Vakatekivu 25 - Vakavakadewa Vou kei na iVola tale eso

Kawa i Epara-ama mai vei Ketura

¹ Sa la'ki vakawati tale o Epara-ama kei na dua na yalewa, na yacana o Ketura.

² Oqo o iratou na luvena vua: o Simirani, kei Jokisani, kei Mitani, kei Mitiani, kei Isipaki, kei Sua.

³ O Jokisani e tamadrau o Sipa kei Titani, ka ra qai luve i Titani o ira na Asurimi, na Letusimi, kei na Leumimi.

⁴ E ratou luve i Mitiani tagane o Efa, kei Eferi, kei Inoke, kei Apita, kei Elitea. Sai ira kece o ya na kawa i Ketura.

⁵ Sa solia vei Aisake o Epara-ama na veika kecega sa taukena;

⁶ ia ni bera ni mate, a sa vota talega eso na i loloma vei ira na luvena tagane sa sucu mai vei ira na watina lalai. A sa qai vakauti ira yani oqo ki na veivanua ena Tokalau, ka me ra tiko vakayawa mai vua na luvena o Aisake.

Na Mate kei na Bulu i Epara-ama

⁷ A sa 175 taucoko na yabaki ni bula i Epara-ama.

⁸ E a qai mate ni sa yacova e dua na yabaki vinaka ni nona bula, ni sa qase sara, ka sa toki yani vei ira na wekana.

⁹ E rau sa qai buluti koya na luvena tagane o Aisake kei Isimeli ena qara vatu mai Makipila, ena vanua i Efironi na luve i Soa na Itaiti, ena tokalau kei Mamire.

¹⁰ Sai koya o ya na vanua sa volia o Epara-ama mai vei ira na Itaiti; ka rau sa bulu ruarua kina o Epara-ama kei na watina o Sera.

¹¹ Ni sa mate o Epara-ama, sa qai vakalougatataka na luvena tagane o Aisake na Kalou, ka sa vakaitikotiko volekata “Na i keliwai i Koya sa bula ka raici Au.”

Na Kawa i Isimeli

¹² Oqo o ira na kawa i Isimeli, na luve i Epara-ama, ka vakasucuma vua o Eka na yalewa ni Ijipita, na dauveiqaravi i Sera.

¹³ Oqo na yacadra na luve i Isimeli me vaka na veitarataravi ni nodra sucu. Na nona ulumatua o Nepeioci, ka tarava yani o Kitari, o Atipieli, o Mipisami,

¹⁴ o Misima, o Tuma, o Masa,

¹⁵ o Etati, o Tima, o Jeturi, o Nefisi, vata kei Ketema.

¹⁶ O ya na luve i Isimeli, ka sai koya o ya na yacadra kei na nodra veikoro kei na nodra i tikotiko, e tinikarua na turaga me vaka na nodra veiyavusa.

¹⁷ A sa 137 na yabaki i Isimeli sa qai mate ka toki yani vei ira na wekana.

¹⁸ Era sa tiko na kawa i Isimeli ena vanua o Avila kei Suri, mai na tokalau kei Ijipita, ena sala ki Asiria era sa tiko yani vakatikitiki mai vei ira na wekadra.

Na Sucu i Iso kei Jekope

¹⁹ Oqo na i tukutuku i Aisake na luve i Epara-ama.

²⁰ Ni sa yabaki 40 o Aisake, erau sa qai vakawati kei Repeka na luve i Pecueli (e dua na kai Arami mai Mesopotemia) ka ganei Lepani.

²¹ A sa masuti Jiova o Aisake ena vuku i watina baleta ni sega tiko ni vakaluveni rawa. A qai rogoca o Jiova na nona masu ka sa yaco me bukete o Repeka.

²² E rau sa veivala na gone e ketena, ka sa kaya, “Kevaka sa vakaoqo, a cava me'u bula tiko kina?” A mai masu yani me taroga na loma i Jiova.

²³ Ia sa kaya vei Jiova, “E rua na matanitu erau sa tiko e ketemu; O na vakasucuma e rua na mata tamata. E dua ena qaqa cake vei koya kadua, Ia ena qaravi koya sa gone o koya e qase.”

²⁴ Ia ni sa yaco me vakasucu, erau a drua na luvena.

²⁵ Sa sucu mai na kena i matai, a damudamu ka vutivutia me vaka e dua na i tutuvi vutivutia, era a vakatoka me yacana o Iso.

²⁶ Ia ni sucu mai o koya ka gone, a sa taura kaukauwa toka na bukubuku ni yava i Iso, ka sa vakatokai me yacana o Jekope. Sa yabaki 60 o Aisake ena gauna erau a qai sucu kina.

Volitaka o Iso na Nona Dodonu Vakaulumatua

²⁷ E rau a tubu cake na gone, a yaco me dauvakasasa o Iso ka dau lasa e veikau, ia o Jekope, a tamata galugalu ka dau tu ga e vale.

²⁸ E dau taleitaki Iso o Aisake, ka ni dau kania na manumanu sa dau rawata mai ena nona vakasasa; ia sa dau lomani Jekope o Repeka.

²⁹ Ena dua na siga ni vakasaqara tiko o Jekope e dua na mataqali kakana damudamu,

³⁰ Sa ka levu sara na nona viakana, ka mani kaya vei Jekope, “Au sa viakana sara ga vakalevu; mo solia mada eso na kakana damudamu oqori me'u kania.” (O ya na vuna a vakatokai kina o Iso me yacana o Itomi.)

³¹ Sa qai kaya o Jekope, “Solia mai vei au na nomu i tutu vakaulumatua, au na qai solia vei iko.”

³² Sa mani kaya o Iso “Au sa voleka ni mate, a cava na kena yaga vei au na noqu i tutu vakaulumatua?”

³³ A qai kaya o Jekope, “Mo bubului mada e liu vei au.” A sa bubului o Iso ka volitaka vei Jekope na i tutu vakaulumatua.

³⁴ A sa solia vua o Jekope eso na madrai kei na kakana damudamu. A kana o Iso, gunu ka lako yani. A sa beca o Iso na nona i tutu vakaulumatua.