Vakatekivu 26 - Vakavakadewa Vou kei na iVola tale eso

Tiko mai Kira o Aisake

¹ A sa yaco tale e dua na dausiga ena vanua o ya, ka duatani mai na dausiga sa donumaka o Epara-ama. A sa qai lako yani o Aisake i Kira vua na tui Filisitia o Apimeleki.

² E a rairai vei Aisake o Jiova, ka kaya, “Mo kakua ni lako sobu ki Ijipita; mo tiko ga ena vanua au sa kaya vei iko mo tiko kina.

³ Mo vakaitikotiko ga eke, ka'u na tiko vata ga kei iko ka vakalougatataki iko. Au na solia talega na vanua taucoko oqo vei iko kei ira na nomu kawa. Au na vakayacora na ka au sa bubului kina vei Epara-ama na tamamu.

⁴ Au na vakalewevuqataka na nomu kawa me vaka na veikalokalo ni lomalagi, ka'u na solia na vanua taucoko oqo vei ira na nomu kawa. Era na rawata na veimatanitu kecega e vuravura me'u vakalougatataki ira me vaka na noqu vakalougatataki ira na nomu kawa.

⁵ Au na vakalougatataki iko, baleta ni sa talairawarawa vei au o Epara-ama na tamamu, ka sa muria na noqu i vakaro kecega.”

⁶ A sa mani tiko voli ga kina mai Kira o Aisake.

⁷ Era sa qai tarogi koya na tamata ena vanua o ya me baleta na watina; sa qai kaya o Aisake, “E ganequ o koya”; ka ni sa rere me kaya, “E watiqu o koya,” baleta ni sa nanuma de ra na qai vakamatei koya ka tauri Repeka na watina o ira na tamata e kea, ka ni rui matavinaka.

⁸ Ni sa dede vakalailai na tiko nei Aisake mai kea, ena dua na gauna, sa qai rai sobu mai o Apimeleki na tui Filisitia ena katubaleka, ka raici rau o Aisake kei Repeka ni rau veidomoni tiko.

⁹ Sa qai vakarota o Apimeleki me kau mai o Aisake, ka mai kaya vua, “Raica, na yalewa oqo e watimu ga. A cava o kaya kina ni ganemu?” A sa kaya o Aisake “Au sa nanuma ni'u na vakamatei kevaka au sa kaya ni watiqu.”

¹⁰ Sa qai kaya yani o Apimeleki, “A cava o sa cakava kina na ka oqo vei keimami? Kevaka sa qai yaco me la'ki moceri watimu e dua vei ira na noqu tamata, sa rawa ni vakavuna oqo me ora na loma i keimami ena cala levu.”

¹¹ A sa qai vakaroti ira kece sara na nona tamata o Apimeleki ka kaya, “Kevaka e dua na tamata sa vakasosataka na tamata oqo se na watina, ena vakamatei o koya.”

¹² A sa qai ia na teitei o Aisake ena vanua o ya, ka sa tamusuka talega ena yabaki vata o ya e vakadrautaki na veika sa kaburaka ki na qele, ni sa vakalougatataki koya o Jiova.

¹³ Sa tubu vakalevu na nona i yau ka sa yaco me tamata vutuniyau sara.

¹⁴ Sa levu sara talega na nona sipi, na bulumakau, kei na nona tamata dauveiqaravi, ia era sa mani vuvutaki koya kina na kai Filisitia.

¹⁵ Ena ka oqo, era sa qai buluta ena qele na i keliwai kece sara ka ra a kelia taumada na tamata i Epara-ama na tamana ena dela ni nona gauna.

¹⁶ A sa qai kaya o Apimeleki vei Aisake, “Mo biuti na neimami vanua. O sa yaco mo rui kaukauwa cake sara mai vei keimami.”

¹⁷ Sa qai biuta na vanua o ya o Aisake ka la'ki vakaitikotiko ena Buca o Kira.

¹⁸ Sa qai kelia tale yani na veikeliwai era sa kelia ena gauna i Epara-ama na tamana, ka ra a buluta na kai Filisitia ena gauna sa mate kina o Epara-ama. A sa vakayacani ira o Aisake ena veiyaca kece a sa vakatokai ira kina o tamana.

¹⁹ Era sa qai kelia e dua na i keliwai ena buca na tamata i Aisake, ka ra qai kunea e dua na mata ni wai.

²⁰ O ira na i vakatawa ni manumanu mai Kira era sa veileti kei na i vakatawa ni manumanu i Aisake, ka ra kaya, “Na wai oqo e neimami.” A sa vakatoka kina o Aisake me yaca ni keliwai o ya o Eseki, baleta ni ra a veileti kei koya.

²¹ Era sa qai kelia tale e dua na i keliwai na tamata i Aisake, ka ra sa veiletitaka tale, a sa qai vakatoka kina o koya me yacana o Sitina.

²² A sa lako mai kea ka la'ki kelia tale e dua na i keliwai, ka sega ni dua na veileti e yaco kina; a sa vakatoka kina me yacana o Riopoci, ni sa kaya, “Sa qai solia vei keda o Jiova na galala ena vanua oqo, ka na yaco me da vuavuai kina.”

²³ Sa qai lako mai kea o Aisake ki Perisepa.

²⁴ Ena bogi o ya, sa rairai kina vua o Jiova, ka kaya, “Oi au na Kalou i Epara-ama na tamamu. Mo kakua ni rere, ka ni'u sa tiko kei iko. Au na vakalougatataki iko kei ira na nomu kawa, ena vuku ni noqu yalayala vua na noqu tamata o Epara-ama.”

²⁵ A sa tara cake mai kea e dua na i cabocabonisoro o Aisake ka qaravi Jiova kina. Sa qai cakava e kea na nona i tikotiko, ka ra kelia na nona tamata e dua tale na i keliwai.

Na Veiyalayalati i Aisake kei Apimeleki

²⁶ A sa lako mai Kira o Apimeleki me mai raici Aisake. A salavata mai kei koya o Ausaci na nona daunivakasala kei Fikoli na komada ni nona mataivalu.

²⁷ A tarogi iratou o Aisake ka kaya, “A cava dou mai raici au kina, ni dou sa cati au ka vakatalai au tani mai na nomudou vanua?”

²⁸ E ratou sa kaya vua, “Keitou sa qai kila ni tiko vakaidina kei kemuni o Jiova, ka keitou sa nanuma kina me caka mada e dua na nodatou veiyalayalati. Keitou gadreva mo ni yalataka

²⁹ ni o ni na sega ni cakava e dua na ka ca vei keitou, ka keitou na sega talega ni cakava e dua na ka ca vei kemuni. Keitou a caka vinaka vei kemuni, baleta ni keitou a vakatalai kemuni yani vakavinaka. Ia oqo, sa matata vakasigalevu ni sa vakalougatataki kemuni o Jiova.”

³⁰ A vakarautaka o Aisake e dua na magiti vei iratou, ka ratou sa kana ka gunu.

³¹ Ena siga ka tarava, e ratou a yadra sara vakamataka ka cavuta yadudua na nodratou bubului. A sa qai vakamoce vei iratou o Aisake, ka ratou mai veitawasei yani ena vakacegu.

³² Ena siga vata o ya, era sa lako mai na tamata i Aisake ka kaya vua na ka me baleta na i keliwai era sa kelia. Era sa kaya, “Keimami sa kunea na wai!”

³³ A sa vakatoka na i keliwai o ya me yacana o Sepa; ka sa vakatokai kina na koro o ya me yacana o Perisepa me yacova mai na siga edaidai.

Yalewa Tani e Vakawatitaka o Iso

³⁴ Ni sa yabaki 40 o Iso, a sa qai vakawatitaka e lewe rua na yalewa ni Itaiti, o Jutici na luve i Peri kei Pasemaca na luve i Eloni.

³⁵ O rau oqo erau sa kauta vakalevu mai na loma rarawa kei na dredre ni bula vei rau o Aisake kei Repeka.