²¹ ia kevaka au na lesu bula tale mai ki na vale i tamaqu, o ni sa na qai noqu Kalou.

²² Ia na vatu au sa vakaduria oqo me i vakananumi ena yaco me nomuni vale, ka'u na solia vei kemuni na dua na i katini ni ka kecega o ni solia vei au.”