Vakatekivu 27 - Vakavakadewa Vou kei na iVola tale eso

Sa Vosavakalougatataki o Jekope

¹ Ena gauna a qase sara kina o Aisake, sa buwawa na matana, ka sega ni raica rawa e dua na ka; sa qai kacivi Iso mai na luvena ulumatua ka kaya vua, “Na luvequ,” sa kaya o Iso, “Oi au oqo tamaqu.”

² Sa kaya vua o Aisake, “Raica, au sa qase mai, ka'u sa sega ni kila na siga au na mate kina.

³ Mo kauta na nomu i yaya ni vakasasa, na taga ni gasau kei na nomu dakaititi, ka lako yani i veikau mo vakasasa manumanu mai me kequ.

⁴ Mo qai mai vakarautaka e dua na kakana vinaka sara me vaka na kena au dau taleitaka, ka kauta mai me'u kania, me'u na qai vosa vakalougatataki iko ni bera ni'u mate.”

⁵ E a vakarorogo tu o Repeka ena gauna e vosa tiko kina o Aisake vei Iso na luvena. Ia ena gauna sa lako yani kina o Iso me la'ki vakasasa manumanu,

⁶ sa qai kaya o Repeka vei Jekope, “Au sa rogoca na ka sa kaya o tamamu vei Iso,

⁷ ‘Mo la'ki kauta mai e dua na manumanu ka cakava e dua na kakana au dau taleitaka me kequ; me'u kania, au na qai vakalougatataki iko ena mata i Jiova ni bera ni'u mate.’

⁸ Ia oqo na luvequ, mo muria na noqu vosa ka cakava na ka au sa kaya oqo vei iko.

⁹ Mo lako ki na qele ni manumanu ka kauta mai kina e rua na luve ni me urouro vinaka; au na mai vakasaqara e dua na kakana vinaka sara me kei tamamu, me vaka e dau taleitaka o koya.

¹⁰ Ia o na qai kauta vei tamamu me kania, ka me vosa vakalougatataki iko ni bera ni mate.”

¹¹ Sa qai kaya o Jekope vei Repeka na tinana, “O sa kila vinaka ni o Iso e tamata yago vutivutia, ia sa sega ni vutivutia na yagoqu.

¹² De na qai tarai au o tamaqu, ka qai kila ni'u lawakitaki koya, ka na qai vakatauca kina vei au na cudru, ka segai na kalougata.”

¹³ A qai mani kaya o tinana, “Na luvequ, me qai tau vei au na nomu cudruvi; ia mo muria ga na noqu vosa, ka la'ki kauta mai e rua na luve ni me.”

¹⁴ A sa lako yani o Jekope ka kauta mai e rua na luve ni me vei tinana; a sa mai vakarautaka yani o Repeka na kakana me vaka na kena e dau taleitaka o tamana.

¹⁵ A kauta mai o Repeka na i sulu vinaka i Iso ka tu e vale ka mai vakasulumi Jekope kina na luvena gone.

¹⁶ A sa vakaisulutaka ena kuli ni me na ligana kei na tiki ni domona e sega ni vutivutia.

¹⁷ Sa qai solia yani vua na kakana vinaka sa vakarautaka kei na madrai e sa vavia.

¹⁸ A sa lako yani o Jekope vei tamana ka kaya, “I Tamaqu!” A sauma mai o tamana, “Io, na luvequ! O cei vei rau na luvequ o iko?”

¹⁹ A sa kaya o Jekope vei tamana, “Oi au o Iso na nomu ulumatua, au sa la'ki cakava mai na ka o sa kaya vei au. Yalovinaka mo duri mai ka kania eso na lewe ni manumanu ni noqu vakasasa ka'u sa kauta mai oqo me kemu, ka mo qai vosa vakalougatataki au.”

²⁰ A sa kaya o Aisake, “A yaco vakacava mo kunea totolo kina, na luvequ?” A sauma o Jekope ka kaya, “Sa vukei au o Jiova na nomu Kalou me'u kunea vakatotolo mai.”

²¹ Sa qai kaya o Aisake vei Jekope, “Toro voleka mada mai na luvequ, ka me'u tarai iko. Sai iko dina li o Iso?”

²² A toro voleka sara o Jekope vei tamana, ia ni sa tarai koya o tamana, a sa kaya, “Na i rogorogo ni domomu e sa vaka ga na domo i Jekope, ia na ligamu sa liga i Iso.”

²³ A sa sega ni kilai Jekope rawa o koya, baleta ni sa vutivutia talega na ligana me vakataki Iso. Ni sa vakarau vakalougatataki koya,

²⁴ a sa qai tarogi koya tale, “O iko dina na luvequ o Iso, se segai?” A sauma o koya, “Io, sai au ga.”

²⁵ A sa kaya o Aisake, “Kauta mai vei au na lewe ni manumanu o sa toboka mai me'u mai kania, au na qai vosa vakalougatataki iko.” A sa kauta mai vua na kakana o Jekope, ka kauta talega mai eso na waini me gunuva.

²⁶ Ia sa qai kaya vua o tamana, “Toro voleka mai ka reguci au, na luvequ.”

²⁷ Ia ni sa toro mai me reguci koya, sa boica na i boi ni nona i sulu o Aisake, sa qai vosa vakalougatataki koya ka kaya, “Na boi vinaka kei luvequ sa vaka na i boi ni vanua sa vakalougatataka o Jiova.

²⁸ Me solia vei iko na Kalou na tegu ni lomalagi ka vakabulabulataka na nomu vanua, Me vakalevutaka vei iko o koya na sila kei na waini.

²⁹ Me ra qaravi iko na lewenivanua, ka cuva vei iko na veimatanitu. Mo liutaki ira na wekamu, ka me ra cuva vei iko na kawa i tinamu. Ena cudruvi o ira sa cudruvi iko, ka vakalougatataki o ira sa vosa vakalougatataki iko.”

Vakamamasu o Iso me Vakalougatataki

³⁰ Ni sa solia oti na nona vosa ni veivakalougatataki o Aisake, ka sa lako yani o Jekope, a sa qai lesu mai o Iso ena vakasasa manumanu.

³¹ A sa cakava talega e dua na kakana vinaka sara, ka kauta vei tamana. A sa kaya vua, “I Tamaqu, au kerea mo duri cake mada ka kania eso na lewe ni manumanu au sa rawata mai, ka mo qai vosa vakalougatataki au.”

³² A tarogi koya o Aisake, “O cei o iko” A sauma o Iso ka kaya, “Oi au o Iso, na nomu ulumatua tagane.”

³³ A sa sautaninini vakalevu o Aisake ka kaya, “Ia o cei ga sa vakamate manumanu ka kauta mai vei au? Au a se qai kania oti sara toka ga oqo ni bera ni o yaco mai. Au sa vosa vakalougatataki koya oti, ka sa nona kece vakadua na veivakalougatataki.”

³⁴ Ia ni sa rogoca na ka oqo o Iso, a sa tagi ena domoilevu kei na rarawa bibi, ka kaya, “Mo vosa vakalougatataki au, o au talega, i tamaqu!”

³⁵ A sauma o Aisake ka kaya, “Sa lako oti mai o tacimu ka lawakitaki au. Sa kauta yani o koya na nomu veivakalougatataki.”

³⁶ Sa qai kaya o Iso, “Oqo sai karua ni gauna me veidabuitaki au kina o koya. Sa rauta me yacana o Jekope. Sa taura mada na noqu i tutu vakaulumatua, ia oqo sa mai taura tale na noqu i votavota ni veivakalougatataki. O sega li ni vakavotaka tiko e dua na vosa ni veivakalougatataki me noqu?”

³⁷ A sa kaya o Aisake, “Au sa qisi koya oti me turaga vei iko, ka'u sa soli ira kecega na wekana me ra nona dauveiqaravi. Au sa solia vua na sila kei na waini. Sa sega tale ni qai vo e dua na ka me'u solia vei iko, na luvequ!”

³⁸ A sa cikevi tamana tikoga o Iso, ka kaya, “Sa duabau ga li na nomu vosa ni veivakalougatataki, i tamaqu? Mo vakalougatataki au talega, tamaqu!” A sa tabalaka na domona o Iso ka tagi.

³⁹ Sa qai kaya vua o Aisake, “E segai na tegu mai lomalagi vei iko, E segai na vanua bulabula ka sautu me nomu.

⁴⁰ O na bula ena nomu i seleiwau, Ia o na qaravi koya na tacimu. Ni kevaka o saqati koya, O na tamusuki tani mai na nona veiliutaki.”

⁴¹ A sa cati Jekope sara vakalevu o Iso, baleta ni sa solia vua o tamana na veivakalougatataki. A sa kaya e lomana, “Sa voleka na gauna me na tagicaki kina na mate i tamaqu; au na qai vakamatei Jekope ni oti o ya.”

⁴² Ni sa rogoca o Repeka na i tuvatuva i Iso, sa qai kacivi Jekope ka kaya vua, “Sa nakita o tuakamu me na vakamatei iko.

⁴³ Ia oqo, na luvequ, mo muria na noqu vosa. Mo lako sara ga vakatotolo oqo vei ganequ o Lepani mai Karana,

⁴⁴ ka la'ki tiko vua vakalailai mai kea, me yacova na gauna sa malumu kina na cudru i tuakamu,

⁴⁵ ka na qai guilecava na ka o sa cakava vua. Au na qai tala yani e dua me la'ki kauti iko lesu mai. Baleta na cava me'u vakayali kemudrau ruarua kina na luvequ ena dua ga na siga?”

Talai Jekope o Aisake

⁴⁶ A sa kaya o Repeka vei Aisake, “Sa leqa vakalevu na noqu bula vei rau na yalewa tani na wati Iso. Kevaka e qai vakawati tale o Jekope vei ira na Itaiti me vakaoqo, sa vinaka cake ga vei au me'u mate yani.”